Keşe Täuelsızdık saraiynda Astana äkımınıŋ orynbasary Ermek Amanşaev elordalyq Ardagerler keŋesınıŋ belsendı müşelerımen kezdestı. Jaŋa jyl aldyndaǧy jüzdesu bolǧandyqtan, qariialarǧa äkımdık tarapynan syilyqtar ülestırıldı.
Qalanyŋ Jūmyspen qamtu, eŋbek jäne äleumettık qorǧau basqarmasynyŋ basşysy Ermek Ospanov, bırqatar basqarmalar basşylarynyŋ orynbasarlary qatysqan jiynda qarttardy tolǧandyratyn maŋyzdy mäseleler köterılıp, ūsynystar aityldy.
Būl künderı elordada 67 myŋnan astam zeinetker tūryp jatyr. Olardyŋ 186-sy Ūly Otan soǧysynyŋ ardagerlerı bolsa, 4 myŋnan astamy – tyl eŋbekkerlerı. Qarttarǧa degen qamqorlyq – memlekettıŋ basty ūstanymdarynyŋ bırı ekendıgın aitqan qala äkımınıŋ orynbasary, mūny qala bilıgı de aldyŋǧy orynǧa şyǧaryp otyrǧandyǧyn jetkızdı. Atap aitsaq, elordada tūratyn Ūly Otan soǧysynyŋ qatysuşylary men mügedekterı 100 paiyzǧa baspanamen qamtyldy. Mäselen, 2009-2015 jyldar aralyǧynda olarǧa 228 päter berıldı. Jyl saiyn osy sanatqa jatqyzylatyn qariialar şipajailarda emdelu üşın tegın joldamalar, sondai-aq, aqysyz negızde därı-därmek, medisinalyq jäne mındettı tazalyq qūraldary ülestırıledı. Ūly Otan soǧysynyŋ ardagerlerı tūrǧyn üi järdemaqysymen de qamtamasyz etılgen.
– Biyl eldıgımızdı asqaqtatatyn bırneşe maŋyzdy mereitoilardy atap öttık. Sonyŋ ışınde Ūly Jeŋıstıŋ 70 jyldyǧy bar. Sızder būǧan ölşeusız üles qostyŋyzdar. Qazaqta «qariiasy bar eldıŋ – qazynasy bar» degen söz aitylady. Sızderdıŋ ömır joldaryŋyz, etken eŋbekterıŋız – ärqaisysymyzǧa ülgı. Memleketımız ben qalamyzdy körkeiuı üşın aianbai eŋbek ettıŋızder. Ortamyzda älı de soǧan üles qosyp kele jatqan adamdar otyr. Sondyqtan sızdermen kezdesıp, aqyldasyp otyru bızdıŋ mındetımız dep sanaimyz. Kelesı jyly täuelsızdıgımızdıŋ 25 jyldyǧyn atap ötemız. Osy jyldary atqarylǧan jūmys, menıŋ oiymşa, 25 ǧasyrǧa tatidy. Mūnyŋ bärıne Ūlt köşbasşysy deŋgeiıne jetken Elbasy Nūrsūltan Nazarbaev jürgızıp otyrǧan sarabdal saiasattyŋ arqasynda qol jetkızdık, – degen E.Amanşaev bas qalamyz – Astananyŋ da avtory Memleket basşysy ekenın eske saldy.
Elbasynyŋ taiauda aitqan «memleket öz moinyna alǧan äleumettık mındettemelerdı oryndaudan bas tartpaidy» degen sözın jaŋǧyrtqan qala äkımınıŋ orynbasary bas şahardyŋ biudjetı de soǧan sai jasalǧanyn, iaǧni, äleumettık qoldauǧa baǧyttalatyn qarjy qysqartylmaitynyn jetkızdı.
Onyŋ sözın Ermek Ospanov bekıte tüstı. «Qalada tek zeinetkerler ǧana emes, äleumettık osal toptarǧa jatqyzylatyn adamdar da äleumettık qoldauǧa ie. Zeinetkerlerdı jäne osy toptaǧylardy qosqanda jalpy alǧanda 90 myŋ adam bolady. Olardyŋ barlyǧy da memleket tarapynan körsetıletın qamqorlyqtan qaǧylmaidy» dedı ol.
Qarttarǧa kezek tigende, olar özderın tolǧandyryp jürgen mäselelerdı jasyrmady. «Ädılet» tūtynuşylar qūqyǧyn qorǧau qoǧamdyq bırlestıgınıŋ töraǧasy Qabyken Zakariianov kelesı jyldan bastap 10-15 paiyzǧa ösuı mümkın kommunaldyq tarifterge, qyzmet körsetu oryndarynyŋ mädenietıne, därı-därmekpen qamtasyz etu jaiyna nazar audardy. Būl sūraqtardyŋ bärıne jauap bergen E.Amanşaev därı-därmek jaiy qala äkımınıŋ qataŋ baqylauynda tūrǧanyn jetkızdı.
Faina Şkurko kommunaldyq qyzmetterdıŋ jūmysyna şaǧymdandy. Qali Mūqataev deitın aqsaqal jastarǧa patriottyq tärbie beru mäselesın köterdı. Ardager jurnalist Meiram Baiǧazin biyl ǧasyrlyq mereitoilary atap ötılgen qoǧam qairatkerı Jūmabek Täşenovtı, jazuşy Iliias Esenberlindı, tarihşy Ermūhan Bekmahanovty eske alyp, ūlttyŋ olardyŋ aldyndaǧy paryz ben qaryz jaiyn qozǧady. Qairolla Jalmūqanovtyŋ qozǧaǧan mäselelerdıŋ bırı oquşylardy mektepte tamaqtandyru turaly boldy. Osy sūraqtardyŋ bärıne tiıstı jauap bergen E.Amanşaev aryz-şaǧymdarǧa bailanysty ardagerlerdıŋ är ai saiyn bır-bır mekeme basşylarymen kezdesulerın ūiymdastyrudy ūsyndy.
Amanǧali QALJANOV
