Astanada jaŋǧyrǧan «Don Kihot»
«Astana Opera» teatrynyŋ repertuary taǧy da bır premeramen tolyqty. Älem elderınıŋ sahnasynan 150 jylǧa juyq uaqyt boiy tüspei kele jatqan äigılı «Don Kihot» baletı Astanada da qaita jaŋǧyryp, keşe tūsauy kesıldı.
«Don Kihot» – dästürlı ispaniialyq qoiylym. Liudvig Minkustyŋ muzykasyna qoiylǧan balet älem teatrlarynyŋ repertuarynan tüspei keledı. Onyŋ Astanadaǧy nūsqasynyŋ qoiuşy baletmeisterı – Reseidıŋ halyq ärtısı men «Astana Opera» balettık truppasynyŋ körkemdık jetekşısı Altynai Asylmūratova.
Klassikalyq tuyndyny körermenge qaz-qalpynda jetkızuge ortaǧasyrlyq kiımder men dekorasiialar kömektestı. 147 jyldyq tarihy bar «Don Kihot» baletıne arnap ekı jüzge juyq kostium tıgıldı. Olardy «Oskar» syilyǧynyŋ iegerı Franka Skuarchapino men Esio Fridjerio bırlesıp äzırledı. İtaliialyq suretşıler kostiumderde qara jäne qanyq qyzyl tüstı köptep paidalanypty. Kiımnen bölek, şeberlerdıŋ dekorasiialardy şynaiy etıp jasauy, animasiiany ūtymdy qoldana bıluı balettıŋ bıtım-bolmysyn aişyqtai tüstı.
Belgılı baletmeister Altynai Asylmūratovanyŋ aituynşa, balet jyldar boiy bırneşe ret redaksiialanǧan. Osy qoiylymnyŋ erekşelıgı – syǧan jäne fandango biınıŋ engızıluınde. Sondai-aq, balet ekı aktıge deiın qysqaryp, dekorasiialardyŋ auysuy jiıledı. Būl balettı tamaşalaǧan körermendı taŋdai qaqtyrǧany sözsız.
«Don Kihot» oqiǧasynyŋ jelısı ärkımge tüsınıktı, qabyldauǧa jeŋıl. Pantomima men keiıpkerlerdıŋ qai-qaisysy da maŋyzdy. Ezuıŋe erıksız külkı üiıredı. Maqsat – sahnanyŋ är jerınde, är būryşynda ömırdıŋ qainap jatqan körınısın beru» deidı äigılı balerina.
Romannan aiyrmaşylyǧy sol, basty nazarda qaharman Don Kihottyŋ özı emes, Kitri pen Bazil esımdı ǧaşyqtar. Kitridıŋ äkesı Lorenso qyzyn bai dvorian Gamaşqa ūzatpaqşy bolady. Alaida Don Kihot oǧan tosqauyl bolyp, jastardyŋ mahabbaty üşın küresedı.
Öz rölın şeber oinap şyqqan ärtısterdıŋ eŋbegın elemeu mümkın emes. Kitridıŋ rölın Qazaqstannyŋ eŋbek sıŋırgen qairatkerlerı Mädina Baspaeva jäne Gauhar Usina somdasa, Bazildı Baqtiiar Adamjan men Arman Orazov oinap şyqty. Saiahatşy Don Kihottyŋ partiiasy Jänıbek İmanqūlovqa būiyrdy. Köŋıldı Sancho Pansany Bostan Qojabekov, al Lorensony Janädıl Beisembiev sahnada jandandyrdy.
Güldana TALǦATQYZY