Astana turizmı älı de aqsap tūr
Turizmnıŋ körıgın qyzdyruǧa bolady eken, täjıribe joq emes, bar. EKSPO-2017 halyqaralyq körmesı kezınde, qazaqstandyqtardyŋ taily-taiaǧy qalmai Astanany bır köruge asyqqan edı ǧoi. Äuejaidan da, temırjol vokzaldarynan da aǧylyp kelıp jatqan jūrtqa qarap, osyndai deŋgeide turizmdı damytuǧa bolady eken-au dep taŋ qaldyq.
Byltyrǧy jazdyŋ aptaby artta qaldy, qala köşelerı byltyrǧydai emes bosap qalǧandai. Şet tılde söilegenderdı sirek kezdestıremız. Bäiterektıŋ ainalasy keide adamǧa tolyp qalady. Jaily avtobustardan tüsıp jatqandarǧa qarap Burabaidan kelgen türlerın baiqaimyz. «Astanaǧa aǧylǧan jūrttyŋ aiaǧy nege saiabyrsyp qaldy?» degen sūraqty Astanalyq turizm qauymdastyǧynyŋ prezidentı Äigerım Mūhamedjanovaǧa qoiǧan edık.
– Byltyrǧydai emes ärine, degenmen elordaǧa turister kelıp jatyr. Saiahatşylardy qarsy alyp, şyǧaryp saluǧa bar küşımızdı salyp jürmız. Bıraq ta, Astana turizmınıŋ damuyna kedergı keltıretın mäseleler joq emes. Sonyŋ bastysy, gidtıŋ, qalany aralatyp körıktı jerın körsetıp, ötkenı men ketkenın äserlı jetkızetın mamandardyŋ märtebesı anyqtalmaǧan. Olardyŋ turizmnıŋ basty belgısı ärı bedelı ekenın eşkım eskermeidı. Şyn mänınde şeteldık turist üşın gid – barǧan elındegı eŋ jaqyn tuysy, aqylşy jol bastauşysy. Ony qūrmettep, qyzmetın joǧary baǧalaidy. Al bızde şe?! Gid-mamandardyŋ jylap kelgenıne talai kuä boldyq. Onyŋ bır mysalyn aitaiyn. Qaladaǧy mūrajaiǧa turist ertıp baryp, elımızdıŋ basty rämızı tuymyz turaly sūraǧanǧa tüsındırıp jatqanda, esıktıŋ janynda otyrǧan küzetşı gidtıŋ jaǧasynan alyp, böten jūrttyŋ közınşe sögıp, yŋǧaisyz jaǧdaiǧa qaldyrǧany bar. Nege degende öz qyzmetkerlerınen basqa eşkımnıŋ tüsındıruge qūqysy joq eken. Al mamandaryŋ qaida degende şet tılın bıletın eşkım bolmapty.
Astana – meiramhanadan kende emes. Dese de turisterdıŋ asyǧys tüstenıp, keşkı asyn jyldam ışuge laiyqtalǧan oryndar joqtyŋ qasy. Europalyqtardyŋ köbı vegetariandyqtar, keibırı halal sūraidy, olardyŋ qalauynşa asqa tapsyrys beru jaǧynan da osal tūstarymyz bar. Aita ketelık, 40 adamdy ertıp alǧan gid meiramhanaǧa tüstenuge aparsyn delık. Olar meiramhananyŋ tärtıbı boiynşa ülken porsiialy tamaq alyp ışuge mäjbür. Ol astyŋ jartysy jelınbei qalady. Soǧan qaramastan aqşasyn tölep, ekı saǧat uaqyty tüstenuge ketedı. Şetelderde turisterge arnalǧan asyǧys as ışıp, jeŋıl tüstenetın meiramhanalar jetkılıktı.
Taǧy da aitatyn jait, turister keşkılık asyqpai otyryp, keide syrasy ne şarabyn syzyltyp ışıp şarşaǧanyn basyp (mädenietı ǧoi), eldıŋ etnikalyq mädeni mūrasymen tanysyp, erekşelıkterın bılgısı keledı. Turister baratyn jerlerde būl eskerılmegen. Özge jūrtqa belgılı qyzmet bolǧan soŋ, bızderde şeteldık qonaqtarymyzdyŋ ötınışın oryndaǧymyz keledı. Ondai jaǧdaida meiramhananyŋ bır zalyn jalǧa alyp, ärtısterdı şaqyryp älek bolamyz. Meiramhana bolǧan soŋ as mäzırıne tapsyrys beru kerek, önerın körsetkenderge taǧy aqysyn töleimız, sonymen özımızdı, önerımızdı tanytu qymbatqa, ärtıs ızdep äbıgerşılıkke tüsıp jatady. Turizmı damyǧan elde qalai? Olar jai ǧana susynyn ışıp, azdap tıske basatynyn alyp jaily orynǧa jaiǧasyp, barǧan elınıŋ mädenietın tamaşalap, äserın alyp qaitady. Qanşa tyryssaq ta, asa qajet turizmnıŋ osy qyzmetın jandandyra almai jürmız. Ülken konsert zaldaryna aparuǧa bolady, bıraq būl basqa jaǧdai.
Elımızge kelgen qonaqty avtobuspen alyp jüremız. Turistık avtobustarǧa arnalǧan tūraqtyŋ standarty bekıtıldı. Bıraq kölıktıŋ türı, kölemınıŋ mölşerı anyqtalyp, bekıtılmegen. Sol sebeptı qalanyŋ körıktı jerlerınıŋ tūraǧyna toqtaǧanymyzda kölıktı qaida qoiarymyzdy, qandai baǧa töleitınımızdı bılmei qinalmyz. Osylaişa jartylai bıtken şarua da dıŋkeletıp tūr.
Astana turizmınıŋ bır tynysy Qorǧaljyn tabiǧi parkınıŋ daŋqyn äsırese europalyqtar jaqsy bıledı jäne oǧan barǧysy keledı. Burabai da körıktı tabiǧatymen qonaqtarymyzdy qyzyqtyrady. Alaida ol jerlerdı älı de bolsa turizmge tartymdy etuge bolar edı. Astananyŋ töŋıregınde Bozoq bar dep jatamyz. Ökınışke qarai, ony turistık baǧytqa ainaldyryp, tartymdy etu üşın köp jūmystar jasau kerek. Qazylǧan topyraqtyŋ üiındısımen eşkımdı taŋ qaldyra almaimyz.
Astananyŋ on şaqty qonaqüiınıŋ bosaǧasyndaǧy arnauly jerde jarnamalyq dünielerımızdı aparyp qoidyq. Nätijesız emes, sol arqyly qala qonaqtary uaqytyn bölıp, aqyry jol tüsken soŋ, elordanyŋ körıktı jerlerın bır körıp ketuge yntaly bolady. Būl – bızdıŋ qauymdastyqtyŋ ǧana jūmysy. Al eger memlekettık deŋgeide elımızdegı bar jauharlardy jarnamalai alsaq, onda turizm salasynyŋ kem-ketıgın toltyryp, onyŋ damuyna daŋǧyl jol salar edık.