Alǧaşqy qoŋyraudaǧy aituly şaralar
Astanada biylǧy jaŋa oqu jyly jaqsy bastaldy. Alǧaşqy qoŋyrau saltanatynda mūǧalımder qatarynyŋ jas mamandarmen tolyqqandyǧyna köz jetıp, mektep tabaldyryǧyn alǧaş attaǧan büldırşınderdıŋ de az emestıgın aŋǧardyq. Merekelık ıs-şaralar meiırlı ūstazdardyŋ mereiın üstem etıp, oquşylardy şat-şadyman küige böledı.
Ata Zaŋmen astasyp…
Aldymen QR Tūŋǧyş Prezidentınıŋ Mūrajaiy jäne «Nūr Otan» HDP «Jas Otan» jastar qanaty» qoǧamdyq bırlestıgınıŋ ūiymdastyruymen Raiymbek batyr atyndaǧy №50 «Qazǧaryş» mektep-liseiı bırınşı synybynyŋ 30 oquşysy Konstitusiia künıne arnalǧan «Bılım älemıne saiahat» atty 40 minuttyq alǧaşqy sabaǧyn ötkızdı. Balalar mektep tabaldyryǧyn attai otyryp, sol sabaq arqyly elımızdıŋ Konstitusiiasynda jazylǧan özderınıŋ qūqyqtary men mındetterın bıletın boldy. Osy oraida, olar bılım älemıne qyzyqty saiahat jasap, elımızdıŋ negızgı qūjatyn äzırleu tarihymen jäne Elbasy N.Nazarbaevtyŋ Ata zaŋymyzdyŋ jobasyn jasaudaǧy rölımen tanysty. Şara soŋy arnaiy äzırlengen vokaldyq-horeografiialyq kompozisiiaǧa ūlasyp, oquşylarǧa alǧaşqy sabaqtan estelık retınde syilyqtar men kädesyilar tabys etıldı.
Būl rette, jyl saiyn alǧaşqy qoŋyrauǧa deiın Astana qalasy äkımdıgınıŋ qoldauymen ūiymdastyrylyp tūratyn dästürlı «Mektep järmeŋkesın» de aita ketken jön. «Mektepke jol» aksiiasy aiasyndaǧy būl şara Astana, Qaraǧandy jäne Şymkent qalalarynan kelgen 40 käsıpkerdıŋ qatysuymen qalalyq alaŋda ötken edı. Onda mektep formasy, aiaq kiımder, keŋse zattary, riukzaktar, oqulyqtar jäne basqa da kerek-jaraqtar tömendetılgen baǧamen satyldy. Balalardyŋ qūqyqtaryn qorǧau basqarmasynyŋ bas mamany Larisa Temırlinanyŋ aituynşa, künnıŋ kürt suytyp ketuıne qaramastan, Konstitusiia künımen tūspa-tūs kelgen aituly şaraǧa tūrǧyndar belsendı türde qatysqan.
Oqu üşın bärı daiyn
Tura Bılım künı qarsaŋynda jaŋadan 1200 orynǧa eseptelgen №71 mekteptıŋ aşylu saltanaty öttı jäne №60 mektep-liseiınıŋ «Alǧaşqy qoŋyrau» merekesıne Bılım jäne ǧylym ministrı Baqytjan Jūmaǧūlov pen qalalyq Bılım basqarmasynyŋ basşysy Äsima Bimendina keldı. Olar ūstazdar men oquşylardy jaŋa oqu jylynyŋ bastaluymen qūttyqtap, «Qazaqstan-2050» strategiiasy: bır halyq – bır el – bır taǧdyr» atty alǧaşqy qoŋyraudan keiıngı alǧaşqy sabaqqa qatysty. Odan keiın mekteptı aralap, bılım ordasynyŋ tarihymen tanysyp, ūstazdarmen jinalys ötkızdı.
