İmanǧali TASMAǦAMBETOV, Astana qalasynyŋ äkımı
TIRKELGENDERGE TÜRLI KÖMEK TİESILI
Pazylova Kümısai Arzyqyzy:
– Sälemetsız be, qūrmettı äkım?! Men – üş bala tärbielep otyrǧan jalǧyz basty anamyn. Bırınşı toptaǧy mügedek qyzym bar. Oralman bolǧanymyzben, kvota ala almai jürmız. Alǧan künnıŋ özınde de, ne jep aluǧa, ne baspana aluǧa jetpeidı. Qyzymdy emdetu üşın barmaǧan jerım, baspaǧan tauym qalmady. Jany jomart, jüregınde jyluy bar azamattar kömek qolyn sozar dep, telebaǧdarlamalarǧa da bırneşe ret qatystym. Alaida, eşqandai nätije joq. Perzentınıŋ dertıne şipa tappai, şarq ūrǧan ana hälın tüsınıp, qarjy nemese baspa¬na mäselesın şeşuge kömekteser de¬gen ümıtpen özıŋızge ötınış aitqaly otyrmyn. Özıŋızdei el aǧalaryna zor ümıt artatyn qyzyma kömektesuıŋızdı sūraimyn. Bızdei materialdyq jaǧdaiy tömen oralmandarǧa atqaruşy bilık ta¬rapynan qandai kömek körsetıledı?
JAUAP:
– Kümısai Arzyqyzy, bırınşıden, sız oralman sanaty boiynşa baspanaǧa kezekke tūra alasyz. Ol üşın sız HQO-ǧa baruyŋyz qajet. Alaida, memlekettık tūrǧyn üi qorynan baspana kezekke säikes berıledı jäne ony bırneşe jyl kütuge tura keledı. Kezekten tys baspana tek ŪOS qatysuşylary men mügedekterıne ǧana berıluı mümkın.
Ekınşıden, Qazaqstan Respublikasy Ükımetınıŋ qaulysyna säikes mügedek balalar İmanbaeva köşesı, 16-üide ornalasqan Baqylau jäne äleumettık qorǧau departamentınıŋ medisinalyq komissiiasynyŋ qorytyndysy boiynşa jergılıktı biudjetten arnauly jabdyqtarmen (ortopediialyq būiymdarmen, kreslo-ar¬bamen, surdo-tiflo qūraldarmen jäne surdokömekpen), sanatoriilerge joldama¬larmen qamtamasyz etıledı.
Üşınşıden, Astana qalasy mäslihatynyŋ şeşımı boiynşa, jylyna bır ret Mügedekter künınde mümkındıgı şekteulı jandar 3000 teŋge kölemınde azdaǧan materialdyq kömek alyp otyrady, sondai-aq, qoǧamdyq kölıkte tegın jol jüru jeŋıldıgıne ie.
Törtınşıden, Qazaqstan Respublikasynyŋ «Memlekettık atauly äleumettık kömek turaly» zaŋyna säikes memlekettık atauly äleumettık kömek jan basyna şaqqandaǧy ortaşa tabysy kedeilık şegınen tömen azamattarǧa, al «Balaly otbasylarǧa berıletın memlekettık järdemaqylar turaly» zaŋyna säikes 18 jasqa deiıngı balalarǧa berıletın järdemaqy otbasynyŋ jan basyna şaqqandaǧy ortaşa taby¬sy azyq-tülık sebetınıŋ qūnynan tömen bolǧanda taǧaiyndalady.
Astana qalasy boiynşa 2012 jyldyŋ 2 toqsanynda kedeilık şegınıŋ mölşerı – 7193 teŋgenı, al azyq-tülık sebetınıŋ qūny – 10790 teŋgenı qūraidy.
Joǧaryda atalǧan järdemaqy türlerın taǧaiyndau mäselelerı boiynşa Astana qalasynyŋ Jūmyspen qamtu jäne äleumettık baǧdarlamalar basqarmasyna habarlasa alasyz. Mekeme İmanbaeva köşesı, 16, №1,9 kabinette ornalasqan. Alaida, būl kömekterdı taǧaiyndauda Astana qalasynda tūraqty tırkelu mındettı şart bolyp tabylady.
