ÄLEUMETTIK KÖMEK QALAI KÖRSETILEDI?
Astana qalalyq mäslihatynyŋ bır top deputaty elordadaǧy qos bırdei äleumettık qyzmet körsetu ortalyǧynda boldy. Mäslihat deputattary ortalyqtyŋ tynys-tırşılıgımen tanysyp, sūraqtaryna jauap aldy. Ortalyq basşylary özderı atqaryp otyrǧan şarualardy baiandap, tüitkıldı mäselelerın aitty. Al mäslihat deputattary bolsa, mümkındıgı şekteulı azamattarǧa järdem berıp otyrǧan ortalyqqa qoldau bıldıretının jetkızdı.
Äuelı mäslihat deputattary qala äkımdıgınıŋ «Äleumettık qyzmet körsetu ortalyǧynda» bolyp, onyŋ tynys-tırşılıgımen tanysty. Ortalyq direktory Rysty Baimaǧanbetovanyŋ aituynşa, mekemede 155-ke juyq qyzmetker jūmys ısteidı. Olar balalardan bastap qarttarǧa deiın ärtürlı qyzmet türlerın körsetedı. Atalǧan ortalyq aşylǧan kezde mūnda 598 azamat äleumettık kömek alsa, qazır onyŋ sany 640-qa jetken.
– Bız būǧan deiın qalamyzdaǧy Esıl men Saryarqa jäne Almaty audandarynyŋ tūrǧyndaryna äleumettık kömektı üiıne baryp körsetetın edık. Alaida bızdıŋ ortalyq ötken jyldyŋ 1 säuırınen bastap arnaiy ǧimarat jaldap, äleumettık qyzmet körsetudı qolǧa aldy. Bız bırınşı jäne ekınşı toptaǧy mümkındıgı şekteulı balalardan bastap jalǧyz qalǧan qarttarǧa deiın kömek körsetemız. Qazırgı taŋda ortalyqta 320 qart pen 320 balalar tırkelgen, olarǧa bızdıŋ qyzmetkerler üiıne baryp jäne osy ortalyqta qyzmet körsetedı, – deidı Rysty Baimaǧanbetova.
ALTY BALA JÜRE BASTADY
«Äleumettık qyzmet körsetu ortalyǧyna» keletın balalar 10 künnen bastap 20 künge deiın bolyp, kömek alady. Sebebı, tiıstı mamandar ata-analarǧa balalarǧa qalai qarau kerek ekenın jan-jaqty körsetedı. Jalpy, är maman balalarmen 40 minuttai jūmys jasaidy.
– Mäselen, medisinalyq tekseruden ötken balany medbike qabyldap alǧannan keiın ony logoped, defektolog, psiholog, eŋbek terapiiasy, muzyka, massajist syndy ärtürlı mamandar qaraityn bolady. Osy kömektı 20 kün alǧannan keiın atalǧan qyzmettı äleumettık qyzmetker üide jalǧastyra beredı. Osy eŋbegımızdıŋ arqasynda 6 bala aiaqtan tūryp, jüre bastady. Būl, ärine, ortalyqtaǧy bılıktı mamandardyŋ jankeştı eŋbegınıŋ arqasynda mümkın bolyp otyr, – deidı ol.
İä, adamdarǧa äleumettık körsetetın ortalyqtyŋ jūmysy köŋıl quantady. Sondyqtan da osy ortalyqqa kelıp, äleumettık kömek alǧysy keletın azamattar barşylyq. Osyny eskergen ortalyq basşylary 2 bölımşe aşudy josparlap otyrǧanyn aitady. Onyŋ bırınşısı jasöspırım balalarǧa arnalsa, al ekınşısı qarttarǧa qyzmet körsetedı.
QARTTARǦA DA QARAILASADY
Ortalyqta balalar ǧana emes, sonymen qatar qarttarǧa da qarailasu jolǧa qoiylǧan. Mäselen, bügınde ortalyqtyŋ qyzmetkerlerı 320 qartqa ärtürlı kömek körsetıp, batasyn alyp otyr.
