«Adamnyŋ adamşylyǧy ıstı bastaǧandyǧynan bılınedı, qalaişa bıtırgendıgınen emes»
Abai. Otyz jetınşı Qara sözınen
21 qyrküiek Altai Kölgınovtıŋ biyl ǧana aty özgergen astanamyz – Nūr-Sūltan qalasynyŋ äkımı bolyp taǧaiyndalǧanyna 100 kün boldy. Memlekettık qyzmette jazylmaǧan zaŋ bar. Basşynyŋ jūmysynyŋ bastauyna baǧa berıledı. Alǧaşqy üş aida eşkım de tau qoparyp tastai almas. Alaida, basşy bolǧan soŋ özıne artylǧan mındetterdı oryndau maqsatynda basty baǧyttardy aiqyndaidy.
Sonymen Qazaqstannyŋ ekınşı Prezidentı Qasym-Jomart Toqaev halyqqa ant berıp, ūlyqtau räsımın ötkızgen künnıŋ erteŋınde bırınşı bolyp 13 mausymda elordanyŋ 8-äkımın taǧaiyndap, Altai Kölgınovtı köpşılıkke tanystyrdy.
Elbasy Nūrsūltan Nazarbaevtyŋ saiasi qairatkerlıgımen tyǧyz bailanysty el täuelsızdıgı, territoriia tūtastyǧy, şekaranyŋ şegendeluı siiaqty ūly mūrattardyŋ qataryna jaŋa astanamyzdyŋ salynuy da jatady. Bas säuletşısı – Tūŋǧyş Prezidenttıŋ özı. Halyq köp şoǧyrlanyp, damuy tym qarqyndy jürıp jatqan qala bolǧan soŋ, elordanyŋ tızgını berılgen basşyǧa artylar ümıt te, jauapkerşılık te, aitylar syn da zıl batpan. «Azamattardyŋ äl-auqatyn arttyruǧa basa män berıletın bolady. Jaqyn künderı tūrǧyndardyŋ äleumettık mäselelerın şeşuge baǧyttalǧan maŋyzdy şeşım qabyldanady. Būl üderısterden astanamyz qalys qalmauy kerek. Kerısınşe, äleumettık mäselelerdı şeşu ısınde aldyŋǧy qatarda jüruı qajet» dedı Qasym-Jomart Toqaev bas qalanyŋ basşysyn tanystyru räsımınde.
Sonymen Aqjaiyqtyŋ aq batasyn alyp kelgen A.Kölgınovtıŋ astanamyz boiynşa alǧan baǧyty qandai?
1. ÜLESKERLER ÜMITI
Alǧaşqy künnen kabinette qol qusyryp otyrmaitynyn baiqatty. Äkımnıŋ jūmys uaqyty taŋǧy 7:00-de problemaly nysandardy aralaudan bastalady. Sebebı elordadaǧy küiıp tūrǧan basty mäsele de osy. 14 myŋnan asatyn ülesker otbasy bar. 2 aidyŋ ışınde Nūr-Sūltan qalasyndaǧy üleskerler bar barlyq 76 köpqabatty üidı aralap şyqty.
Ärbır üleskermen aşyq kezdestı. Onyŋ arasynda jaŋa oqu jylyna daiyndyqty pysyqtap bılım nysandaryn da nazardan tys qalǧan joq. Qazır de būl dästürı jalǧasyp, taŋnyŋ atysy, keştıŋ batysy üleskerlermen kezdesıp jür. Elbasynyŋ tapsyrmasymen üleskerler mäselesın şeşu üşın 40 mlrd. teŋge qarastyryldy. Sol qarjyny tiımdı jūmsap, problemaly tūrǧyn üilerdıŋ mäselesın şeşudı negızgı baǧyty desek bolady.
Alǧaşqy nätijelerı de joq emes. Qūjattary rettelıp baspanalaryna kırıp jatqan tūrǧyndar da joq emes. Josyqsyz qūrylys jürgızgenderden zardap şekken «Magistralnyi» tūrǧyn üi keşenınıŋ 1 jäne 2-blogynyŋ üleskerlerı äkımdıktıŋ qoldauymen mäselelerınıŋ şeşılgenın rastady. Äkım özınıŋ sūhbatynda būl mäseleler turaly aşyq aitty.
«Bır jylda şeşılmeidı. Bız qysqa merzımdı, orta merzımdı, ūzaq merzımdı dep böldık. Biyl 10 üidı ıske qosudy közdep otyrmyz. Aldaǧy uaqytta 15 üi, odan keiın qalǧan üilerdı bıtıremız. Sonda 3-5 jylda bız ony tübegeilı şeşuımız qajet. Ol üşın ülken jūmys atqaruymyz kerek», – dedı qala basşysy.