BAǦASY ARZAN BASPANA DAULY
Töleşova Külpara:
– Men 2002 jyly auyldaǧy üiımdı satyp, Astana qalasy «Gazapparatura» alaby Sadovaia köşesındegı 217-saiajaidy aldym. Sol üige jylu kırgızıp, qamqorymdaǧy balammen jäne nemerelerımmen osy künge deiın tūryp jatyrmyn, özım zeinetkermın. Biyl bızdıŋ saiajaidy būzamyz degen eskertu-habarlama keldı. Saiajaidyŋ kūny 1 mln 700 myŋ teŋgege baǧalandy, al körşılerdıŋ saiajailary, bızdıŋ uchaskemen bırdei bola tūra, 5 mln 500 myŋǧa şyqqan. Nege är uchaskenı ärtürlı baǧalaidy? Men älgı aqşaǧa qaladan päter ala almaimyn ǧoi…
JAUAP:
– Külpara, «Maiak» baǧbandyq serıktestıgınde ornalasqan, kadastrlyq nömırı 21-319-106-594, № 217 jer uchaskesı Saryarqa daŋǧylyndaǧy köpırden bastap Köktal-1 kentıne deiın ornalasqan «Esıl özenınıŋ arnasyn qaita salu, 5-kezek, 8-uchaske» nysanynyŋ qūramyna kıredı. Joǧaryda körsetılgen nysannyŋ şekarasyndaǧy jer telımderın satyp alu jūmystaryn «Qalalyq jyljymaityn mülık» MKK jüzege asyrady.
Qazaqstan Respublikasy Jer kodeksınıŋ 87-babyna säikes jer telımın memlekettık qajettılıkter üşın mäjbürlep ielıkten şyǧaru barysynda onyŋ baǧasyn öteu mölşerı, nysany men töleu merzımı «Memlekettık mülık turaly» zaŋynyŋ 6-tarauynda belgılengen. Osy zaŋnyŋ 67-babynyŋ 2-tarmaǧynda: «Memlekettık qajettılıkter üşın ielıkten şyǧarylatyn, menşık iesıne azamattyq-qūqyqtyq mämıle boiynşa nemese sot şeşımı boiynşa ötken jer uchaskesınıŋ baǧasy azamattyq-qūqyqtyq şartta nemese sot şeşımınde körsetılgen baǧanyŋ mölşerınde, bıraq naryqtyq baǧadan aspaityn mölşerde anyqtalady» delıngen.
Qazaqstan Respublikasynyŋ qoldanystaǧy zaŋdaryna säikes menşık iesıne tiesılı mülıkke baǧalau jürgızıldı, onyŋ nätijesınde menşık iesıne 1 738 356 (bır million jetı jüz otyz segız myŋ üş jüz elu alty) teŋge mölşerınde aqşalai ötemaqy ūsynyldy. Menşık iesımen satyp alyna¬tyn mülıktıŋ baǧasy turaly kelısımge qol jetpegendıkten, Astana qalasynyŋ äkımdıgı sotqa memlekettık qajettılıkter üşın jer telımın mäjbürlep ielıkten şyǧaru (satyp alu) turaly talap-aryz berdı. Bügınge deiın būl mäsele boiynşa sot şeşımı şyǧarylǧan joq. Bız sot şeşımın basşylyqqa alatyn bolamyz.
JOQ NÄRSE EŞQAŞANDA ÖRTENBEIDI
Niaşina Vera Nikolaevna:
– Qūrmettı qala äkımı! Qalanyŋ köptegen marşruttaryndaǧy kölıkter apatty jaǧdaida ekenın qaperıŋızge salǧym keledı. Soŋǧy aida ekı ret tütındep, örtengelı jatqan avtobustan äzer şyǧyp ülgerdım, būl № 63 marşrutta bolǧan jaǧdai. Jarty jyl būryn eskı «PAZiktıŋ» tejegışı ıstemei qalyp, jol apatyna duşar bola jazdadym. Sızder jolaqysyn ösıre beresızder, odan da kölıktıŋ jaǧdaiyn jaqsartyp, qyzmet körsetu mädenietın ösırgenderıŋız dūrys bolar edı…
JAUAP:
– Vera Nikolaevna, bırınşıden, Astana qalasynyŋ marşruttaryndaǧy «PAZ» markaly eŋ soŋǧy avtobus 2005 jyly qoldanystan şyǧarylǧan. Ekınşıden, qalada № 63 marşrut joq. Aqauy bar avtobustar jolǧa şyǧarylmaidy, öitkenı, olar avtoparkten şyǧar aldynda tehnikalyq tekseruden ötedı, ony jol jüru qauıpsızdıgı jönındegı injener jüzege asyrady. Astana qalasy avtoparkterınıŋ jyljymaly qūramy jyl saiyn jaŋartylyp, eskırgen modelder jelıden alynyp tastalady, olardyŋ orny¬na syiymdylyǧy joǧary, jürıske jaily kölık qūraldary satyp alynady. Būl ürdıs jalǧasa beredı, mäselen, tek biyldyŋ özınde 80 kölık satyp alynady, solardyŋ 43-ı Astana köşelerınde jolauşylar ta¬symaldap jür.
