Aqordada Prezident Qasym-Jomart Toqaevtyŋ qatysuymen AHQO Sotynyŋ jaŋadan taǧaiyndalǧan töraǧasy lord Iаn Bernettıŋ resmi ant beru räsımı öttı. Jiynǧa AHQO Basqaruşysy Renat Bektūrov, AHQO Halyqaralyq arbitraj ortalyǧynyŋ töraǧasy Tomas Kriummel, sondai-aq AHQO Sotynyŋ tırkeuşısı jäne Halyqaralyq arbitraj ortalyǧynyŋ apparat jetekşısı Kristofer Kempbell-Holt qatysty.
Resmi jiynda söz söilegen Memleket basşysy būl instituttyŋ kommersiialyq daulardy şeşude eleulı qyzmet atqaratynyn atap öttı.
«Astana» halyqaralyq qarjy ortalyǧy investorlar senım artatyn maŋyzdy alaŋ sanalady. Osy oraida halyqaralyq standarttarǧa sai täuelsız sot jüiesı bar AHQO Soty negızgı röl atqarady. Qūrmettı lord Bernett, Sızdı osynau jauapty lauazymǧa taǧaiyndaluyŋyzben qūttyqtaimyn. Sızdıŋ kandidaturaŋyzdyŋ taŋdaluy AHQO sot jüiesınıŋ tūraqtylyq jäne senımdılık qaǧidattaryn saqtauǧa beiıl ekenın taǧy da rastaidy» dedı Qasym-Jomart Toqaev.
Sonymen qatar Prezident öz mındetın yjdaǧattylyqpen oryndap, AHQO Sotynda qaralǧan är ıste ädılettılıktı jäne ädıl sot törelıgın qamtamasyz etuge küş salǧany üşın Sottyŋ būrynǧy töraǧasy lord Djonatan Mansqa rizaşylyǧyn bıldırdı.
Jiynnan keiın Memleket basşysy şaraǧa qatysuşylarmen AHQO Sotyn jäne Halyqaralyq arbitraj ortalyǧyn elımızdıŋ investisiialyq tartymdylyǧyn arttyruǧa yqpal etetın negızgı täuelsız instituttar retınde damytu perspektivasyn talqylady. Būdan bölek, Prezident daulardy şeşuge qatysty halyqaralyq qūqyqtyŋ üzdık täjıribesın engızu, sondai-aq zamanaui tehnologiiany, onyŋ ışınde jasandy intellektınıŋ äleuetın belsendı türde paidalanu maŋyzdy ekenın aitty.
