Elbasy Nūrsūltan Nazarbaevtyŋ qatysuymen qalyptasqan dästür boiynşa Memlekettık Tu kökke köterıldı.
– Bız elorda künı qarsaŋynda memlekettık tuymyzdy köteru räsımın dästürlı türde ötkızıp kelemız. 25 jyl ışınde bız Qazaqstandy bır tudyŋ astyna bırıkken bırtūtas ūlt retınde qalyptastyra aldyq, – dedı Memleket basşysy öz sözınde. Şynynda, jas Astana tarihy aqiqatqa ainalǧan armanymyzdyŋ jylnamasy ıspettı. Osy uaqyt aralyǧynda elımızdıŋ barlyq öŋırınen kelgen jüz myŋdaǧan qazaqstandyq elordamyzdyŋ qūrylysy men qalyptasuyna eleulı ülesterın qosa bıldı. Är qazaqtyŋ jüregıne jaqyn, öz qolymyzben tūrǧyzyp jatqan elorda elımızdıŋ jaŋa ruhani-mädeni ortalyǧyna ainaldy.
«Qazaqstannyŋ kök bairaǧy älemnıŋ köptegen ırı arenalarynda ūltymyzdyŋ mereiı üstem bolǧanda jelbıreidı.Bız elımızge degen şynaiy quanyş pen maqtanyş sezımıne toly sätterge Almatyda ötken Qysqy universiada oiyndarynyŋ barysynda kuä boldyq. Aspan tüstes kök tuymyzdyŋ astynda Qazaqstan bükıl älemge tanyldy. Bız qaqtyǧysyp jatqan taraptardy kelısımge kelıp, tatulasuǧa şaqyratyn memleketke ainaldyq.
Sol arqyly bedelımız de artyp keledı. Bız jer betınde beibıtşılık ornatu üşın küresıp, iadrolyq qarudyŋ joiyluyna atsalysudamyz. Bız senımge ie bolyp, bırtūtas ärı tolerantty qoǧamda ömır sürudemız. Sondyqtan mūnda älemdık jäne dästürlı dınder köşbasşylarynyŋ sezın ötkızıp kelemız» dei kele Memleket basşysy Astananyŋ täuelsız Qazaqstan tarihyndaǧy rölı men mänınıŋ joǧary ekenın aitty. «Astana – mümkındıkterımızdıŋ, halqymyzdyŋ ūlylyǧy men auyzbırşılıgınıŋ nyşany. Elordamyz – Ortalyq Aziianyŋ, bükıl Aziia qūrlyǧynyŋ marjany. Bız bas qalamyzdy süiemız, al qonaqtarymyz oǧan tamsana qaraidy» dedı Prezident.
Saltanatty jiynda Qazaqstannyŋ äskeri joǧary oqu oryndarynyŋ üzdık tülekterı Prezident qolynan ofiserlık şen aldy. Jas ofiserler Elbasynyŋ aldynda otanymyzdyŋ qauıpsızdıgın qorǧauǧa ant berdı. Jiyn soŋynda Memleket basşysy astanalyqtar men qala qonaqtaryn elorda toiymen qūttyqtap, baq-bereke tıledı.
Gülmira AIMAǦANBET
