Alystaǧy aǧaiynǧa arnady
Aqparat jäne qoǧamdyq damu ministrlıgınıŋ qoldauymen Düniejüzı qazaqtary qauymdastyǧy, «Otandastar qory» jäne «Qazaqkonsert» ūiymy bırlesıp, «Turan» etno-folklorlyq ansamblınıŋ qatysuymen şettegı qazaqtarǧa arnap «Ūly dala elınen» atty onlain konsert ötkızdı.
Ūiymdastyruşylardyŋ aituynşa, igılıktı şaranyŋ maqsaty – muzykalyq öner arqyly alysta jürgen aǧaiynǧa ruhani qoldau körsetu jäne şet eldegı qandastarmen bailanysty nyǧaitu.
Onlain konsert barysynda ansambl müşelerı Serık Nūrmoldaev, Maqsat Medeubek, Bauyrjan Bekmūhanbetov, Erjıgıt Äliev, Jantu Dadabaev ūlttyq aspaptardyŋ dybysyn qazırgı zamanǧa sai laiyqtap, babalar mūrasyn jaŋǧyrtyp, ūmyt bola bastaǧan töl aspaptardyŋ süiemeldeuımen «Orteke», «Aqsaq qūlan», «Keruen», «Köroǧly», «Aqqu», «Bürkıt» küilerın tyŋdarmandarǧa şeber jetkıze bıldı. Sonymen bırge önerlı ūjym «Qyran dalam – Tūran dalam», «Qily zaman» sekıldı tuyndylardy oryndady. Būl dünielerden halqymyzdyŋ aŋşylyq, saiatşylyq dästürı körınıs tapsa, kompozitor Aqtoty Raiymqūlovanyŋ «Şabyt» jäne «Abai tolǧauy» atty şyǧarmalary da körermen köŋılın äsem küige böledı. Sondai-aq konsertte Nūr-Sūltan qalasy Astana Ballet teatry men Qazaq ūlttyq horeografiia akademiiasynyŋ ärtısterı de öner körsettı.