Būl dodada jyl saiyn myŋdaǧan balǧyndar baq synaidy. Bäsekelesedı. Tolqidy. Sürınedı. Qanattanady. Alǧa ūmtylady. «Aialaǧan Astana» baiqauynyŋ biylǧy qatysuşylary da sol soqpaqtan öttı. Myqtylary finalda kezdestı. On ekı bala. Bärın bırıktırgen bır arman bar. Ol – jeŋımpaz atanu. Osy jolda kezdeser eşqandai kedergıden taisalmaidy. Qaisarlyqtaryn jalt-jūlt etken közderınen köresıŋ. Üş künge sozylǧan saiystyŋ basy-qasynda jürıp, bız osyny aŋǧardyq.
Jobanyŋ ırıkteu kezeŋderı nauryz aiynda bastalǧan. Qazylar alqasy on tört oblys ortalyǧy men Astana, Almaty qalalarynda bolyp, eŋ daryndy örenderdı taŋdaǧan-dy. Nätijesınde aqtaulyq Jomart Maratov, Nūrbolat Nauryzbek, Karina Şaigözova, öskemendık Aijan Däukenova, aqtöbelık Aqmerei Täŋırbergenova, atyraulyq Altynai Qadyrbekova, almatylyq Daneliia Töleşova, qyzyljarlyq Dina Diiarat, qyzylordalyq Kämila Bolatbek, kökşetaulyq Ädılhan Mahambetov, şymkenttık Bolat Sadraddin jäne elordalyq Ajar Järdenbek jarystyŋ märesıne joldama aldy. Būl balalar 7 mausymnan berı Astanada jür. Bır ai boiy otandyq estrada jūldyzdarymen bırge qyzu daiyndalypty. Sahna saŋlaqtarynyŋ ärqaisysy – bır-bır balanyŋ tälımgerı. Olar jas önerpazdarǧa qoldau körsetıp qana qoimai, saiystyŋ ekınşı künı «Jūldyzben duet» şouyna da qatysty. Tälımgerlerdıŋ arasynda Janar Dūǧalova, Aiqyn, Adam, Möldır Äuelbekova, Änel Arynova, Qairat Tüntekov, Serık İbragimov, Qairat Baekenov, Rüstem Jügınısov pen «The jigits», «RinGo» toptary bar.
«Sondai-aq finalisterımız osy baiqaudyŋ bas prodiuserı Lina Arifullinanyŋ mektebınde vokal, horeografiia, sahnalyq şeberlık boiynşa sabaqtarǧa qatysyp, äjeptäuır täjıribe jinaqtady» deidı jobanyŋ ūiymdastyruşysy Gülsairan Esenova.
Daiyndyqpen qatar, saiyskerler Astanany aralap, qalanyŋ körıktı jerlerımen tanysyp ülgerıptı.
Köpten kütken final da bastaldy sonymen. Oquşylar saraiynda ötken konserttı «Qazaqstan» ūlttyq arnasy tıkelei efirde körsettı. Öner körsetıp bolǧan büldırşınder sahnadaǧy jaittardy bylai şyǧa bere qyzu talqylasyp jatyr:
– Aqmerei, kiımıŋ bylǧanyp qalypty…
– İä-ä-ä… Jürgızuşı aǧa balyq ūstaǧan qolymen menı köterıp edı…
Tompaq qyz jeidesın qaqqyştap, tomsyraiyp tūr. Janyna jaqyndadym.
– Sälem, Aqmerei! Qai jaqtan keldıŋ?
– Aqtöbe oblysynyŋ Şalqar qalasynan… Sondaǧy №5 mekteptıŋ 5-synybyn bıtırdım.
Aqmerei būǧan deiın de bırneşe bäigege qatysyp, jülde alyp jürgen qyz eken. Respublikalyq «Menıŋ Qazaqstanym», «Aq kögerşın» än baiqaularynyŋ jeŋımpazy bolypty.
– Sahnaǧa boiyŋ üirengen şyǧar? Köpşılık aldyna şyqqanda jüreksınbedıŋ be?
