Ärbır äreketı – baqylauda
«Elorda aqparat» mediaresursy men «Astana» radiosynyŋ bırlesken jobasy – «Elorda tynysy» radiohabarynyŋ kezektı şyǧarylymyndaǧy sūhbat Etikalyq kodeks pen memlekettık qyzmetşınıŋ mınez-qūlyq normalary taqyrybynda örbıdı. Studiia meimany Astana qalasy äkımı apparaty basşysynyŋ orynbasary, etika jönındegı uäkılettı ökılı İmin Sabirov tıkelei efirdegı sūhbat barysynda memlekettık qyzmetşılerge azamattar tarapynan tüsetın şaǧymdar jaily äŋgımeledı.
– Özderın qanaǧattandyrmaǧan jaǧdailar turaly aitudan tartynbaityn azamattardan aryz-şaǧymdar köp tüsedı. Solardyŋ ışınde byltyrǧy 16 şaǧym men biylǧy bırneşe ötınış esımde erekşe saqtalyp qalypty. Şaǧymda köterılgen mäseleler ärtürlı. Sonyŋ ışınde jūmys ornyndaǧy tärtıpsızdık te bar. Qalalyqtardyŋ bırı Tūrǧyn üi basqarmasyna şaǧymdanǧan kez de boldy. Bız būl mäselenı qarastyrǧanda basqarma basşysy etikalyq normalardy būzǧan memlekettık qyzmetşımen bırge şaqyryldy. Şaǧymdanuşy memlekettık qyzmetşınıŋ jūmys üstelınde buterbrod tūrǧanyn jaqtyrmaǧan tärızdı. Sol üşın bızge şaǧym tüsırgen. Olar tıptı osyndai jaǧdaiǧa da nazar audarady, – deidı İmin Sabirov.
Onyŋ aituynşa, qaralǧan mäselelerdıŋ eŋ kürdelısı Qazaqstan halqy Assambleiasy etnomädeni bırlestıkterı töraǧalarynyŋ äkımdık qūrylymdyq bırlestıgınıŋ jetekşısıne şaǧymdanǧan kezı bolypty.
– Assambleiaǧa qarasty 17 etnomädeni bırlestıktıŋ töraǧasy äkımdıktıŋ qūrylymdyq bırlestık jetekşısınıŋ üstınen onyŋ ädepsızdık tanytyp, onymen qoimai özıne jüktelgen mındettı tiısınşe oryndamaǧany üşın şaǧym tüsırıptı. Būl derek boiynşa Prezident Äkımşılıgı qyzmetkerlerınıŋ qatysuymen tört otyrys ötkızdık. Būl ötınış öte mūqiiat qaraldy. Nätijesınde qala basşylyǧyna sol direktordy jūmystan bosatuǧa ūsynys jıberıldı, – deidı İ.Sabirov.
Etika jönındegı uäkılettı ökıl sonymen qatar memlekettık organdardyŋ lauazymdy tūlǧalaryna, sondai-aq kvazimemlekettık käsıporyn basşysyna da ūjymdyq şaǧymdardyŋ tüskenın atap öttı.
– Audan äkımdıgınde jergılıktı atqaruşy organnyŋ apparat basşysy lauazymyndaǧy tūlǧanyŋ üstınen de şaǧymdandy. Sodan apparat basşysy söilesuge şaqyrylyp, būl turaly äkımge aqparat berıldı. Bıraq būdan keiın ol qyzmetker jūmystan bosatyldy, – degen etika jönındegı uäkılettı ökıl, – taǧy bırde ädepsızdık körsetkenı turaly äkımdıkke qaraityn käsıporyn, iaǧni kvazimemlekettık sektordyŋ basşysyna ūjymdyq şaǧym kelıp tüstı. Ol qyzmet körsetude erekşe jeŋıldıkter sūrap, talaby oryndalmaǧan kezde qyzmetın asyra paidalanbaq bolypty. Etika jönındegı uäkılet būl ıske qatysty şeşımdı tek zaŋǧa säikes, ony jazalau kerektıgı jönınde memlekettık organǧa ūsynys jasady. Bıluımşe, ol jazasyn aldy da, – deidı.
Etika jönındegı uäkılettı ökıl söz soŋynda azamattardyŋ memlekettık qyzmetşılerdıŋ terıs äreketın baiqaǧan jaǧdaida belsendılık tanytyp, oǧan jügınuge bolatynyn aitty.