«Arman qala – Astana» (Marat Omarov), «Elımnıŋ jüregı – Astana» (Altynai Jorabaeva), «Esıl aǧady» (MuzArt ansamblı). Astana astana atanǧaly el arasynda tanymal osyndai änder paida boldy. Būdan basqa da elordaǧa arnalyp sättı, sätsız şyqqan tuyndylar bar. Osylardyŋ jalǧasy ıspettı jaqynda «Astana» degen qarapaiym ataudy alǧan än düniege keldı. Ol tyŋdarmannyŋ talǧamynan şyǧady ma, şyqpaidy ma, bolaşaqtyŋ enşısınde, aitpaǧymyz, än avtory Jalyn Ǧalym da, oryndauşysy Luiza Kärınbaeva da önerge talasy bar jas buyn ökılderı.
Luizanyŋ (sahnalyq esımı Luina) än kögıne qanat qaqqanyna ekı jyldan asty. H-faktor muzykalyq baiqauyna qatysyp, jartylai finalǧa deiın jetken ony «National Development Group» prodiuserlık ortalyǧynyŋ negızın qalauşy Jomart Süleimenov baiqap, änşımen kelısımşartqa otyrdy. Sodan berı būl ekeuı bırge jūmys ıstep keledı.
Luina – Luizanyŋ özge änşılerden bır erekşelıgı – qai konsertte bolmasyn jandy dauysta än oryndauy. Ol üşın soŋynan erıp jüretın arnaiy muzykanttardy jaldaǧan. Kelesı aida astanalyqtar olardy körıp qaluy da mümkın. Sebebı, «Saryarqa» velotregınde ötetın «Asqaqtai ber, Astana!» merekelık gala-konsertıne Luina da qatyspaq. Sol jerde joǧaryda aty atalǧan ännıŋ de tūsauy kesılmek. Prodiuserdıŋ aituynşa, ol än Astananyŋ 15 jyldyǧyna jaqsy tartu bolmaq. Sol uaqytta änge beinebaian da tüsırılmek. Oǧan elordanyŋ körıktı jerlerı enuı tiıs.
Asa şydamsyz jūrt ändı qazırdıŋ özınde tyŋdai alady. Öitkenı, būl tuyndy otandyq radiolarda ainalymda jür.
Amanǧali QALJANOV