– Baǧana mikrofon sönıp qaldy. Säl sasqalaqtap qaldym. Ondai kezdeisoqtyqtarǧa üirenu kerek bıraq, – dep jymidy.
Känıgı ärtısterşe söileidı. Sahnaǧa töselgenı körınıp tūr. Jalpy, sondaǧy bar balanyŋ boiynan bız erekşe elgezektıktı, alǧyrlyqty baiqadyq. Qymsynyp, imenıp tūrǧanyn tappaisyŋ. Şetterınen qaǧılez, aşyq. Öner körsetıp bolǧan soŋ, grim bölmesıne baryp, bır-bırımen aqyldasady, qazylar alqasy bergen ūpailaryn salystyrady. Bıreuı änın dūrys aitpai jatsa, orta jolda toqtatyp, «bylai ait» dep, tüzep jıberedı. Kıp-kışkentai önerpazdardyŋ mūnşalyqty qamqorlyqtaryna, talpynystaryna ıştei riza bolady ekensıŋ.
Aqtyq synnyŋ alǧaşqy kezeŋı «Balalyq şaqtyŋ änūrany» dep ataldy. Qatysuşylar būl künı balalarǧa arnalǧan muzykalyq şyǧarmalardy oryndasa, ekınşı künı tanymal ertegılerdıŋ keiıpkerlerımen bırge än şyrqady. Al «Atameken» atty qorytyndy keşte saiyskerler Astanany, tuǧan jerdı änge qosty.
Şıldenıŋ 6-sy künı doda öz märesıne jettı. Almatydan kelgen 8 jasar Daneliia Töleşova bas jüldemen bırge «Körermender közaiymy» nominasiiasyn da iemdendı. Endı Daneliia tamyz aiynda ötetın halyqaralyq «Detskaia novaia volna» baiqauynda bızdıŋ eldıŋ namysyn qorǧaityn bolady. Jeŋımpaz qyz «Qazaqstan» ūlttyq arnasy taǧaiyndaǧan syilyqqa da qol jetkızıp, bır jyl boiy «Balapan» telearnasynan öz önerın körsetuge mümkındık aldy. Bäigenıŋ 1-oryny şymkenttık Bolat Sadraddinge būiyrsa, 2-oryndy Maŋǧystau oblysynyŋ ümıtkerı Jomart Maratov ielendı. Sondai-aq Jomartqa Astana qalasy äkımınıŋ arnaiy syilyǧy da tabystaldy. Onyŋ oryndaǧan «Malenkii prins» änı şynymen de köptıŋ köŋılınen şyqqan bolatyn. Al aqtaulyq önerpaz Karina Şaiguzova 3-tūǧyrdan körındı.
Önerpazdardy änşı Nūrlan Abdullin, Almas Kışkenbaev, reseilık prodiuser Mitia Fomin jäne «Detskaia novaia volna» konkursynyŋ direktory Aleksandr Rumiansev baǧalaǧan edı. Balalardyŋ önerın tarazylap, qazylyq jasau asa qiyn ıs ekenın bılemız. Būl oiymyzdy Almas Kışkenbaev da rastady. «Barynşa ädıl, jan-jaqty saraptauǧa tyrystyq. Bır quanatynym, jobanyŋ deŋgeiı eş tömendemedı. Ädette qandai da bır jaŋa konkurstardyŋ alǧaşqy mausymy oidaǧydai ötıp, keiınırek sūiylyp ketıp jatady ǧoi. Üşınşı ret ūiymdastyrylyp otyrǧanyna qaramastan, «Aialaǧan Astananyŋ» būl jolǧy aiasy da öte keŋ ärı auqymdy boldy» deidı ol.
P.S. Oquşylar saraiynan şyqqan soŋ, balǧyn talanttardyŋ tättı ünı bırazǧa deiın qūlaǧymnan ketken joq. Maǧan tek olar ǧana emes, bükıl Astana än salyp tūrǧandai körındı…
Botaköz MARATQYZY
