Oŋtüstık Koreianyŋ Phenchhan qalasynda bastalǧan Olimpiada oiyndarynda jeŋımpazdar men jüldegerlerdıŋ qūrmetıne memleket tulary köterılıp, änūrandar şyrqalyp jatyr. Osyndai jürek tebırenterlık quanyşqa Qazaqstan janküierlerı de kenelıp ülgerdı.
Biyl üşınşı ret Olimpiada oiyndaryna sapar şekken fristailşy qyzymyz Iýliia Galyşeva qola jüldeger atandy. Saiypqyran sportşymyzdyŋ osy jeŋısı Qazaqstan tuyn Olimp törınde jelbırettı.
Galyşeva alǧaşqy synnan 75,10 ūpaimen sürınbei öttı. Ekınşı finalda körsetkışın säl jaqsartyp, 76,81 ūpai jinady. Söitıp jüldelı oryndarǧa talasatyn üzdık altylyqtyŋ soŋy bolyp, şeşuşı finalǧa şyqty.
Üşınşı finalda ol jarys jolyn bırınşı bolyp bastady. Aqtyq saiysta 77,40 ūpai alyp, özınıŋ üzdık nätijesın tırkedı. Odan keiın şyqqan bes mogulşynyŋ ekeuı ǧana mūnyŋ aldyn orady. Sonyŋ bırı fransiialyq Perrin Laffon (78,65) altyn alsa, kanadalyq Jiustin Diufur-Lapuant (78,56) kümıstı ielendı.
Osylaişa üzdık üştıktı tüiındegen Iýliia Galyşeva ūlttyq qūramanyŋ enşısıne alǧaş bolyp jülde saldy. Jäne būl – tarihta osy sport türınen Qazaqstannyŋ Olimpiadadaǧy bırınşı medalı.
Saiystan keiın jurnalisterge bergen sūqbatynda sportşy jarysty bırınşı bolyp bastaǧan oŋai emes ekenın, özınen keiıngıler zor şyǧyp, tömen syrǧyp ketem be degen tolqudyŋ bolǧanyn jasyrmady. Ol «törtınşı orynǧa tüsıp qalǧannan görı besınşı bola salǧan äldeqaida jaqsy» dedı.
Sol künı kün raiy aitarlyqtai suyq boldy. Onyŋ üstıne Galyşeva üş apta būryn AQŞ-taǧy jarysta qolyn syndyryp alǧan. Būl turaly şeteldık basylymdar ol qolyn «gipspen» orap şyqqan dep jazdy.
25 jastaǧy mogulşy būǧan deiın ekı Olimpiadaǧa qatysyp, bırınde 11-ınşı, ekınşısınde 7-orynnan körıngen.
Orynbek ÖTEMŪRAT
