Biyl 20 jyldyq belesıne şyǧatyn el jüregı – Astana äleumettık-ekonomikalyq örleuı, tūrǧyn üidı paidalanuǧa beru kölemı, naqty sektor men infraqūrylymǧa investisiialar tartu jaǧynan elde köşbasşy orynda keledı. Al qalanyŋ 2016-2020 jyldarǧa arnalǧan damu baǧdarlamasy halyqtyŋ ömır süru sapasyn jaqsartuǧa, älemdık standarttarǧa, tūrǧyndardyŋ ösımı men qala ekonomikasyna sai keletın infraqūrylymdy qūruǧa, halyqqa jaily ortany qalyptastyruǧa, elordanyŋ el ekonomikasyndaǧy rölın köteruge baǧyttalǧan. Būǧan qosa, Astanany 2050 jylǧa deiın älemnıŋ 10 üzdık qalasynyŋ qataryna engızu tūjyrymdamasy jasaldy.
Astana halqynyŋ sany jyldan-jylǧa ösıp keledı. Osydan bır jarym jyl būryn qala tūrǧyndarynyŋ sany million adamǧa jetse, 2017 jyldyŋ 1 qazanyndaǧy jaǧdai boiynşa 1 020 722 adamdy qūrady. 2020 jyldyŋ aiaǧyna qarai tūrǧyndar 1 mln 200 myŋ adamǧa jetedı dep boljanuda.
Elordanyŋ aglomerasiiasyn damytu, qalanyŋ soltüstıgınde ornalasqan şetkerı aumaqty tiıstı infraqūrylymmen qamtamasyz etu maqsatynda qalada törtınşı audandy aşu josparlanyp otyr. Jaŋa audanǧa Öndırıs jäne Jeleznodorojnyi tūrǧyn alaptary kıredı.
Jalpy alǧanda Almaty jäne Saryarqa audandarynyŋ bır bölıgı aşylǧaly jatqan audan qūramyna enedı. Keşe qalalyq mäslihattyŋ tūraqty komissiialarynyŋ qoǧamdyq tyŋdauy ötıp, onda törtınşı audan atauy da ūsynyldy. Tılderdı damytu basqarmasynyŋ basşysy Tıleuǧali Qyşqaşbaev jetkızgen Baiqoŋyr atauyn mäslihat deputattary qoldady.
«Törtınşı audan atauyna qatysty bızge Baiqoŋyr, Täuelsızdık, Qorǧaljyn siiaqty bırneşe ūsynys kelıp tüstı. Astana – özge öŋırlerge ülgı bolatyn şahar. Egemen elımızdıŋ elordasy bolǧandyqtan, ataulary märtebesıne sai, ärı töl tarihymyzdan, mädenietımızden syr şertetındei boluy tiıs. Baiqoŋyr – ūly dalamyzdy älemge paş etetın jer. Qorqyt babamyzdyŋ «Baiqoŋyr – jer kındıgı» dep aitqany da bar. Baiqoŋyr – älemdegı tūŋǧyş ärı eŋ ırı ǧaryş ailaǧy. Osy ailaqtan tarihta alǧaşqy märte adam ǧaryşqa ūşty. Ūlt maqtanyştary Toqtar Äubäkırov, Talǧat Mūsabaev, Aidyn Aiymbetov Baiqoŋyrdan kökke samǧap, abyroiymyzdy asqaqtatty. Baiqoŋyr ailaǧy – ötken ǧasyrdyŋ enşısıne jazylǧan adam balasynyŋ teŋdesı joq jetıstıgı. Sol arqyly adamzat tabiǧat qūpiialary men erekşelıkterın igeruge jol aşty. Astanaǧa älemnıŋ tükpır-tükpırınen turister aǧyluda. Baiqoŋyr atauy şeteldıkterge jaqsy tanys. Öskeleŋ ūrpaq üşın de taǧylymdy atau. Sondyqtan adamzat aldynda airyqşa orny bar, el tarihyna altyn ärıppen jazylǧan Baiqoŋyr atauyn jaŋa audanǧa beru ūsynysymen kelıp otyrmyn» dedı T.Qyşqaşbaev.
Astana qalasynyŋ Qūrmettı azamaty Vladimir Redkokaşinnıŋ sözınşe, jaŋa audan aşylǧanda qazır tuyndap otyrǧan bıraz tüitkılder şeşıledı. Qalany basqaru tiımdılıgı de artady. Baiqoŋyr atauy elordanyŋ damuyn ǧaryştyq jyldamdyqpen qamtamasyz etedı.
Törtınşı audan atauyn alda älı onomastikalyq komissiia qaraidy. Naqty şeşım keiın şyǧarylady.
Jaŋa audan qūramyna bolaşaqta Aqmola oblysynyŋ Şortandy audanynyŋ bır bölıgın engızu de josparlanuda. Ärine, infraqūrylym jaǧynan atqarar ıs te jetkılıktı. 150 köşe kıretın törtınşı audan aumaǧynda jalpy ūzyndyǧy 23,8 şaqyrymnan asatyn 50 köşenı jöndeu, 80 köşenı jaryqtandyru, otbasylyq-därıgerlık ambulatoriiany, Mädeniet üiın salu, jaryqtandyrylǧan jaŋa joldardyŋ qūrylysyn jürgızu, infraqūrylymǧa qatysty özge de jūmystardy atqaru maqsaty tūr. Tüiındep aitqanda, jaŋa audan «Şet aimaqsyz qala» jobasyn jüzege asyru üşın aşylady.
Amanǧali QALJANOV
