Otanymyzdyŋ jüregıne balanǧan elordamyzǧa kelgende bırınşı attaǧan tabaldyryǧym bügınde otyz jyldyǧyna jetıp otyrǧan «Astana aqşamy» edı. Sondyqtan būl mekeme, būl ūjym men üşın ärqaşan ystyq körınedı.
Bıle bılsek, är mekeme – bır-bır memleket. Belgılı mäteldegıdei «şaǧyn memleket». Ony basqaru mümkındıgın ielengen adam qyzmetkerlerınıŋ bükıl jaǧdaiyna, köŋıl-küiıne alaŋdauly, jauapty boluy tiıs dep oiladyq. Älı sol oidamyz. Ümıttenuımızşe, būl ūstanym jadaǧai, jaidaq qana maksimalizmen tuyndap jürgen joq.
Öz basym sanamda keiınırek aiauly ūǧymǧa ainalyp ketken «Astana aqşamyna» ädepkıde korrektor qyzmetın atqaru üşın qabyldandym. Ütır, nükte sekıldı ūsaq-tüiektı qyraǧylyqpen tügendep körınsek kerek, basşylyq köp ūzatpai ılgerılete berdı. Tolaiym tärbie, täjıribe mektebınen ötkenımdı ylaiym qūrmet tūtam. Bügın, mıne, elordanyŋ memleket tılındegı gazetınıŋ eks-redaktorlary sapynda lebız bıldıru märtebesındemız. Jönı tüzu qazaq mūndaida «Täube» der. Myŋ täube!
«Astana aqşamy» – nesın emes, qaisysyn aitarymdy bılmeitındei tolqynysty, tolyqqandy taqyrybym. Soǧan qaramastan, sözımdı eptep-şektep ūsynyp otyrmyn.
Bırınşı. Gazet şyǧa bastaǧaly qanşa uaqyt ötse de bütındelgenın eskerıp, ötken künderıne şolu jasau – köşelı közqaras. Älbette, kımnen, neden, qaidan, qalai bastalǧanyn, qaida, kımdermen, qaşan ötkızgenın saralau qai jaqqa, ne üşın bara jatqanyn baiyptau üşın maŋyzdy. Redaksiia basşylyǧy, alqasy osy rette bızdıŋ de pıkır aituymyzdy jön dep ūiǧarǧanyna alǧys bıldıremın. Aldaǧy barşa ısterı igılıktı boluyna şynaiy tılektespın.
Ekınşı. Jer-älemge joqtan ot oilap tabuǧa tiıs adamzattyq maŋyzdy şarua bolmasa da, astanalyq memlekettık basylymnyŋ direktor-bas redaktory qyzmetıne taǧaiyndalǧan tūsta äjeptäuır jas edık. Ol turaly äredık özımız estıp qap jüretınbız. Mäselen, sanaly türde erekşe jaqsy köretın salamyz matematikanyŋ aituly aqsaqaly, akademik Mūhtarbai Ötelbaevqa sol kezde arnaiy sälem bere bardyq: «Okazyvaetsia, ty je eşio molodoi. Tart alǧa!» dep jymiǧany qūlaǧymyzdyŋ tübınde, janarymyzdyŋ jadynda tūr. Däl qazırgıdei. Endeşe sonşalyq «molodoilyǧymyzǧa» män bermei, senım bıldırgen azamattarǧa, täuekel-senım artqan azamattarǧa alǧys bıldıremın. Sol senım bız üşın qaşanda qamşydai üiırılıp keledı. «Sodan jaman boldy» dese, auyz küisın.
Bızdıŋ bar bastamamyzǧa qoldau körsetıp, demeuşı bolyp jürgen, aqylşy-keŋesşı bolyp jürgen basşylyǧymyzǧa aiyryqşa ıltipat körsetu – paryzymyz. Al ūsynys-bastama degenımız, Qūdaiǧa şükır, jaiymyzǧa qaramai, bıraz aitylǧan siiaqtanady…
Üşınşı. Basşysy bolsyn, basqasy bolsyn, qoǧamǧa aralasqan är azamat öz üiınen jyraq ärı oiau uaqytynyŋ köbın jūmys ornynda ötkızedı. Sondyqtan älgı bır tanys anekdottaǧy sekıldı «Kımmen baqyttysyŋ, anyqtap, bılıp kel?!» degendei nūsqau-sūraq tuyndai qalsa, ärıptes atauly tızımnıŋ soŋynda qalmaǧany läzım. Öz basymyz «Astana aqşamynda» solai boluyna meilınşe maŋyz beruge tyrystyq. Osynau oiymyzdy jete ūǧynǧan, ūdaiy qoldauǧa peiıldengen qyzmettesterıme alǧysym şeksız. Olar kımder edı? Olar yŋǧai bır yǧai da syǧai, maza qaşyrar familiialar emes. Olar – professionaldar edı. Tegınde «professional» ūǧymyna sipattamanyŋ tıpten qajetı joq. Al astanalyq gazettesterım şyǧarmaşyl, jasampaz, jalyndy, ziialy, arqaly aǧaiyndar ekenın qosa aitqanym abzal.
Kündelıktı jūmysty meiram syndy qabyldaudan, merekedegıdei läzzat aludan qaşpadyq-au deimın. Öitkenı ol jai ǧana ötıp jatqan uaqyt, sätter emes qoi, ol – ärqaisymyzdyŋ mynau jalǧan jüzındegı qaitalanbas ǧūmyrymyz. Älbette, kün saiyn mereke jasaimyz dep jürıp, oiyŋa kelgendı ıstep, aua jaiylyp ketu kerek degen tüsınıkten müldem aulaq boldyq. Jūmys – jūmys! Tek yqylas zor boluǧa tiıs degen söz. Osyndaiyn korporativtık köŋıl-küidı demep ūstauymyzǧa ärıptesterımnıŋ joǧaryda atalǧandai jäne odan tys ta qanşama adami-igı qasietterı septeskenıne quanyştymyn. Qaida, qalai jürsek te, auyz toltyra aita jüruge barmyn, qadırmenderım menıŋ!
«Astana aqşamynyŋ» dıŋgegı zoraia bergei!
Erbolat QAMEN,
«Egemen Qazaqstan»
RG AQ Basqarma
töraǧasynyŋ orynbasary,
«Astana aqşamy»
gazetınıŋ Bas redaktory
(2012-2015 jyldar)
