Esıktı jüzı qazaqy meiırımge tūnǧan apai aşty. Bızdıŋ ızdep kelgen kısımız osy boldy. Esımı – Aqmaral İdaiatqyzy Qambarova. Jetpıstıŋ jotasyna şyqqan. Qartaidym dep qarap otyrǧan joq. Sergek. Düniedegı barlyq jaŋalyqtan habardar. Keŋes däuırınde «Qūrmettı temırjolşy» belgısın alǧan qazaq qyzdary köp bolmady. Sanauly ǧana bolǧan. Sol sirekterdıŋ bırı. Barlyq ǧūmyryn temır jol salasyna arnaǧan.
Aqmaral apamyzdyŋ äkesı Kökşetaudyŋ ırgesındegı şaǧyn razezde jolşy bolyp eŋbek etıptı. Kışkene ǧana tört-bes üi. Onda tek temırjolşylardyŋ otbasylary qonys tepken. Qys bolsa olar temırjoldy qalyŋ qardan arşidy, jaz mezgılınde aram şöpter men qoqystan tazalaidy. Bala bolsa da sony apamyz kışkentaidan körıp ösedı. Keide äkesıne qolǧabys etedı. Aram şöp jūlysady. Bıraq temırjolşy bolam dep oilaǧan emes. Öskende adam janyn emdeitın därıger bolsam dep armandaidy. Sol maqsatpen Kökşetaudaǧy medisinalyq uchilişege qūjattaryn tapsyryp, oquǧa tüsedı. Ony bır sebeptermen aiaqtai almaidy. Aqyry, arman joly süirelep, temır jolǧa alyp keledı. Alǧaşqy eŋbek jolyn 1963 jyly Qazaq temırjolynyŋ Kökşetau bölımşesınıŋ statistikalyq esep sektorynda operator bolyp bastaidy.
– 1951 jyly äkem qaitys boldy. Anam şiettei üş balamen jesır qaldy. Bar auyrtpalyq sol kısıge tüstı. Aǧam Qairolla eresekteu, qalǧandarymyz kışkentaimyz. Bır-bırımızge öte bauyrmal boldyq. Anamyzǧa söz keltırmeimız. Sabaqty jaqsy oqydyq. Aǧam Novosıbırdıŋ temır jol institutyn bıtırıp, ǧylymǧa bet būrdy, joǧary oqu ornynda sabaq berdı. Al Qaiyrkeldı Almatynyŋ politehnikalyq institutyn bıtırıp, säuletşı atandy. Men alǧaşynda Omby temır jol institutyna tüsıp, keiın tūrmys qūruyma bailanysty Almatyǧa qonys audaryp, sol kezdegı Taşkent temır jol institutyna syrttai auysyp, injener-ekonomist mamandyǧyn aldym, – deidı Aqmaral apa ötken künderden syr qozǧap.
Apamyzdyŋ joldasy Säbit äkemız de temırjol salasynda eŋbek etken. Ekeuı bır-bırın kışkentaidan bılıp, qosylǧan. Jelılık ışkı ıster organynda qyzmet ıstegen aǧamyz jūmys babyna bailanysty Almatyǧa auysady. Aqmaral apamyz da sondaǧy Qazaq temır joly basqarmasynyŋ statistika bölımıne qyzmetke tūrady. Jemıstı jūmys ısteidı. Almaly şahardyŋ ortasynan daŋǧaradai üi alady.
Bıraq keiın elge, tuystarǧa jaqyndaiyq dep 1977 Aqmolaǧa qonys audarady. Bügınde Säbit qariia quatty. Seksenge jaqyndasa da qairatyn bermegen. Er mınezdı, er köŋıldı aqsaqal. Asyl jaryna qamqorlyq tanytyp otyrady.
Bızdıŋ keiıpkerımız Aqmoladaǧy Tyŋ temır jolyna auysqannan keiın alǧaşqy on jyl statistikalyq esep bölımın, keiıngı on jylda auqymdylyǧy artqan statistika jäne taldau qyzmetın jiyrma jyl boiy basqarady. Temırjol salasyndaǧy barlyq dünielerdı esepke alu oŋai jūmys emes. Ol üşın ūqyptylyq pen mūqiiattylyq qajet. Sol kezde Tyŋ temır jolynyŋ basşylyǧynda bolǧan azamattar ünemı Aqmaral İdaiatqyzyn köpke ülgı etıp, maqtan tūtady eken.
– Ol kezde Tyŋ temırjolynyŋ ortalyǧynda qazaq azamattary onşa köp bolmady. Bıraq bız öz ūltymyzǧa söz keltırmeu üşın jan aianbai eŋbek ettık. Barlyq mülıkter men inventarlyq parktı tızımdep, Mäskeudegı Jol qatynastary ministrlıgınıŋ Statistika qyzmetıne jıberemız. Osy qyzmet barysynda talai jaqsylardy kördım, türlı halyqaralyq jiyndarǧa qatystym, bır adamdai qūrmetteldım, – deidı apamyz.
2003 jyldarǧa deiın apamyz Qazaqstan temır joly kompaniiasynyŋ Aqmola tasymaldau bölımınıŋ statistika jäne taldau bölımın basqardy. Sodan qūrmettı zeinetkerlıkke şyǧady.
Ol kısınıŋ temır jol salasynyŋ statistikasyn qalyptastyrudaǧy eŋbegı eren. Talai şäkırt tärbielep şyǧardy. Sol üzdık qyzmetı üşın 1986 jyly ony «Qūrmettı temırjolşy» belgısımen marapattaidy.
Bügınde temırjolşy otbasynyŋ daŋǧyl jolyn balasy Baqyt jemıstı jalǧastyryp jür. Ol qazırgı taŋda Aqmola jük tasymaldau bölımşesı direktorynyŋ orynbasary bolyp qyzmet ısteidı. Öz ortasynda syily. Säbit äkemız men Aqmaral apamyzdyŋ balasyna köŋılı tolyp, soǧan syrttai tıleules bolyp otyrady. İä, ata-anaǧa odan artyq arman bar ma?!
Azamat ESENJOL