2. QALA IŞINDEGI QAUYRT JŪMYS
Şahardyŋ kündelıktı şaruaşylyǧy da şaş etekten. Qarausyz qalǧan saiabaqtardy aralap, tiıstı şeşımder qabyldandy. Audandyq äkımdıkterdıŋ ielıgıne berılıp, kütıp baptau jūmystary tapsyryldy. Būryn olarǧa kütım jasau eşkımge jüktelmegen.
Saiabaqtarǧa jöndeu jürgızılıp, ondaǧan gülzarler men saiabaqtar jaŋalandy. Jūmys nätijelerın äkımdıktıŋ resmi aqparattyq resurstarynan köruge bolady.
Astanamyzdyŋ jaǧdaiy nöserden soŋ kürt özgerıp, sai-salany su basady. Qala boiynşa su jinalyp qalatyn 32 oryn bar eken. Sonyŋ 16-sy jobalau jūmystaryn bastap kettı. Aldaǧy uaqytta taǧy 16-syna jobalau jūmystaryn jürgızemız dedı.
«Biyl bastasaq, kelesı jyly aiaqtauymyz kerek. Bauyrjan Momyşūly köşesı ekı kezeŋnen tūrady. Bırınşısı – injenerlık jelı, su jinaityn kärız jüiesı. Al ekınşısı – sudy tazartatyn joba. Būl 3 mlrd teŋge tūrady. Qazır atalǧan köşe men A.İmanov köşesınde jūmystar bastaldy», – dedı A.Kölgınov sūhbatynda.
3. ŞETKERI AIMAQTARDYŊ AHUALY
Nūr-Sūltan qalasynyŋ da qaltarys-būltarysynda kemşılıkter jetıp artylady. Ortalyq audandarynan tysqary jatqan şetkerı aimaqtardyŋ jaǧdaiy qandai?
Qala aumaǧyndaǧy 16 jeke sektorly eldı mekendı aralap bolǧan soŋ äkım qoǧamdyq keŋes müşelerımen, mäslihat deputattarymen bas qosty.
Sol şetkerı aimaqtarda tūratyn 280 myŋnan astam halyq elorda tūrǧyndarynyŋ 25 paiyzyn qūraidy. Iаǧni 1/4 sol jerlerde tūrady.
«Osy aimaqtardyŋ, eldı mekenderdıŋ mäselesın şeşuge bailanysty Memleket basşysy Qasym-Jomart Kemelūlynyŋ arnaiy tapsyrmasy bar. Ükımetpen bırge osy mäselelerdı şeşumen ainalysyp jatyrmyz. Bızde elordany damytudyŋ keşendı jospary bar, keşendı jospar – 5 jyldyq» degen bolatyn sol kezdesude.
Kölgınov ondaǧy mäselelerdı 3 blokqa bölıp körsettı. Bırınşısı – infraqūrylymdyq mäseleler, ol – injenerlık jelıler men joldar. Ekınşısı – äleumettık nysandar. Ol – bılım beru nysandary, mektep, balabaqşa nemese därıgerlık ambulatoriia, sport nysandary. Üşınşı blok – abattandyru. Ol – trotuar, saiabaq, jaryqtandyru, aialdamalar, iaǧni adam ömırınıŋ sapasyn arttyruǧa baǧyttalǧan maŋyzdy mäseleler. Osynyŋ barlyǧyna 270 mlrd.qarjy qajet ekenın eseptep şyǧardy. Qyruar qarajat bır künde bölıne salmaityny taǧy anyq. Sondyqtan, tūrǧyndarǧa eŋ qajettı dünielerdı jetkızudı basşylyqqa alyp otyr.
Bügınde şetkerı aimaq tūrǧyndarynyŋ da bilıkke degen senımı artyp keledı. Bır ǧana İlinka eldı mekenıne 2,5 mlrd.qarjy bölınıp infraqūrylymǧa jūmsaluda. Köktal-1, Köktal-2-ge barsaq, ol jerde biyldyŋ özınde 43 köşege asfalt töseldı.
4. AŞYQTYQ HÄM ÄLEUMETTIK SALA
Azamattardy qabyldaudy jüielı türde ötkızıp, tūrǧyndardyŋ problemasyn öz auyzdarynan estidı. Alǧaşqy üş aida 400-den astam azamatty qabyldaǧan. Zaŋ boiynşa aiyna 1 ret qana qabyldauyna da bolady. Alaida kün saiyn qabyldau ötkızıp, halyqpen jaqyn tıldesudı jalǧastyryp keledı. Prezidenttıŋ tapsyrmasymen aşylǧan «Janūia» otbasy institutyn qoldau ortalyǧynda azamattardy qabyldaudy bastady.
«Aşyq äkımdık» şarasy osydan üş jyl būryn Batys Qazaqstan oblysynda qolǧa alynǧan bolatyn. Juyrda Nūr-Sūltandaǧy 4 audannyŋ äkımdıgı bır künde «Aşyq äkımdık» ūiymdastyrdy. Esıl audanynyŋ ǧimaratynan «Open akimat» ıske qosyldy.
