Būl surettıŋ tarihy qyzyq. Elımız egemendık alǧan alǧaşqy jyldary İspaniiada Qazaqstan elşılıgı aşylǧan joq. Sondyqtan ekı memleket arasyndaǧy sauda jäne ekonomikalyq bailanysty nyǧaitu, aradaǧy qarym-qatynasty jaqsartu maqsatynda Prezident 1996 jyly Ükımet basşysynyŋ orynbasary qyzmetınde jürgen Jänıbek Kärıbjanovty İspaniiaǧa jıberedı. Endı Jänıbek aǧany tyŋdaiyq.
«Bızdıŋ delegasiiany osy eldıŋ premer-ministrı Hose Mariia Asnar qabyldady. Kezdesu barysynda ekı el arasyndaǧy qatynasty küşeitu, elşılık aşu, «Talgo» jürdek poiyzy men energetika mäselelerı söz boldy. Ol kısı bızdıŋ ūsynystarymyzǧa jyly şyrai tanytty. Qoştasarda men oǧan sol jyly elımızde jüz elu jyldyq torqaly toiy atap ötılgen Jambyl babamyzdyŋ beinesı bederlengen şaǧyn kılemdı syiladym. « Būl – qazaqtyŋ jasy jüzge kelgen alyp aqyny. Sızge osy atamyzdyŋ jasyn bersın!» dep tılegımdı aittym. Būl lebızdı estıgende, alǧaşynda bızben salqyn söilesıp otyrǧan premer-ministrdıŋ mınezı kılt özgerıp, köŋıldenıp şyǧa keldı. Öitkenı ispandyqtarda adamǧa aldymen «jasyŋyz ūzaq bolsyn!» dep tılek aitady eken. Hose Mariia Asnardyŋ özı alty tılde erkın söilep, poeziiany süiıp oqidy. Maǧan aituly tūlǧanyŋ bır kıtabyn salyp jıberşı dep ötınış aitty. Keiın elge kelgennen keiın ol kısıge atamyzdyŋ bır jyr jinaǧyn salyp jıberdım. Odan maǧan «raqmet» aitqan jauap hat keldı. Söitıp, bızdı alys İspaniiada aqynnyŋ ruhy qoldady» deidı belgılı memleket jäne qoǧam qairatkerı.
