Aldaǧy 5 jylda elordadaǧy kögaldandyru alaŋy bır tūrǧynǧa şaqqanda 14 şarşy metrden 19 şarşy metrge deiın keŋeiedı. Qala aumaǧynda sapaly egılgen, kütılgen jäne tolyq saqtalatyn kem degende 500 myŋ jasyl jelek otyrǧyzylady. Jasyl jelekterdı sifrlyq taŋbalaumen jäne qūjattaudy engızu arqyly Astananyŋ bıryŋǧai jasyl kartasy jasalady. Mūndai jaŋalyqtardy elımızdegı qalalardy abattandyru jäne kögaldandyru mäselelerı talqylanǧan Ükımet otyrysynda elorda äkımı Jeŋıs Qasymbek jariia ettı.
Saiabaqtar men gül baqtary keŋeiedı
Osy jiynda qala basşysy jaŋa qoǧamdyq keŋıstıkterdı, sonyŋ ışınde saiabaqtar men gül baqtaryn jaŋartu baǧytyndaǧy jūmystar turaly egjei-tegjeilı baiandama jasady.
Jeŋıs Qasymbek elordany abattandyru jäne kögaldandyru boiynşa auqymdy jūmystar jürgızılıp jatqanyn tılge tiek ettı.
«Ötken jyly 165 qoǧamdyq jäne aulalyq keŋıstıktı abattandyru jūmystary aiaqtaldy. Sonyŋ ışınde 45 jasyl aimaq, onyŋ ışınde 2 saiabaq, 10 gül baǧy jäne 33 qoǧamdyq keŋıstık qūryldy. 1 millionǧa juyq jasyl jelek otyrǧyzyldy» dedı äkım.
Ol ekı strategiialyq qūjattan qūralatyn «Elorda aumaǧyn kögaldandyru tūjyrymdamasy» äzırlengenın aitty. Ekı qūjattyŋ bırınşısı – «Qoǧamdyq keŋıstıkterdı damytu jäne kögaldandyru syzbasy» qoǧamdyq keŋıstıkterdı damytudyŋ jäne qalany kögaldandyrudy damytudyŋ tūjyrymdamalyq aspektılerın jeke-jeke anyqtaityn ekı tomnan tūrady. Ekınşısı – «Kögaldandyru jarǧysy». Onda salynyp jatqan jäne salynǧan nysandardy kögaldandyru, egıletın aǧaştardyŋ sapasy men jaǧdaiy, qūrylysşylar men menşık ielerıne arnalǧan abattandyru erejelerı qarastyrylǧan. «Jarǧyǧa säikes, tūrǧyn üi saluşylar aulaışılık aumaqtar men köşelerdı qyzyl syzyqtardyŋ perimetrı boiynşa sapaly abattandyryp, odan ärı mülık ielerı bırlestıkterınıŋ (MİB) nemese päter ielerı kooperativterınıŋ (PİK) teŋgerımderıne ötkıze otyryp, jasyl jelekterdı 3 jyl boiy kütıp ūstauy kerek» dep tüsındırdı elorda äkımı.
Äkımnıŋ aituynşa, saiabaq aimaqtaryn ūlǧaitu, olardy jol boiyndaǧy syzyqty ekpelermen bailanystyra otyryp, jasyl jelekpen kömkerılgen qalaǧa ainaldyru jospary jasalǧan. Aldaǧy 5 jyldyŋ ışınde kögaldandyru alaŋy bır tūrǧynǧa şaqqanda 14 şarşy metrden 19 şarşy metrge deiın keŋeitıledı. Osylaişa jasyl keŋıstıkter qadamdyq qoljetımdılıktı qamtamasyz etedı.
Köşpendıler oiyndary ötetın jerler abattanady
Qala basşysy biyl Prezident saiabaǧy qaita jaŋǧyrtylatynyn atap aitty.
«Esıl özenınıŋ jaǧalauyn abattandyru (Amman köşesınen Saraişyq köpırıne deiın), Beibıtşılık jäne kelısım saiabaǧyn, Mäŋgılık el daŋǧylyn (Orynbor köşesınen Qabanbai batyr daŋǧylyna deiın) qaita jaŋartu jūmystaryn jürgızudı josparlap otyrmyz. «Myŋjyldyq alleiasy» audany (J.Näjımedenov, A.Baitūrsynov, K.Äzırbaev köşelerınıŋ jäne Täuelsızdık daŋǧylynyŋ şarşysy) boiynşa Bas jospardyŋ aiasynda abattandyrudyŋ bırınşı kezeŋın bastaudy josparladyq. V düniejüzılık köşpendıler oiyndaryna daiyndyq aiasynda köktemde oiyndar ötetın oryndardy abattandyru jäne kögaldandyru jūmystary jürgızıledı» dedı Jeŋıs Qasymbek.
Sondai-aq qoǧamdyq keŋıstıkterdı, atap aitqanda, «EKSPO» aumaǧyndaǧy saiabaqta, Qabanbai batyr daŋǧylynda (Syǧanaq köşesınen «Qazanat» ippodromyna deiın), sondai-aq D.Qonaev jäne Dostyq köşelerınde jaŋa qoǧamdyq keŋıstıkter saludy bastau josparlanǧan.
Suaru jüiesıne mūqiiat qaraimyz
Äkım kögaldandyru, jasyl jelek otyrǧyzu jūmystary kezınde suaru jüiesın damytuǧa erekşe nazar audarylatynyn jetkızdı.
«Byltyr bız 7 saiabaq pen gül baqtarda avtomattandyrylǧan suaru jüiesın ornattyq. Biyl däl solai barlyq ülken nysandarda avtomattandyrylǧan suaru jüiesın saludy qarastyryp jatyrmyz. Keleşekte kögaldandyru boiynşa ärbır jaŋa jobany jüzege asyrǧan kezde nemese qaita jöndeu jūmystaryn ötkızgen kezde osy jūmysty jalǧastyramyz» dedı Astana äkımı.
