Är jyly mausymnyŋ üşınşı jeksenbısınde elımızde medisina qyzmetkerlerı künı atalyp ötıledı. Elordalyq 8 myŋ därıger men osy salanyŋ 12 myŋǧa tarta orta buyn mamandaryn käsıbi merekesımen qūttyqtaimyz.
Elordanyŋ Beibıtşılık jäne kelısım saraiynda «Jastar Jyly» jäne «Ruhani Jaŋǧyru» baǧdarlamasy aiasynda «Jastar energiiasy – elordalyq densaulyq ısınıŋ senımdı bolaşaǧy» atty medisinalyq qyzmetker künıne arnalǧan auqymdy ıs-şara öttı. Biyl ekınşı jyl qatarynan ötkızılıp otyrǧan «ALTYN SHIPAGER» medisinalyq syilyǧynyŋ iegerlerın de osy saltanatty jiynda anyqtady. Būl syi-qūrmet elorda medisina qyzmetkerlerınıŋ ruhyn köteru jäne aq halatty abzal jandardyŋ eren eŋbegın elep, onyŋ qyzmetıne ıltipat körsetu maqsatynda ūiymdastyryldy.
Saltanatty räsımdı QR Densaulyq saqtau ministrı Eljan Bırtanov qūttyqtau sözımen aşyp, «Eŋ üzdık jas uchaskelık därıger» atalymy boiynşa «Niet» otbasylyq densaulyq saqtau ortalyǧynyŋ jalpy täjıribelık därıgerı Saltanat Takeevany jeke qūttyqtap, «Altyn şipager» müsını men 1 million teŋge qarjylai sertifikatyn tabystady.
Nūr-Sūltan qalasy äkımınıŋ orynbasary Erlan Kanalimov öz sözınde qalalyq densaulyq saqtau salasyndaǧy jetıstıkterge toqtaldy: «Bügın elordalyq densaulyq saqtau aldynda kürdelı mındetter tūr. Densaulyq saqtaudyŋ tiımdılıgın arttyru, qazırgı zamanǧy tehnologiialar men praktikany engızu, medisinalyq kömektıŋ sapasy men qoljetımdılıgın jetıldıru, bılıktı kadrlardy daiyndauǧa basa nazar audaru qajet» dep atap öttı Erlan Ermekūly. Äkım orynbasary «Pasientke baǧyttaluy boiynşa eŋ üzdık medisinalyq ūiym» atty ekınşı nominasiianyŋ jüldegerı bolyp tanylǧan qalalyq №10 emhana basşysyna jüldesın tapsyryp, ūjymdy tabysymen qūttyqtady.
Elorda osy saladaǧy körsetkışterımen respublika boiynşa köşbasşysy retınde moiyndalyp otyr. Bas şahardyŋ zamanaui klinikalarynda em alǧan ärbır besınşı pasient öŋırlerden keledı eken. Qalamyzda «Bastapqy medisinalyq-sanitarlyq kömek» körsetetın medisinalyq ūiymdardy damytu tūjyrymdamasyna säikes jaŋa emhanalar men stasionarlar salynyp, mamandardyŋ bılıktılıgın köteruge barynşa nazar audarylyp keledı. Ötken jyldyŋ deregıne säikes Nūr-Sūltan qalasy auruhanalarynda 200 myŋnan astam adam emdelgen, 57 myŋǧa juyq ota jasalyp, 28 myŋnan asa bala jaryq dünie esıgın aşqan. Qala emhanalaryna tūrǧyndar 4,5 million ret qaralǧan. Jüz myŋnan asa nauqas tegın därı-därmekpen qamtamasyz etılgen.
Kelesı nominasiia boiynşa Nūr-Sūltan qalasyndaǧy medisina mekemelerı basşylary arasynda «Densaulyq saqtaudyŋ tiımdı menedjerı» anyqtaldy. Qalalyq Qoǧamdyq densaulyq saqtau basqarmasynyŋ basşysy Marat Şoranov qomaqty qarjysy bar syilyqty Jedel-järdem stansiiasynyŋ bas därıgerı Timur Mūratovqa saltanatty türde tapsyrdy. №2 perinataldy ortalyǧynyŋ medbikesı – Meŋsūlu Ämırova «Eŋ üzdık orta medisinalyq qyzmetker» nominasiiasynyŋ jeŋımpazy boldy. Elordanyŋ üzdıkterı qatarynda «Diagnostika men emdeudıŋ jaŋa ädısın engızgenı üşın» qalalyq №1 auruhananyŋ ortohirurgiia jäne endoprotez bölımınıŋ meŋgeruşısı Ruslan Botaev, «Jedel järdemnıŋ üzdık brigadasy» nominasiiasynda jedel medisinalyq järdem qyzmetınıŋ täjıribelı brigadalarynyŋ bırı – qalalyq jedel-järdem stansiiasynyŋ «Saryarqa» qosalqy stansasynyŋ №1 brigadasy, «Sifrlandyrudyŋ köşbasşysy» bolyp, qalalyq №7 emhana alǧa şyqty. Marapatqa laiyqtylardy taŋdauda qala tūrǧyndarynyŋ densaulyǧyn qorǧau, olarǧa körsetıletın qyzmet sapasyn jaqsartu, halyqqa medisinalyq järdemnıŋ qoljetımdılıgı men biık sapasy eŋ basty körsetkış bolyp tabylady. Üzdıkterdı marapattau räsımı Nūr-Sūltan qalasy äkımdıgınıŋ jäne QR Densaulyq saqtau ministrlıgınıŋ qoldauymen ötkızıldı.
Elorda densaulyq saqtau salasynyŋ mäselelerın, ūlttyq medisinanyŋ damuyna atsalysyp, aq halatty jandardyŋ ızgı qyzmetın oqyrmandarǧa jetkızıp, salamatty ömır saltyn qalyŋ būqaraǧa nasihattap jürgen «Astana aqşamy» gazetınıŋ tılşısı Aigül Uaisova «BAQ-taǧy üzdık jariialanym» nominasiiasy boiynşa «ALTYN SHIPAGER» syilyǧynyŋ jüldegerı atandy.
