Astana qalalyq Jolauşylar tasymaly jäne avtomobil joldary basqarmasy elordadaǧy qoǧamdyq kölıktıŋ jüielı jūmys ısteuı üşın avtobustarda jüru aqysyn eresekter üşın – 100 teŋgege, balalarǧa – 40 teŋgege köterudı ūsynyp otyr. Būl mäsele qalalyq äkımdıkte ötken qoǧamdyq tyŋdauda talqylandy.
Basqarma basşysynyŋ orynbasary Äbdıhamit Tamabaevtyŋ aituynşa, būl QR Kölık jäne kommunikasiia ministrlıgı bekıtken jolauşylar men jük tasymaldau boiynşa qyzmet körsetu tarifterın esepteu ädıstemesıne säikes belgılenıp otyr. Ädısteme kestesıne jügınsek, syiymdylyǧy joǧary avtobustardyŋ qyzmetı üşın bır rettık jüru aqysy – 106,6 teŋge, syiymdylyǧy şaǧyn avtobustar qyzmetı üşın 112,4 teŋge belgılengen. Joǧaryda atalǧan tarif osyǧan negızdelıp otyr. Osy oraida, qalalyq mäslihattyŋ şeşımımen jeŋıldıkpen jol jüretın azamattardyŋ jol jüru tärtıbı özgerıssız qalatyn bolady.
Astana qalasynda qoǧamdyq kölıktegı bır rettık jolaqy qūny 2008 jyldan berı özgermei, 60-65 teŋge bolyp kelgenın atap ötken basqarma basşysy Raşid Amanjolov qazırgı taŋda janar jaǧar mai men qosalqy bölşekterdıŋ qymbattauyna bailanysty būl tarif kölık salasyn damytuǧa, onyŋ jyljymaly qūramyn jaŋartyp, kütıp-baptauǧa jūmsalatyn şyǧyndy ötemei otyrǧanyn jetkızdı. Atap aitqanda, 2008 jyldan berı dizel otynynyŋ 1 litrı 75 teŋgeden 115 teŋgege deiın, iaǧni, 65 paiyzǧa ösken. Al qosalqy bölşekter men jiyntyq materialdarǧa jūmsalatyn şyǧyn 80 paiyzǧa artqan.
Bügınde Astananyŋ qoǧamdyq kölık salasynda 50 baǧyt boiynşa qyzmet körsetetın 8 kompaniia bar. Avtoparkterdegı 890 avtobustyŋ 734-ı kündelıktı jelıge tūraqty türde şyǧady. 2008 jyldan berı elordaǧa 406 avtobus satyp alynǧan eken. Būdan özge, 76 baǧytty qūraityn jaŋa marşruttyq jelı jasalyp, ekspress-marşruttar ıske qosylǧan. «Astana halqynyŋ köbeiıp kele jatqanyna säikes, elordada avtobustar tapşylyǧy älı de bar. Sonyŋ bır sebebı – jürgızuşılerdıŋ jetıspeuınde bolyp otyr. Qysta bırqatar jolauşylar kölıkterınıŋ qaŋtarylyp tūruyna jürgızuşılerdıŋ aiaq astynan ketıp qaluy sebep boldy. Jalaqylardyŋ azdyǧyna bailanysty būl mamandar da bızde tūraqtamaidy. Sondyqtan tariftı köteru qajettılıkten tuyndap otyr» dedı Raşid Amanjolov. Onyŋ aituynşa, qazırgı künı elordanyŋ qoǧamdyq kölıkterıne 250 jürgızuşı jetıspeidı eken.
Būdan keiın qalalyq jolauşylar kölıgı salasynda qolǧa alynǧan jobalar töŋıregınde äŋgıme qozǧaǧan basqarma basşysy bügınge deiın gazben jüretın 350 jaŋa avtobus satyp alynǧanyn, keiın arnauly joldarmen jüretın jürdek avtobustar jelısı, kölıkterdıŋ jürısın retteitın jaŋa baǧdarşamdyq baǧdarlama ıske qosylatynyn, mūnyŋ bärı qosymşa şyǧyndy qajet etetının atap körsettı.
Qoǧamdyq kölıkte bır rettık jol jüru aqysyn köteru mäselesı älı de talqylanady.
Qymbat NŪRǦALİ
