Än älemınıŋ aituly änşısıne ainalyp kele jatqan Dimaş Qūdaibergennıŋ Astanadaǧy «Arnau» atty konsertı 29 mausymda ötetın bolyp belgılendı.
Konsert ötetın uaqyttyŋ naqtylanǧany turaly änşınıŋ özı de jeke paraqşasynda habarlap, qoldauşylaryna «Kün belgılendı! Būl eŋ üzdık şou bolmaq. Bilet satylymy turaly keiınırek habarlaimyz. Qazaqstanda 29 mausymda körıskenşe!» dep lebız qaldyrdy.
Būdan būryn OKQ-da ötken baspasöz mäslihatynda «Qazaqstan» RTRK AQ töraǧasy Erlan Qarin Jastar jyly aiasynda talantty jastardy qoldau maqsatynda Dimaş Qūdaibergennıŋ konserttık keşın ötkızu josparlanǧanyn aitqan edı. Onyŋ aituynşa, Dimaştyŋ Astanadaǧy konsertınde älemdık şoulardaǧy tehnologiialar paidalanylady. 4-5 bölımnen tūratyn konsertte qazaqtyŋ halyq änderı, qazaqstandyq jäne şeteldık kompozitorlardyŋ şyǧarmalarymen qatar, zamanaui ärleumen oryndalǧan Dimaştyŋ avtorlyq tuyndylary ūsynylady dep josparlanǧan. Konsertte qazaq, aǧylşyn, fransuz, qytai, orys, italian tılderınde änder şyrqalady.
Konserttıŋ bilet baǧasy naqty qanşa bolatyny älı belgısız. Mädeniet jäne sport ministrı Arystanbek Mūhamediūlynyŋ aituynşa, bilet baǧasy tym qymbat bolmaityn körınedı. «Basty maqsat biletten tüsetın qarjy emes. Ärine, şetelde ötetın konsertterde bız eŋ bırınşı osyǧan män beremız. Al Qazaqstanda basty mındet – köpşılıkke qoljetımdı boluy. Bilet baǧasy 500 teŋgeden bastalady dep oilaimyn» dedı ministr vedomstvo alqasynyŋ keŋeitılgen otyrysynda. Konsertte mektep oquşylary men äleumettık az qamtylǧan halyq sanatyna arnaiy oryndar da qarastyrylady eken.
Esterıŋızge sala keteiık, Dimaş Qūdaibergen qazır AQŞ-taǧy «The World’s Best» baiqauyna qatysyp jatyr. Sonymen qatar änşı 22 nauryzda Mäskeudegı Kreml saraiynda alǧaşqy konsertın qoiady.
Qaliakbar ÜSEMHANŪLY
