Özderınıŋ bos uaqytyn önerge arnaǧan Almaty audany ardagerlerınıŋ qos öner ūjymy Kenjetai Janūzaqova jetekşılık etetın «Arqa äuenderı» atty halyqtyq ansamblı men Ümıt Düisenova basqaratyn «Elorda» halyqtyq hory jaqynda önersüier qauymǧa ülken konsert berdı.
«Arqa äuenderı» ansamblınıŋ konsertı Almaty audanyna qarasty «Belsendı ūzaq ömır süru ortalyǧy» ǧimaratynyŋ zalynda, al «Elorda» horynyŋ konsertı L.Gumilev atyndaǧy Euraziia universitetınıŋ konserttık zalynda öttı. Astana qalasynyŋ körermenderınıŋ közaiymyna ainalǧan būl öner kollektivterı özderınıŋ osyndai ūlaǧatty ıs-şaralaryn aldymyzda bolatyn Prezidenttık sailauǧa arnady.
Bügıngı taŋda elımız kürdelı kezeŋdı basynan ötkızıp jatqan şaqta, Qazaqstan halqyn jarqyn bolaşaqqa jeteleitın el Prezidentın taŋdau nauqanyna aralasyp, öner tılımen halyqty sailauǧa jūmyldyrudy ardagerler özderınıŋ azamattyq paryzy dep esepteidı. Ärdaiym ardagerler kollektivterınıŋ qasynan tabylatyn Almaty audandyq Ardagerler keŋesınıŋ töraǧasy M.Mūstafin Prezidenttıkke ümıtker Qasym-Jomart Toqaevtyŋ senımdı ökılı retınde konserttı tamaşalauǧa kelgen jūrtşylyqty sailauǧa belsendı qatysuǧa şaqyrdy. Ol öz sözınde: – «Sailau dodasyna tüsken ärbır ümıtker özın Prezidentke laiyqpyn dep esepteidı. Ol – zaŋdy da, bıraq Prezident saiasatker, älemdık saiasi ekonomikalyq qūbylystardan paidaly şeşımderdı şyǧara alatyn, el ekonomikasyn qaryştap damytyp, äleumettık salanyŋ tūraqtanuyna jol aşa alatyn, jastarymyzdyŋ jan-jaqty örkendeuıne jaǧdai jasai alatyn tūlǧa boluy qajet.
Tılek önerdı özderınıŋ hobbiıne ainaldyrǧan ardagerlerdıŋ naqyşyna salyp oryndap jatqan än äuenı men kümbırlegen dombyra ünımen jalǧasyn tapty. Halyqtyq ataǧy bar ekı kollektivke öner dese ışken asyn jerge qoiatyn egde jasty eŋsergen aqsaqaldar men äjeler toptasypty. Özderı rejisser, özderı dirijer bolyp, sahna törınde erkın qalyqtaǧan qarttarymyzdyŋ tamyljyta salǧan änderı, muzykalyq aspaptarmen qūiqyljyta tökken küilerı zalda otyrǧan halyqty bır serpıltıp tastady.
«Arqa äuenderı» ansamblınıŋ jetekşısı Kenjetai Erǧaliqyzy: – «Qūrylǧanymyzǧa toǧyz jyl bolǧan ūjymyzǧa kelıp qosylǧandar köp, bügıngı taŋda sanymyz 23-ke jetıp otyr. Bärı – önerlı, bırı – änşı, bırı – küişı. Repertuarymyzda 50-ge tarta halyq änderı men qazaq kompozitorlarynyŋ tuyndylary bar. Bır-bırımızge kömekşı bolyp, än oryndau mänerın, sahnalyq mädeniettı boiymyzǧa sıŋırıp jatqan jaiymyz bar» dep aǧynan jaryldy. Konsert boiy iyǧynan syrnaiy (baiany) tüspegen, retıne qarai dombyramen küilerdı tögıltken Temıreş Kereev aqsaqal bükıl nömırlerdıŋ süiemeldeuşısı boldy. Batys Qazaqstannan köşıp kelgen, sol jaqta muzykalyq uchilişe jäne universitetın tämamdaǧan öner tarlany, qartaiǧan şaqta sol önerın jalǧastyryp jatqan jaiy eken.
«Elorda» halyqtyq horyna toptasqan ardagerler de Astanaǧa elımızdıŋ tükpır-tükkırınen köşıp kelgen, önerdı özınıŋ ömırlık ūstanymy dep bılgen abzal jandar eken. Ekı türlı sahnalyq kostiumderdı öz qarajattaryna tıgıp alǧan äjeler men atalar sahna törıne jarqyrai şyqty. Osyndai mändı de, sändı konserttı ūiymdastyryp, halyq aldyna şyǧaru – ülken eŋbektıŋ jemısı. Būl tūsta horǧa jetekşılık etudı öz moinyna alǧan Ümıt Älıbekqyzyna aitar alǧysymyz şeksız. Al bükıl konserttık baǧdarlamany tyŋǧylyqty daiyndap, sahnaǧa ädemılep şyǧara bılu – körkemdık jetekşınıŋ ülesı. Būl jūmysty QR Mädeniet salasynyŋ üzdıgı Jeken Tebırekov bar ynta-jıgerımen oryndap şyqty. Sahna mädenietınıŋ bır qyry – konserttı jürgızu. Būl tūsta Ümıt Hametovaǧa aitar alǧysymyz mol.
Manap ÄDIREŞEV,
Almaty audany Ardagerler keŋesınıŋ müşesı