Al, elordalyq 83 mektepte bır uaqytta sättı jalǧasyn tapqan merekelık ıs-şaralar aiasynda Astana qalasy äkımınıŋ orynbasary Aida Balaeva №15, 21, 36, 49, 61 mektepter men liseilerdıŋ ūjymymen kezdestı.
«Senderdıŋ basty maqsattaryŋ – jaqsy bılım alyp, Qazaqstannyŋ laiyqty azamaty bolu. Mädenietımızdı, tarihymyzdy bılıp, memlekettık tıldı qūrmettep, meŋgeru şart. Otanymyzdyŋ patrioty bolu – bärımız de maqtan etetın öz mektebımızdı, aulamyzdy, qalamyzdy süiuden bastalady» dedı Aida Ǧalymqyzy, oquşylardy Bılım künımen qūttyqtai otyryp. Onyŋ aituynşa, Astananyŋ barlyq mektepterı pedagogtarmen tolyq qamtamasyz etılgen.
Endı 2013-2014 oqu jyly ärbır pedagogikalyq ūjymnyŋ qyzmetındegı negızgı baǧyt – memlekettık standarttarǧa säikes bılım beru sapasyn arttyru boluy tiıs.
«Jyl soŋyna deiın taǧy 2 mektep aşu josparlanǧanmen, älı de oqu oryndarynyŋ tapşylyǧy saqtalyp otyrǧany ras. Mūnyŋ basty sebebı, tuu sanynyŋ artuy men halyqtyŋ köşı-qony bolyp tabylady. Biylǧy jazdyŋ özınde köşı-qon üderısı boiynşa Astanaǧa 4 myŋnan astam oquşy kelgen» deidı äkım orynbasary. Soǧan qaramastan, bügınde barlyq mektepterdıŋ oqulyqtarmen qamtamasyz etıluı 98,4 paiyzdy qūrapty. Oǧan qosa, bala aǧzasyn qalyptastyruda maŋyzdy röl atqaratyndyqtan, elordanyŋ barlyq mektepterınde ystyq tamaq berıletındıgın eskergen abzal. Ashanalar jaŋǧyrtylǧan tehnikalyq qondyrǧylarmen tügel jabdyqtalǧan. Sonyŋ arqasynda oquşylardyŋ 75,5 paiyzy ystyq tamaqpen, qalǧan 24,5 paiyzy bufettık tamaqtandyrumen qamtamasyz etıledı.
Sonymen qatar, 1 qyrküiek qarsaŋynda №52 mektep-gimnaziiasynyŋ bazasynda da az qamsyzdandyrylǧan jäne köp balaly otbasydan şyqqan 20-dan astam oquşyǧa mektep jabdyqtary ülestırıldı. Būl şarany Balalardyŋ qūqyqtaryn qorǧau basqarmasy Dın ısterı basqarmasymen bırlese ūiymdastyrǧan.
Qauıpsızdık qadaǧalandy
Bılım künınde Astana qalasy IID Äkımşılık jäne jol polisiiasy qyzmetkerlerı men Bılım basqarmasynyŋ ökılderı ūiymdastyrǧan «Balalardyŋ qauıpsızdıgı» qalalyq aksiiasy da jaman ötken joq. Is-şara barysynda Jol polisiiasy qyzmetkerlerı men iuvenaldy polisiia bölımşelerı qaladaǧy №3, №16, №65, №67, №71 orta mektepterınde balalardyŋ jol-kölık travmatizmı taqyrybynda söz söilep, jaŋa oqu jylynyŋ lineikasyna qatysty. Sondai-aq, orta bılım beru mekemelerınıŋ oquşylaryna jäne ata-analarǧa polisiia qyzmetkerlerınıŋ kämeletke tolmaǧandardyŋ ömırı men densaulyǧyn qorǧau boiynşa jürgızıletın jūmysy, sondai-aq, kämeletke tolmaǧandardyŋ qoǧamdyq oryndardaǧy, bılım mekemelerındegı jäne joldardaǧy qauıpsızdık şaralary turaly aityldy.
Erkeǧali BEISENOV