Redaksiiaǧa habarlasqan qala tūrǧyny Jeŋıs Meirambekov özı tūratyn audanda qaŋǧybas itterdıŋ köbeiıp ketkenıne alaŋdaitynyn jetkızdı. «Esıldıŋ oŋ jaǧalauynda tūramyn. Naqtyraq aitqanda, Ä. Moldaǧūlova köşesınde oryn tepken eskı üilerdıŋ aulasynda iesız it-mysyq köp. Mektep jasyndaǧy balalar üşın uaiymdaimyn. Qaida habarlasqanym jön?» deidı ol. Oqyrman saualyna orai, osy mäselemen tıkelei ainalysatyn Astana qalasy Auyl şaruaşylyǧy basqarmasyna habarlasqan edık.
Jalpy, elordadaǧy qaŋǧybas itter men mysyqtardy aulau jäne joiudy Astana qalasy äkımdıgınıŋ «Astana vetservis» kommunaldyq memlekettık käsıporyny jürgızedı. Astana qalasy Auyl şaruaşylyǧy basqarmasynyŋ basşysy mındetın atqaruşy Gülmira Ermoldinanyŋ aituynşa, iesız januarlardy aulauǧa qala boiynşa kün saiyn mamandandyrylǧan 3 brigada kölıgı şyǧady.
– «051» qyzmetıne habarlasqan ötınışter kündelıktı tekserılıp, qarauǧa alynady. Mäselen, tek bır aptanyŋ ışınde 126 qaŋǧybas it pen mysyqty ūstau jönınde 33 ötınış tırkelgen, – deidı ol.
Aita ketken jön, qaŋǧybas itterdı aulau jūmystaryna kım körıngen tartylmaidy. Oǧan medisinalyq tekseruden ötken, qūtyruǧa qarsy aldyn alu ekpelerın alǧan, psihonevrologiialyq jäne narkologiialyq dispanserlerde esepte tūrmaǧan adamdar ǧana jıberıledı eken. Olar zaŋ aiasynda rūqsat etılgen qūraldardy ǧana qoldanady. Iаǧni, januarlardy ūstau üşın qūryq, tiıstı sertifikaty bar, äreketke qabıletsız etetın dozalanǧan preparattardy qoldanatyn pnevmatikalyq qaru, torlar, tor-qaqpandar, sondai-aq januarlardy aulau kezınde olardyŋ ölımıne jol bermeitın basqa qūrylǧylar paidalanylady.
Aulanǧan qaŋǧybas itter men mysyqtar üş künnen aspaityn merzımge uaqytşa oqşaulanady. Mamandardyŋ aituynşa, uaqytşa ūstau oqşaulaǧyşynda aulanǧan qaŋǧybas januarlarǧa tırkeu jäne klinikalyq zertteu jürgızıledı. Ärqaisysy jeke torǧa ornalastyrylady. Astanada olardyŋ sany jüzge jetedı.
Al iesı joq januarlar turaly aqparat mamandandyrylǧan ūiymnyŋ internet-resurstarynda ornalastyrylǧannan keiın üş kün ötken soŋ joiylady. Olar arnauly preparattarmen, medikamentozdyq jolmen jansyzdandyrylady. Qaŋǧybas januarlardyŋ ölekselerın joiu arnaiy peş qoiylǧan mamandandyrylǧan ūiymnyŋ öndırıstık bazasynda jüzege asyrylady.
Eger üiıŋızdıŋ maŋynan qaŋǧybas it pen mysyqtardy körseŋız, qalalyq «051» qyzmetıne nemese mekemenıŋ 28-54-70 nömırıne habarlasyp, olardy ūstauǧa ötınış beruge bolady.
Gülmira ŞARHANQYZY
