Astanada tūŋǧyş ret «Astana jūldyzy» respublikalyq turnirı öttı
Elordanyŋ ırgesındegı «Qazanat» atşabarynda alǧaş ret «Astana jūldyzy» respublikalyq turnirı öttı. Täuelsızdıktıŋ 25 jyldyǧyna arnalǧan dübırlı dodany Astana qalasynyŋ äkımı Äset İsekeşev saltanatty türde aşty.
Ūlttyq sport türlerınen ötken turnirge elımızdıŋ 14 oblysynan jäne Astana men Almaty qalalarynan komandalar keldı.
– Ūlttyq sport türlerı bızdıŋ tereŋ tarihymyz ben mädenietımızdıŋ ajyramas bölıgı. Astana qalasynyŋ äkımdıgı ūlttyq sport oiyndarynyŋ jandanuyna, būqaralyq sportty damytuǧa jäne salauatty ömır saltyn qalyptastyruǧa ünemı qoldau körsetıp keledı. Osy maqsatta jyl saiyn qalamyzda ūlttyq oiyndar men jarystar boiynşa 200-den asa ıs-şara ötkızılude. Endı mıne, taǧy bır jobany ıske asyryp otyrmyz. Bügıngı festival dästürlı sport oiyndary men ūlttyq salt-dästürımızdı jaŋǧyrtqan, halyqqa ruh bergen, Täuelsızdık mereitoiyna arnalǧan keremet şara. Elorda äkımdıgı aldaǧy uaqytta da osyndai jobalardy qoldap, ūlttyq sport türlerı men salt-dästürlerımızdı nasihattauǧa köŋıl böletın bolady. Elbasymyzdyŋ bastamasymen osy «Qazanat» atşabarynda jalpy köpşılıktı ūlttyq sport türlerıne baulityn arnaiy Ortalyq aşudy josparlap otyrmyz.
Qūdai qalasa, mūnda qarapaiym halyqqa atqa mınudı üirenuge, audaryspaq, asyq atu, toǧyzqūmalaq oinauǧa jäne özge de ūlttyq sport türlerın üirenuge jaǧdai jasalady. Prezidentımız 2020 jylǧa deiın halyqtyŋ 30 paiyzyn dene şynyqtyru men sportqa tartu turaly tapsyrma bergenın bılesızder. Osy rette, Astana qalasynyŋ äkımdıgı aldaǧy ekı jylda būqaralyq sportty damytu maqsatynda qala boiynşa 22 sport alaŋyn saludy josparlauda, – dedı elorda basşysy Äset İsekeşev.
At şaptyrym jerde halyq aldymen teŋge ılu saiysyn tamaşalady. Odan keiın Qyz quu köptıŋ köŋılınen şyqty. Al bılektıler Audaryspaqta at üstınde alysty. Üş künge jalǧasqan turnirde kökparşylardyŋ ışınen Astana qūramasy men Aqmola oblysynyŋ komandasy finalda synǧa tüstı.
Dumandy şara barysynda «Qazanatqa» qazaq auyly qondy. Mūnda 13 kiız üi tıgılıp, jinalǧan jūrtqa ūlttyq taǧamdardan däm ūsynyldy. Sondai-aq jastar üşın altybaqan qūrylyp, balalar asyq oinap, läŋgı teptı.
Sonymen, «Altyn jūldyzy» respublikalyq turnirınıŋ bas jüldesıne Astana äkımı Äset İsekeşev avtokölık tıktı. Būl jüldenıŋ iegerı orta qaşyqtyqtaǧy jüirıkter bäigesınde anyqtaldy.