Aqparattyq tehnologiialar qaryştap damyǧan zamanda kıtaphananyŋ ornyn internet, kıtapty kompiuter almastyryp otyrǧany anyq. Osy olqylyqtyŋ ornyn toltyru maqsatynda elordamyzda erekşe joba qolǧa alyndy.
Qoǧamdyq qory «Astana – bılım mekenı» jobasy arqyly ruhani bailyqtyŋ qainarymen susyndatatyn elektrondy kıtaphana jasady. Eŋ qyzyǧy, būl qūndylyqtardy qala tūrǧyndary aialdamalarda avtobus kütıp tūryp-aq oqi alady.
Smartfon arqyly kıtap oqu öte qarapaiym ärı jeŋıl. Mūny telefonyna internet qosylǧan kez kelgen adam qoldana alady. Ol üşın QR kodty skanerleuge arnalǧan mobildı qosymşany paidalanu kerek. Ol R Code Reader dep atalady. Osy qosymşa arqyly oqyrman özı qalaǧan kez kelgen tuyndyny ūialy telefonǧa jüktep, qalaǧan kıtabyn oqyp, audio nūsqasyn tyŋdai alady. Bügınde qalamyz boiynşa 27 aialdamaǧa onlain kıtaptar taqtasy ornatylyp jatyr. Alǧaşqy qondyrǧy «Han Şatyr» maŋyndaǧy aialdamada tūr. Onda köpşılıkke älem jäne qazaq klassikterınıŋ 150 şyǧarmasy ūsynylǧan. Aldaǧy uaqytta sandyq formatta 10 myŋ kıtaby bar qordy 150 myŋǧa jetkızu közdelıp otyr. Äsırese, mektep, emhana siiaqty halyq köp şoǧyrlanatyn oryndarǧa qoiudy josparlaǧan elektrondy kıtaphanada Abai Qūnanbaev, Mūhtar Äuezov, Şäkärım Qūdaiberdıūly bastaǧan qazaq ädebietınıŋ klassikterı men bırge aqiyq aqyn Mūqaǧalidan bastalǧan poeziia jauharlarynyŋ kıtaptary bar.
Nartai Äşım, Wiki bilim qoǧamdyq qorynyŋ qūryltaişysy:
– Elbasymyz aitqandai, ruhani jaŋǧyrudyŋ bırden-bır negızı – aqyldy, bılımdı adamdardyŋ qalyptasuy. Elımızdıŋ mädeni mūrasy sanalatyn osy oqulyqtardyŋ qoljetımdı boluyn qamtamasyz etu – bızdıŋ mındetımız. Būl bastamamyz adamdardyŋ ruhani damuyna, jas buynnyŋ qalyptasuyna äser etedı dep oilaimyz. Bızdıŋ negızgı ideiamyz da – sol. Aldaǧy uaqytta är köşenıŋ atauyna bailanysty taqyryptyq kıtaphana ornatamyz dep josparlap otyrmyz. Mäselen, Abai köşesıne Abaidyŋ bükıl düniesın, Äuezov köşesıne Mūhtar Äuezovtıŋ barlyq şyǧarmalaryn toptaimyz. Būl da oqyrmandarymyz üşın erekşe ülgı bolar edı.
Örkeniettı elderdıŋ denı bügınde kıtap oquǧa degen ynta-yqylasty arttyrudyŋ türlı amaldaryn jasauda. Osy tūrǧydan alǧanda da būl jobanyŋ maŋyzy basym,bäsı artyq. Ūiymdastyruşylardyŋ aituynşa, qazaq ädebietı men älem ädebietterınen tūratyn kıtap älemıne qazırgı zamannyŋ da aqyn-jazuşylarynyŋ şyǧarmalary engızılmek.
Güljan RAHMAN
