Memleket basşysy Qasym-Jomart Toqaev «Teŋızşevroil» kompaniiasynyŋ 30 jyldyǧyna arnalǧan saltanatty jiynǧa qatysty. Prezident «Şevron» korporasiiasy Qazaqstanmen bırlesken käsıporyn aşqan alǧaşqy şetel kompaniiasy ekenın atap ötıp, kompaniianyŋ 30 jyldyq mereitoiy elımızdıŋ mūnai-gaz salasy üşın aituly oqiǧa ekenın aitty.
«Bügınde «Teŋızşevroil» jetekşı halyqaralyq kompaniia retınde elımızdıŋ jalpy ekonomikalyq damuyna tabysty üles qosyp keledı. Elımızde öndırıletın mūnaidyŋ üşten bırı «Teŋızşevroilǧa» tiesılı. Kompaniia otyz jyl ışınde 70 milliard dollar investisiia qūiyp, memleket biudjetıne 160 milliard dollardan astam kırıs äkeldı. Kompaniia tauarlar men qyzmetterdıŋ 70 paiyzyn jergılıktı önım jetkızuşılerden satyp alady. «Teŋızşevroil» jūmysşylarynyŋ 95 paiyzdan astamy – Qazaqstan azamattary» dedı Prezident.
Memleket basşysynyŋ aituynşa, kompaniia mūnai salasynda ozyq tehnologiialardy belsendı türde qoldanyp, kömırsutegı beitaraptyǧyna qol jetkızuge septıgın tigızetın şaralardy däiektı türde qabyldap jatyr.
«2000 jyldan berı kompaniia auaǧa taralatyn şyǧaryndylardyŋ kölemın 75 paiyzǧa azaitty. Būl baǧyttaǧy jūmys jalǧasuǧa tiıs. Teŋız ken ornyndaǧy öndırıstı auqymdy türde keŋeitu jobalarynyŋ jüzege asyryluy aiaqtalyp keledı. Būl elımızge mūnai öndırısınıŋ kölemın taǧy da 12 million tonnaǧa arttyryp, älemdegı eŋ ırı mūnai jetkızuşı elderdıŋ qataryna kıruge mümkındık beredı» dedı Prezident.
Memleket basşysy jaŋa şaqyrylymdaǧy Parlamenttıŋ bırınşı sessiiasynda söilegen sözınde şaǧyn jäne orta biznestı damytu mäselesıne basa nazar audarǧanyn atap öttı. Onyŋ pıkırınşe, «Teŋızşevroil» būl baǧytta da maŋyzdy röl atqarady. Kompaniianyŋ auqymdy öndırıstık quatynyŋ arqasynda ärtürlı salada jüzdegen jaŋa käsıporynnyŋ paida boluyna ekonomikalyq negız qalandy. Sonyŋ nätijesınde on myŋdaǧan jūmys orny aşyldy.
Būdan bölek, Prezident «Teŋızşevroildyŋ» äleumettık jauapkerşılıgı turaly aitty. Käsıporyn otyz jylda 100-den astam ırı äleumettık jobany ıske asyrǧan. Atap aitqanda, mektepter, balabaqşalar, auruhanalar men basqa da nysandardyŋ qūrylysyna qomaqty qarjy bölgen. Jiyn soŋynda Prezident otandyq mūnai salasyna sıŋırgen erekşe eŋbegı üşın bırqatar eŋbek ardagerı men kompaniia qyzmetkerlerın memlekettık nagradalarmen marapattady.
