El Täuelsızdıgınıŋ 25 jyldyǧy qarsaŋynda «Kazakhstan Kids Fashion Show-2016» atty balalar sän körsetılımı otandyq dizainerlerdıŋ tuyndylaryn paş ettı.
«Kazakhstan Kids Fashion Show-2016» jobasy osymen törtınşı märte Mahabbat Esen men Jūldyz Seisenbekovanyŋ ūiymdastyruymen öttı. 4-16 jas aralyǧyndaǧy qatysuşylar balalarǧa arnauly tıgılgen toptamalarmen sän şeruıne şyqty. Körsetılım şymyldyǧyn «Asyl-dizain» sän üiınıŋ jetekşısı Aidarhan Qalievtıŋ kolleksiiasy aşty. Sän älemınde 25 jyl boiy eŋbek etıp kele jatqan dizainerdıŋ kiımderı qazaqylyqqa tūnyp tūr. Körsetılımnıŋ özı de qazaqy naqyşta, halyq jäne estrada änderınıŋ süiemeldeuımen öttı.
Ekınşı bolyp dizainer Änel Raiym özınıŋ «KaroMeli» atty sän toptamasyn tanystyrdy. Sahnaǧa jobanyŋ eŋ kışkentai qatysuşylary ülpıldegen köilekterımen şyǧyp, körermen közaiymy atandy.
«Glasman» sän üiı er balalarǧa arnalǧan kostiumdermen közge tüstı. Al «ILATI» qyzdardyŋ näzıktıgın aiqyndai tüsetın şılter matasyn ūtymdy paidalandy. Odan bölek, Maiia Jūmanbekova, Dinara Chakarova syndy otandyq dizainerler men Samidel, Vesta, LOGOVO sän üilerı jobaǧa qatysyp, sänqoilardyŋ köŋılınen şyqty. Osy rette bız «I Am Different» toptamasymen töbe körsetken Zarina Aqşolaqovany äŋgımege tarttyq.
– Balalar toptamasyn alǧaş ret ūsynyp otyrmyn. Maǧan jasöspırımdermen jūmys ısteu būiyrdy. Kiımder de ötpelı kezeŋdegı jetkınşekterge laiyqty etıp tıgıldı. Köbınese aq, qara jäne jalbyz tüstı jasylǧa basymdylyq berıldı. Bır-bırıne üilespeitın materialdardy toǧystyryp, tūtas tuyndy jasap şyǧaruǧa tyrystym. Maqsat – ösıp kele jatqan ūrpaqtyŋ erekşe ekenın körsetıp, daralyǧyn tanytu, – deidı Zarina.
Äiel adamy sänge jaqyn keletını belgılı, degenmen körsetılımde balalaryna qoldau körsetuge kelgen äkelerdı de kezdestırdık. Sonyŋ bırı – 11 jasar Eljannyŋ äkesı Erlan joba turaly mynadai pıkır bıldırdı. «Bastapqyda qarsy boldym, keiın balam özı qatysuǧa niettı ekenın bılıp, betın qaqpadym. Sahnada jürıp, boi tüzep, aşyla bastady. Baladan sänqoi jasaudy közdemeimız, ūiaŋdyǧynan arylyp, senımdılıgı artsa deimın» dedı ol.
Bes balanyŋ anasy Aijan Sadyqova da būl oidy jalǧastyrdy. «Balalardyŋ tärbiesı tıkelei menıŋ moinymda. Byltyr sän körsetılımıne tört balam qatyssa, biyl Arujan, Hanzada, Aibarys esımdı balalarym özderın model retınde baiqap körude. Eŋ ülkenı – 13, al kışısı – 4 jasta. Ülken qyzym Arujannyŋ jürıs-tūrysynda, söileu mänerınde özgerıs baiqadym, talǧamy tüzelıp, qalyptasyp qaldy. Byltyr ekınşı qyzymmen joba atynan Milanǧa baryp, balalar sän toptamasyn tanystyrdyq. Osy jyly qazaqtyŋ ūlttyq kiım ülgılerın tanystyruǧa San-Marinoǧa joldama aldyq» dep sözın aiaqtady ol. Balalardyŋ önerın tamaşalauǧa köp balaly ana jūbaiymen bırge kelgen eken. Körsetılım otbasy qūndylyqtaryn nasihattaityny osydan-aq belgılı.
Keş soŋynda jobanyŋ prodiuserı Mahabbat Esenmen tıldesuge mümkındık aldyq.
– Jüktelgen jauapkerşılıktı abyroimen alyp şyqtyq deuge bolady, ümıtımız aqtaldy. Bügın – bız üşın, balalar men olardyŋ äke-şeşelerı üşın ülken mereke. Astananyŋ aiazy şoudy tamaşalauǧa kelgen körermenge tosqauyl bolmady. Bır-bırımızge jaqsy köŋıl-küi syiladyq dep ümıttenemın, – dedı ol.
Aita keterlıgı, osy jyly «Kazakhstan Kids Fashion Show-2016» Ortalyq Aziiadaǧy eŋ üzdık balalarǧa arnalǧan şou märtebesıne ie boldy.
Güldana TALǦATQYZY