– Bızdıŋ qyzmetkerler qarttardyŋ üiın jinastyryp beruden bastap, olarǧa azyq-tülık pen därı-därmek äkelıp berıp kömektesedı. Sondai-aq, bızdıŋ mamandar halyqqa qyzmet körsetu ortalyǧyna baryp, qarttardyŋ qūjattaryn rettestırıp, tıptı, auruhanaǧa baryp-keluge järdemdesedı. Būdan bölek ortalyq balalar men qarttardy qalamyzdaǧy mädeni oşaqtarǧa aparyp, demaluǧa airyqşa män berıp otyr. Naqtyraq aitsam, balalardy Astanalyq sirk pen «Mega» sauda oiyn-sauyq ortalyǧyna aparyp, köŋılın köterdık. Al egde tartqan qariialardy Ūlttyq mūrajai men ärtürlı körmelerge aparyp tūramyz, – deidı ortalyq direktory.
Qazaq «qarty bar üidıŋ qazynasy bar» dep tekten tek aitpaǧan. Osy bır qanatty sözge qaperge alǧan ortalyq mamandary qarttarǧa qarailasudy paryz sanaidy. Äitse de, ortalyq ǧimaratynyŋ tar boluy olardyŋ jūmysyna kedergı keltırıp otyr eken. Būl olqylyqty mäslihat deputattary öz közderımen körıp, aldaǧy uaqytta şeşetının aitty.
«NŪRLY JÜREKTIŊ» JÜGI JEŊIL EMES
Būdan keiın mäslihat deputattary Astana qalasy äkımdıgınıŋ «Nūrly jürek» äleumettık qyzmet körsetu ortalyǧynda» boldy. Ortalyq direktorynyŋ äleumettık jūmys jönındegı orynbasary Qūralai Qojamqūlovanyŋ aituynşa, mūnda 234 astam mügedek bala tärbielenedı. Sondai-aq, ol bala sanynyŋ ūlǧaiuyna bailanysty ötken jyldyŋ qazan aiynda kündızgı bölım jaŋa ǧimaratqa köşırılgenın aitady.
– 1981 jyly Selinograd oblystyq atqaru komitetınıŋ şeşımımen mümkındıgı şekteulı balalarǧa arnalǧan balalar üiı – internat aşyldy. Al 2005 jyly balalar üiı Astana qalasynyŋ «Balalar psihonevrologiialyq, medisinalyq, äleumettık mekemesı bolyp atauy özgertıldı. Sondai-aq, 2016 jyly Astana qalasy äkımdıgınıŋ «Nūrly jürek» äleumettık qyzmet körsetu ortalyǧy» KMM dep qaita qūryldy. Jalpy atauy bırneşe ret özgerse de, bızdıŋ ortalyq balalarǧa äleumettık kömek körsetudı nazardan tys qaldyrǧan emes, – deidı Qūralai Edılbekqyzy.
Mäselen, bügınde ortalyq arnaiy äleumettık kömektıŋ 8 türın tolyq körsetedı. Atap aitar bolsaq, ortalyq arnaiy äleumettık kömektıŋ medisinalyq, psihologiialyq, pedagogikalyq jäne tūrmystyq türın körsetedı. Sondai-aq, «Nūrly jürek» äleumettık ekonomikalyq kömekten bastap mädeni, qūqyqtyq jäne eŋbektık qyzmet körsetudı öz mındetıne jüktep alǧan. Ortalyqtyŋ taǧy bır erekşelıgı mūnda balalar ǧana emes, sonymen qatar 18 jastan asqan azamattar da äleumettık kömek alady. Būdan bölek atalǧan mekeme mädeni şaralardy ūiymdastyruǧa airyqşa nazar audaryp otyr.
Serık QŪDAIBERGENŪLY