Aida BAIMAQOVA, «Jaujürek polk» keŋesınıŋ koordinatory:
– 9 mamyr künı Astanada «Jaujürek polk» şeruın ūiymdastyryp jatyr ekensızder. Osy şaranyŋ maqsat-mındetterı turaly
aityp berseŋız…
– Astana qalasy Işkı saiasat basqarmasynyŋ qoldauymen elordamyzda Ekınşı düniejüzılık soǧys ardagerlerı ūrpaqtarynyŋ qatysuymen «Jaujürek polk Astana – älemdık marş» atty şeru ötedı. «Jaujürek polk» jalpyhalyqtyq azamattyq bastamasy 2012 jyly qūrylǧan bolatyn. Qozǧalystyŋ negızgı maqsaty – maidanda soǧysqan ardagerlerdıŋ erlıgın esten şyǧarmai, jas ūrpaqqa nasihattau. Al Astana qalasyndaǧy «Jaujürek polk» keŋesı 2014 jyly qūrylǧan bolatyn. Onyŋ qūramyna erıktılerden bastap, ardagerlerge qūrmet körsetuge qūştar elımızdıŋ ärbır belsendı azamattary müşe bola alady. Mäselen, 2015 jyly Astana qalasynda ötken Jeŋıstıŋ 70 jyldyǧyna arnalǧan şeruge 1500 adam qatysqan bolatyn. Al 2016 jyly elordadaǧy «Jaujürek polkıne»
7 myŋnan asa adam qatysty. Polktyŋ jūmysy arnaiy jarǧymen rettelgen.
– Jarǧy demekşı, būl şaraǧa kez kelgen adam qatysa ala ma?
– Ärine, «Jaujürek polk» şeruıne kez kelgen adam qatysa alady. Şeruge qatysu üşın aldyn ala tırkelu nemese kıru biletterı kerek emes. Alaida «Jaujürek polk» marşyna qatysuşylarǧa şeru alaŋyn jarnama retınde paidalanuǧa jäne transparanttarda kez kelgen saiasi, korporativtık ne basqa da simvoldardy jariialauǧa tyiym salynady. Şaraǧa qatysuşylardyŋ nazaryna: transparanttar üşın bırdei standarttar daiyndaldy. Mäselen, jauyngerdıŋ suretı qoiylǧan nemese aty-jönı jazylǧan transparantta qazaqstandyq Jeŋıs lentasy, Otan soǧysynyŋ ordenı, qazaq jäne orys tılınde «Jaujürek polk Astana» degen jazudan, polktyŋ logotipınen basqa simvol bolmauy kerek. Eger de maidangerdıŋ suretı bolmasa, aty-jönı, qyzmettık lauazymy jazylǧan plakat jasauǧa bolady.
– Şeru qai jerden bastalyp, qai jerden aiaqtalady?
– Şeru «Qazaq elı» monumentınen bastalyp, «Otan qorǧauşylar» memorialynda aiaqtalady. Biyl «Jaujürek polk» marşynyŋ joly 2,5 şaqyrymdy qūraidy, jalpy jürıp ötetın jol 3,6 şaqyrym bolady. «Qazaq elı» monumentınıŋ janynda saǧat 12.00-de jinalyp, saǧat 13.00-de şeru bastalady. Marşruttyŋ ūzyndyǧy 3,6 km bolǧandyqtan, şeru ötetın künı barlyq qatysuşylarǧa aua raiyn eskere otyryp, qolaily aiaq kiım kiiuge jäne aldyn ala gül men su aluǧa keŋes beremız.
Serık JOLDASBAI
