Halqymyzdyŋ basynan türlı zobalaŋdar öttı. Keşegı ötken ǧasyrdyŋ otyzynşy jyldardaǧy quǧyn-sürgın talai arystarymyzdy jalmady. Būl auyrtpalyq bızdıŋ äulettı de ainalyp ötpedı.
Ol zamanda bızdıŋ Taitöbe bılım ordasy Aqmola audanyndaǧy jalǧyz mektep-internat boldy. Sol mektepte Töleubek aǧam menen ekı synyp joǧary oqydy. Dombyramen än aitatyn önerı bar edı. Qoǧamdyq jūmystarǧa da belsene aralasatyn. Onyŋ äkesı Hakım Ahmetjanov elge belgılı azamat bolǧan. Oǧan otyz jetınşı jyldary «baidyŋ tuysy, Säken Seifullinnıŋ jinalysyna barypty» degen jala jabylyp, türmege qamalady. Ol kez – dauylpaz aqyn Säkennıŋ ūstalǧan şaǧy.
Töleubek aǧamyz 1937 jyly Eŋbekşı auylynda ömırge kelgen. Sol jerde Hakım äkemız ūstazdyq qyzmet atqarǧan. Keiın ol ūstalyp ketkennen keiın barlyq jaqyndary Aqmolaǧa köşıp keldı. Äkemızdıŋ poiyzda aidalyp bara jatqanda jazǧan haty bır jarym jyl jürıp zorǧa qolǧa tiedı. Ol 1940 jyl edı. Onda: «Mūz dariiasyna qarai bettep baramyz. Ornalasqan soŋ habarlasamyn» dep jazypty. Bıraq sodan keiın eş habar bolmady. 1953 jyly Säken Seifullin sekıldı qairatkerler aqtalǧanda da, jaqsy jaŋalyq estılmedı. Hakım äkemızdıŋ anasy Altyn äjemız balasyn öldıge sanamai, közı tırı dep dünieden ozdy. Keiın asyl azamattyŋ jary Äbi anamyz qyzdaryn tūrmysqa ūzatty. Tek ūlynyŋ şaŋyraq kötergen qyzyǧyn köre almady.
Töleubek aǧam Taitöbedegı
on jyldyq mekteptı bıtırıp, Almatydaǧy auylşaruaşylyq institutyna oquǧa tüsedı. Ony oidaǧydai tämamdaǧannan keiın qazırgı Selinograd audanynyŋ ortalyǧy, būrynǧy Aqmola sovhozyna jūmysqa ornalasady. Odan keiın Astrahan audanynda eŋbek etedı. 1970 jyldary Aqmoladaǧy auylşaruaşylyq ekonomikasyn josparlau ǧylymi-zertteu institutyna qyzmetke ornalasady. Ǧylym jolyna tüsedı. Ekonomika salasynan kandidattyq dissertasiia qorǧaidy. Sodan soŋ ūzaq jyldar ūstazdyq joldy maqsat tūtyp, S.Seifullin atyndaǧy Agrotehnikalyq universitetınde studentterge därıs oqidy.
Biyl Töleubek Hakımūly közı tırı bolsa, seksenge tolar edı. Amal ne, «Jazmyştan ozmyş joq» degen. Äiteuır, äkesınıŋ ömır jolyn jalǧap, eldıŋ ardaqty azamaty boldy. Köŋılge sol jūbanyş!
Rauşan JÜNIS,
zeinetker
