Jasūlan KENJEHANOV, elorda tūrǧyny:
– Azyq-tülık alu üşın bazarǧa tek aiyna bır ret qana baruǧa uaqyt bolady. Öitkenı Ortalyq bazary, «Şanhai», «Kök» bazarlary – barlyǧy qala syrtynda ornalasqandyqtan, bızge öte alys. Aldaǧy uaqytta sol jaǧalauǧa jaqyn maŋda bazar salyna ma?
Būl saualǧa Astana qalasy İnvestisiialar jäne käsıpkerlıktı damytu basqarmasy basşysynyŋ orynbasary Rysgül Qauǧabaevanyŋ gazet tılşısıne bergen mälımetın ūsynamyz.
– Qazırgı uaqytta Saryarqa audanyndaǧy Şyŋǧys Aitmatov köşesı men 189-köşenıŋ qiylysyndaǧy jer uchaskesınde jaŋa formattaǧy gastronomiialyq bazar salynyp jatyr. Būl bazardyŋ basqalardan erekşelıgı – satyp alǧan azyq-tülık önımderınen sol jerde-aq kez kelgen taǧamdy daiyndatyp, tamaqtanuǧa da barlyq jaǧdai qarastyrylady. Mäskeulık «Danilov» bazarynyŋ prinsipımen jūmys ısteitın jaŋa formattaǧy bazarǧa keluşılerge üzdık auyl şaruaşylyǧy önımderı men älemnıŋ tükpır-tükpırınen äkelınetın delikatester ūsynylyp, türlı järmeŋkeler, gastronomiialyq festivalder men belgılı bas aspazdardyŋ şeberlık sabaqtary jiı ötkızıletın bolady. Jaŋa bazar jospar boiynşa keler jyly paidalanuǧa berıledı dep kütılude.
