Astanadaǧy Oquşylar saraiynda ötken jūma-senbı künderı Qostanai oblystyq Iliias Omarov atyndaǧy qazaq drama teatry belgılı jazuşy-dramaturg, Qazaqstannyŋ eŋbek sıŋırgen qairatkerı Joltai Jūmat-Älmaşūlynyŋ qos bırdei qoiylymyn körsetıp, elordalyq körermenderge ruhani tartu jasady.
Qarymdy qalamgerdıŋ alǧaşqy künı qoiylǧan – «Qaiyrymdy qaladaǧy qarlyǧaştar» drama-abstraksiiasy ötken jyly Mädeniet jäne sport ministrlıgı ūiymdastyrǧan «Täuelsızdık tolǧauy» baiqauynda bäige alǧan. Būl tuyndyda qazaq elınıŋ azattyǧynyŋ tūǧyrly boluy jolyndaǧy janqiiarlyq küres pen Astananyŋ säulettı qala bolyp tūrǧyzyluy, osy joldaǧy qiynşylyqtar men kedergıler söz boldy. Pesanyŋ bas keiıpkerı – Säuletker jıgıt arqyly qily-qily qiyndyqtar men tartystar jelılenedı. Qoiylymda qazaq elınıŋ qala salu jolyndaǧy armany Äbunasyr äl-Farabi, abyz Ahmet Iаsaui, tıptı han Abylai zamanynda kökeidı tolqytqany turaly keiıpkerler arqyly äserlı baiandalǧan. Spektakldıŋ premerasy tamyzdyŋ soŋynda Qostanaida ötken. Būl şyǧarma elordanyŋ 20 jyldyq toiyna tamaşa tartu boldy dep aita alamyz. Ony sahnaǧa şyǧarǧan rejisser – Erjan Qaulanov.
Kelesı künı teatr ärtısterı körermenderge suretkerdıŋ «Mūŋmen alysqan adam» drama-elegiiasyn ūsyndy. Būl qoiylymda ötken ǧasyrdyŋ 30-şy jyldaryndaǧy alasapyranda amalsyz tuǧan elden auǧan bır otbasynyŋ aianyşty taǧdyry arqyly bükıl qazaq bastan keşken auyr jaǧdaiy beinelengen. Bas keiıpker Asan qariia jasy seksennen asqanda tuǧan elıne oraludy armandaidy. Alaida oǧan ülken ūly Marat qarsylyq tanytady. Ekınşı balasy Eljannyŋ äkesınıŋ aqyrǧy armanyn oryndaǧysy keledı. Osy jerde Marat pen Eljannyŋ arasyndaǧy pıkır taitalasy arqyly qazırgı jastardyŋ ekı türlı oilaityn bolmysyn aqtarady. Dälırek aitqanda, oily tuyndy däl bügıngı künnıŋ beinesın bederleidı. Pesada közge körınbeitın taǧy bır keiıpker bar. Ol – aqşa.
Ülken ūly Marat Parijdegı biznesın tastap, Qazaqstanǧa oralǧysy kelmeidı. Asan qariianyŋ elge saǧynyşpen oralǧanda, onyŋ aldynan şyǧatyn körınısterde jürektı auyrtpai qoimady. Qarttyŋ auylda ısteitın jūmysy joq, ışkılıkke salynyp, azyp-tozyp jürgen qazaq jıgıtımen arasyndaǧy söz qaǧysularda aşy şyndyqpen berılgen. Jaǧymsyz keiıpker arqyly halqymyzdyŋ keibır mınezderın qatty synaǧan tūstary da boldy. Bıraq sonyŋ bärı spektaklge jan berıp tūrdy. Spektakl basynan aiaǧyna deiın mūŋdy sazben örılıp otyrady. Keibır tūstarynda közge erıksız jas alasyz. Aqyry, Asan qariiaǧa tuǧan jerınen topyraq būiyrady. Pesada oinaǧan akterlardyŋ şeberlıgı de olardyŋ somdaǧan rölderınen anyq baiqalyp tūrdy. Aita keteiık, būl drama-elegiiany belgılı rejisser Ersaiyn Töleubai qoidy.
Qoiylym soŋynda sahnaǧa ekı künı boiy jūrtşylyqtyŋ ruhani şölın qandyrǧan qos tuyndynyŋ avtory Joltai Jūmat-Älmaşūly şyǧyp, sonau Tobyl jerınen at terletıp kelgen teatr ūjymyna alǧysyn bıldırdı.
