Bügın «Jastar» teatrynda körnektı teatr synşysy, Qazaqstannyŋ eŋbek sıŋırgen öner qairatkerı, Memlekettık syilyqtyŋ iegerı Äşırbek Syǧaidyŋ tuǧanyna 70 jyl toluyna arnalǧan Qazaqstan drama teatrlary XXV respublikalyq festivalınıŋ şymyldyǧy türıledı. 13 qyrküiekke deiın jalǧasatyn şarany QR Mädeniet jäne sport ministrlıgı men Qazaqstan teatrlar assosiasiiasy «EKSPO-2017» halyqaralyq mamandandyrylǧan körmesı aiasynda ūiymdastyryp otyr.
Festivaldıŋ negızgı maqsaty – bar ǧūmyryn teatr önerıne arnaǧan sarabdal synşy, bıregei teatr qairatkerınıŋ şyǧarmaşylyǧyn köpşılıkke därıpteu, soŋyna qaldyrǧan mūrasyn jaŋǧyrtu, esımın el esınde mäŋgı qaldyru bolyp otyr.
Sondai-aq, onyŋ barysynda Qazaqstandaǧy teatr önerınıŋ bügıngı damu baǧyttary men körkemdık kelbetın zerdelep, özara şyǧarmaşylyq qarym-qatynasty odan ärı nyǧaitu, teatr önerındegı sabaqtastyqty saqtap, jaŋaşyldyq ürdısterdı damytu, daryndy akterler men rejisserlerge qoldau körsetu közdelude.
Ǧ.Müsırepov atyndaǧy qazaq Memlekettık akademiialyq balalar men jasöspırımder teatry, Atyrau oblystyq Mahambet atyndaǧy qazaq drama teatry, Respublikalyq akademiialyq nemıs drama teatry, Q.Quanyşbaev atyndaǧy Memlekettık akademiialyq qazaq muzykalyq drama teatry, Aqmola oblystyq orys drama teatry, Astanadaǧy «Jastar» teatry, Şyǧys Qazaqstan oblysynyŋ «Dariǧa-ai» jastar teatry men «Jas sahna» teatrlary qatysady.
Astana qalasynyŋ tūrǧyndary men qonaqtary festival spektaklderın Q.Quanyşbaev atyndaǧy Memlekettık akademiialyq qazaq muzykalyq drama teatry, «Qazaqstan» ortalyq konsert zaly jäne «Jastar» teatry sahnalarynan tegın tamaşalai alady.
Amanǧali QALJANOV
