Endı bır aidan keiın Londonda jazǧy Olimpiada oiyndarynyŋ jalauy jelbıreidı. Älemdegı eŋ üzdık saiypqyrandary saiysqa tüsedı. Tört jylda bır ret ötetın dübırlı dodaǧa Qazaqstan sportşylary da qyzu daiyndalyp jatyr.
El namysyn qorǧaityn ūlttyq qūramanyŋ sapynda elordalyq sportşylar da bar. Sonyŋ bırı – grek-rim küresınıŋ şeberı, astanalyq Almat Kebısbaev. Mektep qabyrǧasyn attaǧan sätten boz kılemge arbalǧan daryndy bala 2001 jyly Astana qalasyndaǧy Qajymūqan atyndaǧy respublikalyq sport mektep-internatyna qabyldanady. Bapkerı Meiırhan Rahmetov öz şäkırtınıŋ tabiǧi talanty men eŋbekqorlyǧyna zor senımmen qarap, erınbei jattyǧa berse, älemdık jarystarda el namysyn qorǧaityn baluan bolyp ösetınıne ümıtpen qaraityn edı.
Bılıktı bapkerdıŋ ümıtı de, senımı de aldanǧan joq. Almat Kebısbaev jasöspırımder men jastar arasyndaǧy Qazaqstan chempionatynda bırneşe ret qatarynan jeŋımpaz atanyp, özınıŋ ūlttyq qūramaǧa da laiyqty sportşy ekenın däleldei tüstı. Soŋǧy üş-tört jylda öz salmaǧynda qarsylas şaq keltırmeitındei boldy.
2009 jyly Aziia chempionatynda kümıs medal alsa, 2011 jylǧy qūrlyq bırınşılıgınde altyn jüldeger atandy. Kışı älem chempionatyna balanatyn İvan Poddubnyidyŋ Gran-pri turnirınde jeŋımpaz bolyp, qazaq küresınıŋ äleuetın älemge taǧy bır däleldep körsetkenı esımızde. Odan keiın tūŋǧyş ret eresekter arasyndaǧy älem chempionatynda baǧyn synap, qola jüldemen oraldy. 2011 jyl Almat üşın eŋ syndarly jyl bolǧany anyq. Olai deitınımız, barlyq sport türlerı boiynşa London olimpiadasyna ırıkteu jarystary ötıp, naǧyz myqtylar öz elderınıŋ namysyn qorǧau baqytyna ie bolyp jatty.
Osyndai şeşuşı jarys astanalyq Almat Kebısbaev üşın Türkiiada ötken älem chempionaty boldy. Älemnıŋ kıl myqtylary küş synasqan chempionatqa astanalyq erekşe daiyndalyp kelgenı aiqyn edı. Ol finalǧa deiıngı tört qarsylasyn bet qaratpai ūtty. Alaida eŋ soŋǧy beldesude İran baluany Omid Nauruzige jol berıp qoidy.
Söitıp, Almat ekı ret qatarynan älem chempionatynyŋ jüldegerı atandy. Al Stambūlda ötken jarystyŋ qorytyndysynda Almat Kebısbaev London olimpiadasyna lisenziia aldy.
Almattyŋ Londondaǧy beldesuı 6 tamyz künı ötetın bolady. Osy kün astanalyq baluan üşın sättı boluyn tılep, Qazaqstan tuy jüldegerler qatarynan körınedı dep ümıtpen qaraimyz.
Ǧalym QOJABEKOV