Qoǧammen tyǧyz qarym qatynasty äleumettık jelılerdegı resmi paraqşalarynan aŋǧaruǧa bolady. İnstagramdǧy äkımnıŋ akkauntyna kelıp tüsken türlı deŋgeidegı aryzdarǧa äkımdıktegı basşylyq lauazymdaǧy azamattar jauap beredı. Iаǧni, äkım apparaty, basqarma basşylary kerı bailanys tūrǧysynan mobildı jūmys rejiımne köştı deuge bolady.
Taǧy bır aita ketetın jäit, Nūr-Sūltan qalasynda erekşe qajettılıgı bar balalardyŋ ata-analarymen kezdesuden keiın A.Kölgınov elordada taǧy ekı oŋaltu ortalyǧy salynatynyn aitty.
Sonymen qatar, qaladaǧy ippodromdardyŋ bırınde ippoterapiia ortalyǧy salynatyn boldy.
5. GAZBEN QAMTU
Elbasynyŋ 5 äleumettık bastamasynda körsetılgen elordany gazben qamtu jūmystary jalǧasuda. Taǧaiyndalǧan künnen berı bırneşe ret jylytu qazandyqtarynyŋ biylǧy qysqa jäne gazdandyru jūmystaryna daiyndyǧyn bırneşe ret qadaǧalady.
«Tūŋǧyş Prezident – Elbasy Nūrsūltan Nazarbaev elordany gazdandyrudy tapsyrdy. Bügın jelı qūrylysy bastaldy. Jobanyŋ ıske asyrylu merzımı de, sapasy da qataŋ baqylauda bolady. Kelesı jylu beru mausymy bastalǧanǧa deiın adamdar gazdy üilerıne ötkızıp ülgeruı üşın jobanyŋ bırınşı kezeŋın 2020 jyldyŋ jazynda aiaqtau közdelıp otyr. Tehnikalyq qadaǧalau tösemnıŋ tereŋdıgın, jylu oqşaulau normalaryn, gaz qūbyrlarynyŋ tüiısulerın jäne oryndalatyn jūmystyŋ sapasyn zerdeleuge tiıs. Merzımı boiynşa tezdetu kerek» degen qala äkımı Altai Kölgınov gaz qūbyrynyŋ negızgı magistraldary jyl soŋyna deiın jürgızıletının aitty.
– 18 qyrküiek künı astanamyz Nūr-Sūltan qalasynyŋ negızın qalauşy, şaharymyzdyŋ Bas säuletşısı – Elbasymyzǧa elorda maŋyndaǧy jasyl beldeudıŋ damu barysy turaly baiandadym.
Tūŋǧyş Prezidentımızdıŋ tapsyrmasyna säikes qala maŋyndaǧy jasyl beldeudı damytudyŋ keşendı jūmystary jürgızılude. Däl qazır bız 2025 jyly aiaqtaluy tiıs ekınşı kezeŋın jüzege asyrudamyz. 2012-2019 jyldardy qamtityn ekınşı kezeŋde 2 myŋ 264 ga. aumaqqa 2 mln. 800 myŋ köşet otyrǧyzyldy. Endı 2020-2025 jyldar aralyǧynda taǧy 2,5 myŋ ga. jerge 3 mln. 500 myŋ köşet egıledı. Ekınşı kezeŋnıŋ qorytyndysy boiynşa barlyǧy 6 mln. 300 myŋ tal otyrǧyzylady.
Sonymen qatar qala äkımdıgı bölgen qosymşa 2 myŋ 800 ga aumaqqa da köşet egıledı. 2025 jylǧa deiın barlyǧy 7,5 myŋnan astam gektar jerge 12 mln. aǧaş otyrǧyzylady.
Nūrsūltan Äbışūly jasyl beldeu endı elımızdıŋ tūrǧyndary üşın qolaily orta bolyp qalyptasuyn tapsyrdy. Endıgı kezekte Elbasynyŋ tapsyrmasyna säikes, jasyl beldeude infraqūrylym damytylyp, tūrǧyndarǧa arnalǧan demalys oryndary salynady,– dedı Altai Kölgınov.
Osy aralyqta Elbasy Nūrsūltan Nazarbaevtyŋ qabyldauynda Altai Kölgınov bır ret (19 tamyz) bolyp, Tūŋǧyş Prezidentpen bırge (7 qyrküiek) Mäskeuge saparlap keldı. 18 qyrküiek künı Tūŋǧyş Prezidentke elorda «jasyl beldeuınıŋ» damu barysy turaly baiandady.
Memleket basşysy Qasym-Jomart Toqaevtyŋ qabyldauynda qala äkımı 2 ret bolyp (18 mausym, 26 şılde), jūmys baǧyty boiynşa naqty tapsyrmalar aldy.
