Taiauda elordanyŋ törınde jaŋa arbat aşyldy. Ony Elbasynyŋ özı aralap kördı. Bız de jaqsyny körmekke dep sol jerge at basyn tıredık.
Astana arbaty körnektı rejisser Äzırbaijan Mämbetov köşesı boiymen Mahambet Ötemısūly atyndaǧy Oquşylar saraiynan Esıl özenıne deiıngı aralyqta ornalasqan. Bas jaǧynda Kenesary hannyŋ eŋselı eskertkışı köz tartady. Bylaişa aitqanda, keşqūrym tūrǧyndar men qala qonaqtary jiı baratyn oryn. Köpten berı būl jerge kelmegen edım. Adam tanymastai özgergen. Özgeşelıktı bırden baiqaisyz. Ärine, elordadan arbat oŋai aşyla salǧan joq. Oǧan qozǧau salǧan adam boldy. Onyŋ esımı – Arai Ordabaeva. Şynaşaqtai ǧana qyz bala. Bıraq maqsaty ülken. Bas qaladan arbat aşu üşın üş jyl boiy jarǧaq qūlaǧy jastyqqa timegen. Aqyry, soǧan qol jetkızdı.
– Astana arbaty – menıŋ köpten bergı armanym. Ony aşam dep köp jügırdım. Bırden ıske asa qoiǧan joq. Elorda äkımdıgıne hat jazdym. Nätije bolmady. Bırde qala äkımı Äset İsekeşev qatysqan jiynda osy jaiynda öz ideiamdy aittym. Ol kısı ūsynysymdy qabyl aldy. Hatyma da jauap keldı. Sodan jūmys bastaldy. Arbattyŋ orny belgılendı. Jūrtşylyq jiı jinalatyn jerdı taŋdadyq. Özıme būl oryn ūnaidy. Saryarqa audanynyŋ äkımdıgı de qoldau körsettı. Ötken 10 mausymda arbat resmi aşyldy. Aumaqta 18 kiız üidıŋ dekorasiiasy oryn teptı. Bügınde tūrǧyndardyŋ arbatqa qyzyǧuşylyǧy küştı. Memleket basşysy kelgennen keiın tıptı joǧarylap kettı. Ol kısı osynda kelgende än aitty, suret saldy. Jūrtşylyqpen jüzdestı. Bızge rizaşylyǧyn bıldırdı. Bolaşaqta arbatty keŋeitsem deimın. Astananyŋ qysy qytymyr. Sondyqtan qysta jūmys ısteitındei jabyq galereia salǧym keledı, – deidı Arai jüzı bal-būl janyp.
Ol menı äuelı jetelep üş aq boz üige alyp bardy. Ortasyndaǧy on ekı qanat üi erekşe körındı. Syr boiynan kelgen syi eken. Hannyŋ üiı deidı. Barlyq ūlttyq jasaumen jabdyqtalǧan. Işı kırse, şyqqysyz. Jerge töselgen syrmaqtardyŋ oiuynan köz almaisyz. Sandyqtyŋ bederı de bölek. Qyzdyŋ jiǧan jügındei tızılıp tūrǧan qūraq körpelerge taŋdai qaǧasyz. Būl üige qonaqtar jiı bas sūǧady eken. Odan keiın arbattaǧy qolönerşıler ornalasqan orynǧa bardyq. Qūddy ertedegı Şyǧys bazary sekıldı. Ūlttyq önerdıŋ marjandary sörelerde samsap tūr. Qyzyǧyp, satyp ala bergıŋız keledı. Araidyŋ aituynşa, arbatqa kez kelgen şeber ornalasa almaidy. Bekıtılgen öz tärtıbı bar. Tek qana öz qolymen sapaly būiymdar jasaityn şeberler tartylǧan. Olardyŋ bärı jan-jaqtan jiylǧan. Qolönerşıler būiym jasap qana qoimai, şeberlık synyptaryn ötkızedı.
Keşqūrym arbattyŋ ömırı qyz-qyz qainaidy. Aşyq aspan astyndaǧy kinoteatr jūmys ısteidı. Onda älemnıŋ üzdık filmderı körsetıledı. Keluşıler ony tegın tamaşalaidy. Odan keiın karaokenıŋ än aitu baiqauy bastalady. Bır būryşta tızılıp, köşe muzykanttarynyŋ da önerın tamaşalaisyz. Kädımgı qala ışındegı ekınşı qala sekıldı bölek älemdı köz aldyŋyzǧa keltıredı.
Suretşıler önerı de bır älem. Qūsmanbek Omarūly degen aǧamyz Almatydan kelıptı. Ötken joly Memleket basşysymen bırıgıp suret salǧan azamat. Sol quanyşyn aqtaryp bızge jaiyp saldy.
– Elbasymen bırge suret salamyn dep oilaǧan emespın. Ony men tarihi oqiǧa dep baǧalaimyn. Jaz bastalsa, elordaǧa kelemın. Äiteuır, Astananyŋ äserı tartyp tūrady. Özım käsıbi suretşımın. Bıraq Arbatta tūryp suret salǧandy jaqsy köremın. Mūnda erkındık bar. Adamdarmen tyǧyz bailanysasyz. Şabyt beredı. Bır adamnyŋ beinesın jarty saǧatta salamyn. Qūny da joǧary emes. 5 myŋ teŋge, – deidı qylqalam şeberı.
Odan keiın suretşı bızge Arbat turaly öz pıkırın aitty. «Arbatty aşqan Arai qaryndasyma köp rahmet. Bızdı ünemı qoldaidy. Men Parijde suret saldym. Onda suretşıler jinalatyn oryn bar. Barselonada sondai jer bar. Onda künde mereke. Bızdıŋ Astana arbaty sondai bolsa deimın. Oǧan bilık tarapynan qoldau qajet» dedı köptı körgen aǧamyz.
İä, ol künge de jetermız. Bastysy, Astanadan arbat boi köterdı. Endı onyŋ joly keŋeie bersın demekpız!
Azamat ESENJOL
