QR Täuelsızdıgınıŋ 25 jyldyǧyna arnalǧan «Quatty öŋır – quatty Qazaqstan» baǧdarlamasynyŋ aiasynda qazannyŋ 29-30 jūldyzdarynda Astanada Aqmola oblysynyŋ künderı ötedı. Osy aptanyŋ aiaǧynda elorda tūrǧyndary men qonaqtary Astanamen ırgeles aimaqtyŋ erekşelıkterımen tanysyp, auyl şaruaşylyǧy önımderın satyp ala alady. Sondai-aq, oblystan keletın mädeni oşaqtardyŋ qoiylymdary men körmelerın tamaşalaidy.
Aldaǧy senbı-jeksenbı künderı «Han şatyr» sauda-oiyn-sauyq ortalyǧynyŋ alaŋynda Aqmola oblysynyŋ 19 audanynyŋ auyl şaruaşylyǧy tauar öndıruşılerı men käsıporyndarynyŋ jäne «Esıl ÄKK» ŪK AQ-nyŋ qatysuymen järmeŋke ötedı. Elordaǧa 60-tan astam önım ataulary jetkızıledı. Sonyŋ ışınde körşı elderge eksportqa jıberıletın 605,2 tonna et jäne şūjyq önımderı, 46,2 tonna süt önımderı, 218 tonna kökönıs, 19,0 tonna balyq pen balyq önımderı, 403,2 myŋ dana jūmyrtqa, 200,0 tonna kartop, 45 myŋ litr ösımdık maiy jäne taǧy basqa da tauarlar bar.
Järmeŋkede bauyrsaq, airan, qymyz tegın taratylyp, asyq atu, auyr tasu, armresling, toǧyzqūmalaq, arqan tartu, «Qoi şeşu» jäne basqa oiyndar ūiymdastyrylyp, aŋşy qūstar, tazy men töbet tūqymdarynyŋ körmesı ötedı.
Saǧat 16.00-den bastap jastar arasynda tanymal üzdık jaidarman toptary mädeni baǧdarlama ūsynady.
29 qazanda saǧat 19-00-de Q. Quanyşbaev atyndaǧy memlekettık aakademiialyq qazaq muzykalyq drama teatrynda M. Şahanovtyŋ «Şyŋǧyshan» qoiylymy qoiylady.
Beibıtşılık jäne kelısım saraiynda aqyn, dramaturg, jazuşy Qūdaiberlı Myrzabektıŋ şyǧarmaşylyq keşı men QR Täuelsızdıgınıŋ 25-jyldyǧyna arnalǧan Aqmola oblysynyŋ äleumettık-ekonomikalyq saladaǧy jetıstıkter körmesı ötedı. 30 qazanda oblys äkımı S. Kulagin aimaq damuyna üles qosqan eŋbek ardagerlerımen kezdesedı.
30 qazanda saǧat 16.00-de Beibıtşılık jäne kelısım saraiynyŋ opera zalynda Aqmola oblystyq filarmoniiasynyŋ «Jer jūmaǧy – Kökşetau, el tūmary – Astana» atty konserttık baǧdarlamasy men saǧat 18.30-da M. Gorkii atyndaǧy memlekettık akademiialyq orys drama teatrynda Ş. Qūsaiynov atyndaǧy Aqmola oblystyq qazaq muzykalyq drama teatrynyŋ T. Ahmetovtyŋ «Şäkärım» spektaklı qoiylady.
Amanǧali QALJANOV
