11 şıldede Prezident Qasym-Jomart Toqaev elordany damytu mäselelerıne qatysty jiyn ötkızedı. Būl turaly Astana qalasynyŋ äkımı Jeŋıs Qasymbek mälım ettı.
«Osy aidyŋ 11 künı Prezident «Astana bas josparynda» belgılengen elordanyŋ mäselelerı boiynşa ülken jinalys ötkızedı. Eŋ basty mäsele – Bas jospar jäne qalany abattandyru, kögaldandyru, qalada tūratyn azamattarǧa jäne qonaqtarǧa jaily jaǧdai jasau. Sondyqtan osy baǧyttarǧa qala biudjetın naqtylauda 20 mlrd teŋgeden astam qarajat közdelıp otyr. Jalpy, Memleket basşysy Astana qalasyna erekşe nazar audaryp, jarty jyldyŋ ışınde ekınşı ret osy mäsele boiynşa jinalys ötkızbek. Ol jerde Ükımet müşelerı tolyǧymen bolady» dedı Jeŋıs Qasymbek qalalyq mäslihat otyrysynda.
Qala basşysy LRT qūrylysy boiynşa ǧana aldaǧy 2-3 jylǧa 250-300 mlrd teŋge qarajat qajettıgın atap öttı. Mūnan bölek, №3 jylu-elektr ortalyǧyn, kärız jüielerın, basqa da nysandar saluǧa qomaqty qarajat kerek bolady. «Prezidenttıŋ erekşe nazarynyŋ kömegımen qarjy organdary, Ükımet pen özge de salalyq ministrlıkter arqyly 2024-2026 jyldarǧa arnalǧan biudjetke qosymşa qarjy tartamyz dep ümıttenemız. Jalpy, aldaǧy 2-3 jylda biudjettı tolyqtyru qiyn bolady» dedı äkım.
