Nūrsūltan Nazarbaev Ankarada Türkiia Respublikasynyŋ Prezidentı Rejep Taiip Erdoǧanmen kezdestı.
Saltanatty qarsy alu räsımınen keiın Qazaqstan men Türkiia prezidentterı arasynda kelıssöz öttı.
Kezdesude memleketter basşylary ekı jaqty yntymaqtastyqtyŋ jäne sauda-ekonomikalyq qatynastardy nyǧaitudyŋ özektı mäselelerın talqylady.
Sonymen qatar, Nūrsūltan Nazarbaev pen Rejep Taiip Erdoǧan halyqaralyq jäne öŋırlık kün tärtıbındegı maŋyzdy mäseleler jönınde pıkır almasty.
Memleket basşysy Qazaqstan men Türkiia arasyndaǧy Joǧary deŋgeidegı strategiialyq yntymaqtastyq keŋesınıŋ üşınşı otyrysyna qatysty.
Nūrsūltan Nazarbaev Türkiia Respublikasyna resmi saparynyŋ qorytyndysy boiynşa būqaralyq aqparat qūraldarynyŋ ökılderı üşın brifing ötkızdı.
Elbasy Qazaqstan men Türkiia arasyndaǧy qarym-qatynastardyŋ strategiialyq sipatyn atap öttı.
– Türkiia prezidentımen mazmūndy ärı nätijelı kelıssöz ötkızdık. Būl kezdesu özektı mäseleler jönınde pıkır almasuǧa mümkındık berdı. Jalpy, Astana men Ankara öŋırlık jäne halyqaralyq problemalardy ärdaiym aşyq talqylaitynyn atap ötkım keledı. Būl mäseleler boiynşa bızdıŋ ūstanymdarymyz ūqsas, – dedı Qazaqstan basşysy.
Sondai-aq, Nūrsūltan Nazarbaev Qazaqstan men Türkiia arasyndaǧy Joǧary deŋgeidegı strategiialyq yntymaqtastyq keŋesınıŋ üşınşı otyrysy ekı jaqty qatynastarǧa odan ärı tyŋ serpın beretınıne senım bıldırdı.
Memleket basşysy ekı eldıŋ saiasi dialog pen bauyrlas halyqtardyŋ dostyǧyn ärı qarai nyǧaityp, tereŋdete tüsuge müddelı ekenın aitty.
Sonymen qatar, Qazaqstan Prezidentı ekı memleket arasyndaǧy sauda-ekonomikalyq jäne investisiialyq yntymaqtastyq mäselelerıne toqtaldy.
– Qazır elımızde türık kapitalynyŋ qatysuymen qūrylǧan 1800-den astam käsıporyn bar. Tauar ainalymynyŋ kölemı ötken jyly şamamen 2 milliard dollar boldy. Būl körsetkıştı bolaşaqta 5 milliard dollarǧa jetkızemız dep kelıstık, – dedı Nūrsūltan Nazarbaev.
Nūrsūltan Nazarbaev «Jaŋa sinergiia» atty bırlesken baǧdarlamany jüzege asyrudyŋ aralyq qorytyndylaryn atap ötıp, «türık biznesınıŋ kapitandarymen» jürgızılgen kelıssözderdıŋ nätijelerıne toqtaldy.
– Jalpy, saparym barysynda qūny 2 milliard dollarǧa juyq kommersiialyq jobalarǧa qatysty kelısımderge qol qoiyldy. Aldaǧy uaqytta bügıngı qol jetkızgen uaǧdalastyqtardy jüzege asyru üşın küş jūmyldyruymyz qajet, – dedı Memleket basşysy.
Qazaqstan Prezidentı türık investorlaryn Aqtau jäne Qūryq porttary negızınde jūmys ıstep jatqan kölık-logistika habyn damytuǧa belsendı atsalysuǧa şaqyrdy.
R.Erdoǧan Qazaqstan basşysyna resmi sapary üşın rizaşylyq bıldırıp, ötken kezdesulerdıŋ nätijesın joǧary baǧalady.