Sondai-aq äkım qala aumaǧynda sapaly egılgen, kütılgen jäne tolyq saqtalatyn kem degende 500 myŋ jasyl jelek otyrǧyzylatynyn mälımdedı. Jasyl jelekterdı sifrlyq taŋbalaumen jäne qūjattaudy engızu arqyly Astananyŋ bıryŋǧai jasyl kartasy jasalady. Ol kartada ärbır egılgen aǧaştyŋ belgılı bır uaqyttaǧy kütıp-baptaluyn baqylaityn sifrlyq tölqūjaty bolady.
Egılgen aǧaşqa kütım jasalmaidy
Jiynda söz söilegen Önerkäsıp jäne qūrylys ministrınıŋ orynbasary Azamat Beiısbekov Memleket basşysynyŋ tapsyrmasy boiynşa dūrys jüielengen qūrylysty engızu jäne tartymdy, jaily qoǧamdyq keŋıstıkterdı qalyptastyru boiynşa nūsqaulyq bolatyn «Qalalardy keşendı salu standarty» äzırlengenın mälım ettı. Ol qalalar aumaǧyn egjei-tegjeilı josparlau jobalarynda paidalanu üşın barlyq jergılıktı atqaruşy organǧa jıberıldı. Būl rette auytqulardy boldyrmau üşın 2024 jylǧy qaŋtardan bastap bıryŋǧai qala qūrylysy saraptamasy engızıldı. Ol josparlau kezeŋınde säulet-qūrylys normalarynyŋ būzyluyn boldyrmauǧa mümkındık beredı.
Premer-ministr Oljas Bektenov abattandyru men kögaldandyru jūmystary qala tūrǧyndarynyŋ ömır süru jaǧdaiyn jaqsartumen qatar, turistık salany damytuǧa da erekşe serpın beretının qadap aitty. Būl rette ol azamattardyŋ älı de bolsa trotuarlar men jaryqtyŋ joǧyn, jasyl jelektıŋ azdyǧyn aityp, jiı şaǧymdanatynyna toqtaldy.
«Äkımdıkter tarapynan jüielı jūmystyŋ bolmauy – abattandyru men kögaldandyrudyŋ negızgı problemasy. Aǧaştar men ösımdıkter otyrǧyzylady, bıraq keiın eşqandai kütım jasalmaidy. Köpşılık jinalatyn qoǧamdyq oryndar men üi maŋyndaǧy aumaqtardyŋ ūsqynsyz jaǧdaiy ülken problemaǧa ainalǧan. Saiabaqtar men gül baqtary köbınese iesız qalǧandai küi keşedı. Olardy jyl saiyn jaŋartyp otyru, körkeitu jūmystary jürgızılmeidı. Keide tıptı saiabaqtarda nysan salu faktılerı de kezdesedı» dedı Ükımet basşysy.
Üi ornyna gül baǧy salynady
Oljas Bektenov būqaranyŋ osyndai kündelıktı mäselelerdı şeşude ülken belsendılık tanytyp otyrǧanyn tılge tiek ettı. Mysaly, qoǧam belsendılerınıŋ arqasynda elordada bırqatar jerde salynuy tiıs nysandardyŋ ornyna gül baqtary men demalys oryndary paida boldy. Atap aitqanda, J.Näjımedenov köşesınıŋ boiyndaǧy 18 qabatty ǧimarattyŋ ornyna gül baǧyn salu turaly şeşım qabyldandy. Myŋjyldyq alleiasy Astanadaǧy jaŋa tartymdy ortalyqqa ainalady.
«Äkımdık elordada demaluǧa arnalǧan jaily aimaqtar qūru, kögaldandyrudyŋ keşendı jüiesın ıske asyru jönındegı jūmysty jalǧastyruy qajet. Būl qalanyŋ ırı tūrǧyn audandarynyŋ «jaŋa tynysyn» aşuǧa mümkındık beredı» dedı Premer-ministr.
Şetkı aimaqtar eleusız qalmasyn
Oljas Bektenovtıŋ aituynşa, qala aimaqtaryn damytu men onda qūrylys jürgızu Bas jospar men egjei-tegjeilı josparlau jobalaryna säikes qataŋ türde jüzege asyryluy kerek.
«Äkımdıkter qala ortalyǧyn ǧana abattandyrumen şektelmei, şetkı aimaqtardy da nazardan tys qaldyrmauǧa tiıs. Keibır gül baqtarǧa nemese qoǧamdyq oryndarǧa «qamqorlyq jasau» üşın biznes pen ırı käsıporyndardy tartuǧa bolady. Şaǧyn biznes te ırgeles jatqan aumaqty kütıp-ūstaudy jaqsy dästürge ainaldyruy kerek» dedı ol.
Ükımet basşysy öŋırler äkımderıne tiıstı Jol kartalarynyŋ tolyq jäne sapaly oryndaluyn qamtamasyz etudı tapsyrdy.
«Qalalardyŋ ömır süruge qolaily ärı jaily boluy maŋyzdy. Äkımdıkter Jol kartalarymen şektelıp qalmai, tuyndaǧan problemalardy şūǧyl şeşıp, halyqtyŋ pıkırıne qūlaq asqany jön» dedı ol.
Sonymen qatar Ükımet basşysy qalalardaǧy jasyl jelektıŋ qysqaruyna jol bermeu kerektıgın, būl rette otyrǧyzylatyn köşetterdıŋ barynşa jersınıp ketuın jäne olarǧa naqty kütımdı qamtamasyz etu qajettıgın talap ettı.