KÖGALDY JAIPAP, KÖŞETTI QŪRTA KELDI
Abduvelieva Nadejda Narimanovna:
– Qūrmettı İmanǧali Nūrǧaliūly, bız Bögenbai daŋǧyly 12-üide tūramyz. Irgemızde «Olimp» bukmekerlık keŋsesı ornalasqan, onyŋ qasbetı Bögenbai daŋǧylyna qarap tūr. Būryn jihaz sa-lony ornalasqan kezde osy ǧimarattyŋ aldyna kögal töselıp, aǧaş köşetterı egılgen edı. «Olimp» köşıp kelgelı kögal jaiyna qaldy, aǧaştar quraǧan soŋ kesıp tastady, keiın olardy tübırınen qoparyp alyp, ornyna üŋıreigen şūŋqyryn qaldyrdy. Qazırgı kezde bukmekerlık keŋsege keletınder taptap tastaǧan kögal ornynyŋ şaŋy şyǧyp, al şūŋqyrlar temekı tūqylyna tolyp jatady. Osylaişa körer közge jaisyz körınıs qalyptasyp otyr, osyǧan şara qoldanularyŋyzdy sūraimyn.
JAUAP:
– Nadejda Narimanovna, qala körınısıne bei-jai qarai almaityn bolmysyŋyzdy barlyq astanalyqtar ülgı tūtsa, süiıktı astanamyz būdan da taza, jinaqy da jaily bola tüser edı. Sızdıŋ maǧan jazǧan hatyŋyzdyŋ negızınde tekseru jürgızılıp, sonyŋ arqasynda «Olimp» bukmekerlık keŋsesıne tiesılı jer aumaǧy tärtıpke keltırıldı.
Al, endı, jasyl köşetter jaiyna keletın bolsaq, olar joiylyp ketken joq. Tiıstı rūqsat alǧan keŋse iesı olardy Qarasai köşesıne köşırıp, qaitadan egıp qoiǧan, mūny ekologiialyq polisiia qyzmetkerlerı de rastap otyr.
SEIFULLİN NEGE SASYP TŪRADY?
İskakova Äsel Ramazanqyzy:
– Qūrmettı İmanǧali Nūrǧaliūly! Uälihanov jäne Sembinov köşelerı arasyndaǧy Seifullin köşesınıŋ boiyndaǧy aryqtardy tazalaumen kım ainalysuǧa tiıs? Sol tūstan jürıp ötu nemese terezenı aşyp qoiu jüdä mümkın emes: aryq qoqysqa tolyp jatqandyqtan, jaqyndasaŋ sasyq iıs qolqany qauyp, basty ainaldyrady.
JAUAP:
– Äsel Ramazanqyzy, jauynnyŋ mol jauuyna, nöser suyn aǧyzu mäselesınıŋ özektılıgıne bailanysty Astananyŋ üş audanynyŋ äkımderıne, Energetika jäne kommunaldy şaruaşylyq, Jolauşylar tasymaly jäne avtomobil joldary basqarmalarynyŋ bastyqtaryna aryqtar men jauyn suy aǧatyn jelılerdı qoqys üimesınen tazartu jönınde tapsyrma berdım. Jūmys bastalyp ta kettı. Uälihanov pen Sembinov köşelerı aralyǧyndaǧy Seifullin köşesınıŋ boiyndaǧy aryqtardyŋ jai-küiıne Almaty audany äkımınıŋ orynbasary Älihan Jūmahanūly Quatbekov jauap beredı. Ol bergen aqparat boiynşa, būl uchaskedegı tazalau jūmystary juyrda aiaqtaluǧa tiıs.
Astana qalasy äkımdıgınıŋ www.astana.kz saitynan äzırlendı
