Eşqandai qyzmetkerı joq, bıraq tūtynuşylarǧa robottar qyzmet etetın poşta bölımşesıne bardyŋyz ba? İnternet-dükenge tapsyrys bergen kiımıŋızdı aldyn ala onlain kiıp körgıŋız kele me? Būl juyq arada mümkın emes dep oilaisyz ba? Alaida Astanada mūndai qyzmet türın körsetetın poşta bölımşelerı öz jūmysyn bastap ta kettı.
Robottandyrylǧan keŋse
– Quanyş, men sälemdeme jıberuım kerek. Ol üşın ne ısteiın?
– Sälemdemenı alu jäne jıberu üşın «Pochtamattyŋ» 6 zonasyna ötkenıŋız jön. Sälemdeme jıberetın kezde körsetılgen syzyqqa aluşynyŋ indeksın, mekenjaiy turaly mälımetterdı jazyŋyz.
«EHRO» aumaǧynda ornalasqan poşta bölımşesınde robot Quanyşpen aradaǧy äŋgıme osylai örbıdı. Būl jai bölımşe emes. Tūrǧyndarǧa jaŋa formatta qyzmet körsetetın jerde aldaǧy uaqytta qyzmetkerler jūmys ıstemeidı. Tūtynuşylarǧa robottar keŋes beredı. Eger qosymşa keŋes kerek bolǧan jaǧdaida kompiuterdıŋ kömegımen videobailanys jasai alasyz nemese gibridtı bankomat arqyly «Qazpoştanyŋ» koll-ortalyǧyna habarlasuǧa bolady.
«Qazpoşta» AQ robopost-keŋsesınıŋ jetekşı mamany Arailym Begalina bölımşenıŋ ışın aralatyp, tūtynuşylarǧa qandai zamanaui qyzmet körsetıletının tanystyryp şyqty.
– Gibridtı bankomat dep ataluy standartty qyzmet körsetuden bölek qosymşa qyzmet türlerın de atqara alady. Mäselen, robot Quanyş arqyly tölem kartasyn aluǧa ötınış beresız, al gibridtı bankomat ony şyǧaryp beredı. Būl atauly karta – KAZPOST/AliExpress. Atalmyş tölem kartasy älemge äigılı AliExpress dükenınen tauar alǧanda jäne ärbır saudaŋyzǧa 1,5 paiyz keşbek jinauǧa mümkındık beredı, – dep tüsındırdı.
Gibridtı bankomat jeke kuälıgıŋızdı skanerleidı. Aldaǧy uaqytta JSN termei-aq aiyppūldaryŋyzdy tekserıp, biudjetke tölenetın salyqtardy da töleuge bolady. Sonymen qatar, sausaq ızderı arqyly bankomattan aqşa şeşudıŋ joldary qarastyryluda.
– Eger sızdıŋ tölem kartaŋyz biometriialyq derekterıŋızben säikestendırılse, kartany alyp jürudıŋ qajetı joq. Bar bolǧany bas barmaǧyŋyzdy qūrylǧyǧa qoisaŋyz, qajet somaŋyzdy şeşıp aluǧa bolady, – deidı ofis mamany.
Gibridtı bankomat arqyly kez kelgen kartaǧa aqşa saluǧa, aluǧa, audaruǧa bolady ärı «Qazpoştanyŋ» barlyq qyzmet türlerın paidalanuǧa yŋǧaily. Ol üşın post.kz saityndaǧy jeke kabinetke kırıp, adamnyŋ bet-älpetın tanu qyzmetı arqyly eşqandai login, qūpiiasöz termei-aq qalaǧan qyzmettı alasyz. Ondaǧy kamera türıŋızdı tanyp, kıruge mümkındık beredı.
Bölımşede internet-dükenge tapsyrys bergen kiımıŋızdı onlain kiıp köruge bolady. Eger ūnamasa auystyruǧa, basqa ülgıdegı kiımderdı taŋdap, kiıp te köruge bolady.
