Astanada basty mäsele – baspana men jer. Elordaǧa köşıp keluşılerdıŋ osy «jandy» jerın alaiaqtar da jaqsy bılıp alǧan. Soŋǧy bes jylda bas qalada alaiaqtyq jolmen azamattardyŋ senımın paidalanyp, paidaqorlyq nietın jüzege asyrǧandar jäne bötennıŋ mülkın jymqyru syndy qylmystar köbeigen.
Astana qalasy №2 Almaty audandyq sotynyŋ sudiasy Ubaidulla Qoşanovtyŋ aituynşa, biylǧy jyldyŋ 6 aiynyŋ derekterıne sai, Almaty audandyq sotyna 19 adamǧa qatysty 17 qylmystyq ıs tüsken. 8 adamǧa qatysty 7 qylmystyq ıs ükım şyǧarumen aiaqtalǧan. 10 adam sottalsa, onyŋ ışınde 2 adamnyŋ bas bostandyǧy şektelgen. Mülıktı tärkıleu türındegı qosymşa jaza 10 adamǧa taǧaiyndalsa, 2 azamatqa belgılı bır qyzmetpen ainalysu qūqynan aiyru türındegı jaza taǧaiyndalǧan.
– Sottalǧan azamattardyŋ denı – «üi alyp beremın, jer telımın aluǧa kömektesemın» dep jūrtşylyqty aldap, aqşasyn jymqyryp ketkender. Sondyqtan astanalyqtardy abai boluǧa şaqyramyz. Kez kelgen jyljymaityn mülıktı alu jäne beru tek zaŋ aiasynda jüzege asyrylatynyn ärkım esten şyǧarmauy tiıs, – deidı sudia Ubaidulla Qoşanov.
Sot öndırısınde qaralyp jatqan alaiaqtyq türmen bötennıŋ mülkın iemdenu üşın jasalǧan qylmystar san aluan. Sonyŋ bır mysalyn keltıre keteiık. Astana qalasynyŋ tūrǧyny Rüstem atty azamat «jeke üi salu üşın jer telımın alyp beremın» dep uäde berıp, qūryǧyna tüsırgen adamdardyŋ ärqaisysynan 25 myŋnan 30 myŋ AQŞ dollaryna deiın aqşa bopsalaǧan. Ol özgenıŋ senımıne kırıp alyp, 9 jäbırlenuşıge alaiaqtyq jolmen jalpy qūny 58209530 teŋgege materialdyq zalal keltırgen. Būdan soŋ alǧan aqşalardy jäbırlenuşılerge qaitarmai, olarǧa tiesılı bolǧan 16,2008 gektar jer telımın böten azamatpen kelısımşartqa otyryp, jerdıŋ bärın 28 päterge auystyryp jıbergen. Onymen qoimai, päterlerdı öz menşıgıne jekeşelendırıp alǧan.
Sot ükımımen alaiaq azamat Qylmystyq Kodekstıŋ 177-babynyŋ «B» tarmaǧymen aiypty dep tanylyp, oǧan jetı jylǧa bas bostandyǧynan aiyru jazasy taǧaiyndaldy. Al onyŋ qylmystyq jolmen tapqan jeke menşıgındegı mülkı memleket paidasyna tärkılendı.
Qazırgı taŋda sot ükımın oryndau maqsatynda sottaluşynyŋ jeke menşıgınde tärkılengen mülkı sot oryndauşylar arqyly satylyp, jäbırlenuşılerge keltırgen materialdyq şyǧyndar qaitarylu üstınde.
Sondyqtan mamandar jekemenşıkke päter, jer telımın satyp alarda satuşy taraptyŋ bükıl qūjattaryn tügel tekserıp, memleket organdardan tiıstı anyqtamalar aluǧa keŋes beredı.
Qymbat NŪRǦALİ
