Elorda basşysy Baqyt Sūltanov İordaniia astanasy Ammanǧa bardy. Sapar barysynda qala köşelerınıŋ bırıne Astana atauy berıldı. Būl saltanatty şaraǧa elorda äkımımen bırge Ammannyŋ merı Iýsuf äl-Şauariba qatysty.
Astana äkımı B.Sūltanov Qazaqstan Prezidentı Nūrsūltan Nazarbaev pen İordaniia korolı II Abdolla arasyndaǧy dostyq qarym-qatynastyŋ özgelerge ülgı ekendıgın tılge tiek ettı. Sondai-aq ol ammandyqtardyŋ Elbasyǧa degen yqylasy üşın öz alǧysyn bıldırdı. 2010 jyly İordaniia astanasyndaǧy ortalyq köşelerdıŋ bırıne Nūrsūltan Nazarbaevtyŋ esımı berılgen bolatyn.
– Şauariba myrzamen bırge Nūrsūltan Nazarbaev atyndaǧy köşede bolyp, onyŋ damuyn körıp qaittyq. Al endı Qazaqstan astanasynyŋ atymen atalatyn köşenı aşyp otyrmyz. Būl oqiǧa jas Astananyŋ 20 jyldyǧyna tūspa-tūs kelıp otyr. Ol bızdıŋ qalalar men elderdıŋ tūrǧyndary arasyndaǧy qarym-qatynastyŋ nyǧaia tüsuıne jaŋa impuls beretınıne senemın, – dedı elorda äkımı.
Mūnymen qosa osy kezdesu barysynda Astana äkımı men Amman merı ekı eldıŋ aldaǧy uaqyttaǧy yntymaqtastyǧynyŋ äleuetın talqylady. Elorda basşysynyŋ aituynşa, atalmyş ıssapar urbanistikalyq damu salasyndaǧy ekıjaqty yntymaqtastyqty damytuǧa zor mümkındık beredı. Ammanda kölık, kögaldandyru, qūrylys, smart-tehnologiialar, äkımşılık ürdısterdı jeŋıldetu, avtomattandyru, biznes-ortany jaqsartu salalarynda köptegen ırı reformalar men jobalar jüzege asyrylyp jatyr. Astanada da osy baǧyttardaǧy jūmys belsendı jürgızılude. Sondyqtan ekı astananyŋ bır-bırınen üirenerı az bolmasy anyq. Basqosu kezınde B.Sūltanov Amman merıne jyl basynan berı halyqaralyq «Astana» qarjy ortalyǧynyŋ jūmys ıstep jatqanyn da aityp, iordaniialyq biznesmenderdı sonyŋ jūmysyna qatysuǧa şaqyrdy.
Esterıŋızge salsaq, 2012 jyldyŋ qaŋtarynda Astanada İordaniianyŋ būrynǧy Korolı marqūm Husein ben Talaldyŋ qūrmetıne köşe atauy berılgen-dı.