Sälemdeme supermarketı
«Qazpoştanyŋ» jaŋa formatynyŋ bırı – Sälemdeme supermarketı. Supermarket – yŋǧaily servis. Onda klientter kezekke tūrmaidy jäne özıne tiımdı uaqytta sälemdemesın alyp kete alady. Ol üşın sälemdeme supermarketınde belgılengen, arnaiy terminalǧa sälemdemenıŋ trek nömırın nemese ūialy telefonnyŋ nömırın engızu qajet. Būl terminal jüiede sūranys bolǧan sälemdemenı tauyp, söresı, qatary, ūiaşyqtary körsetılgen talon beredı. Klient özdıgınen zalǧa kırıp, körsetılgen ūiaşyqtan özıne kerek sälemdemenı alady. Şyǧa berıste tūrǧan operatorǧa mälımetterdı tekseru üşın jäne üsteme tölemaqysyn töleu qajettılıgın anyqtau üşın jeke kuälıgın körsetedı. Al sälemdeme jıberu üşın klient gofrotarany (tarany, oramdardy) QR boiynşa jetkızu üşın qūny eskerılgen baǧamen jäne trek nömırı berılgen türınde alady. Arnaiy bölıngen orynda öz sälemdemesın orap-tüiıp bolǧannan keiın terminalǧa «Jıberu» knopkasyn basady, japsyrylǧan ştrihkodty skanerleidı. Eŋ soŋynda terminal bergen talondy alady. Onda Qazaqstan boiynşa sälemdemenıŋ jüru jolyn baqylap otyratyn trek nömır körsetıledı.
Astana qalasynyŋ tūrǧyndary osy qyzmet türın keŋınen paidalanady. Sälemdeme supermarketı arqyly künıne 10500 sälemdeme qabyldanyp, 1000-1500-ǧa juyǧy jöneltıledı. Bügınde elordada jaŋa formattaǧy 9 sälemdeme supermarketı qyzmet körsetedı.
Paidaly pochtamat
Robottandyrylǧan keŋsede pochtamat ornalasqan. Avtomattandyrylǧan būl terminal arqyly sälemdeme qabyldap ärı joldauǧa bolady. Qazırgı uaqytta Astanada «Qazpoştanyŋ» 21 pochtamaty bar. Kün saiyn 500-ge juyq sälemdeme berıledı. Mūndai terminaldar halyq köp şoǧyrlanǧan qoǧamdyq oryndarǧa, oiyn-sauyq ortalyqtaryna, sauda üilerıne qoiylǧan. Künı-tünı jūmys ısteitın pochtamattar tūrǧyndar üşın öte yŋǧaily. Qalaǧan uaqytynda qyzmetın paidalana beredı.
Sälemdemenı alu da – oŋai. Pochtamattyŋ ekranyna telefon nömırıŋdı terıp, sms arqyly kelgen sälemdeme kodyn engızseŋız bolǧany. Al sälemdeme jıberu üşın banktık kartochka arqyly nemese qolma-qol sälemdemenıŋ aqşasyn töleseŋız jetkılıktı.
Poşta tarihynan
Astanalyq poşta qyzmetınıŋ tarihy ärıde jatyr. Dästürlı formattan jaŋa formatqa köşu joly ūzaq uaqytty qajet ettı.
Qalalyq poştanyŋ ǧimaraty 1966 jyly qalanǧan. Tūrǧyndarǧa älı künge deiın osynda qyzmet körsetedı.
1998 jyly Astana qalasynda 19 poşta bölımşesı bolsa, 2018 jyly 21 bölımşesı halyqqa qyzmet etude. Poşta qyzmetkerlerınıŋ sany 44 adamnan 89 adamǧa köbeigen.
20 jyl būryn tek poşta qyzmetın körsetse, qazırgı uaqytta qarjylyq jäne agenttık qyzmetterdı ūsynady.
