Ötken jyldyŋ 4 şıldesı künı Astana qalasynyŋ 1 millionynşy tūrǧyny düniege kelgen bolatyn. Oljas pen Arailym Mūhamediiarovtar otbasynyŋ quanyşy künı keşe 1 jasqa toldy. Otbasyna ǧana emes, sonymen qatar isı qazaqqa quanyş syilaǧan Saida bügınde täi-täi basyp ösıp keledı.
Oljas özınıŋ ata-anasy Qostanai oblysynan Astana qalasyna bala künınde qonys audarǧanyn aitady. Sol siiaqty Aidanyŋ ata-anasy da erte bastan elordada ösıp-önu üşın Kerekuden kelgen. Iаǧni, Oljas pen Arailym Astana qalasynyŋ mektepterınde bılıp alyp, osynda joǧary oqu ornyn tämamdaǧan. Jarasymdy jūp elordada tanysyp, 2015 jyly şaŋyraq köteredı.
– Saida şıldenıŋ 3-nen 4-ne qaraǧan tünı saǧat 01:00-de düniege keldı. Taŋerteŋ bızdı qala äkımnıŋ orynbasary kelıp qūttyqtady. Men ol kezde Astana künıne bailanysty qūttyqtap jatqan şyǧar dep oiladym. Sodan keiın qala äkımı kelıp, «sızder elordanyŋ millionynşy tūrǧyndary boldyŋyzdar» dep qūttyqtady. Bız qyzymyzdyŋ Astana qalasynyŋ 1 millionynşy tūrǧyny bolatynyn bılgen joqpyz. Onyŋ üstıne qala äkımınıŋ qolynan 2 bölmelı päterdıŋ kıltın alǧan kezde tüs körıp jatqan siiaqty sezındım. Öitkenı būǧan deiın bız päter jaldap tūryp jatqan bolatynbyz, – deidı ol.
Qarapaiym jūmysşy bolyp qyzmet jasaityn otbasy üşın äkımnıŋ qolynan 2 bölmelı päter alu – airyqşa oqiǧa. Öitkenı Oljas elordany elektrmen qamtuşy «Astana-REK» käsıpornynda energetik, al Arailym bolsa «Nūrşaşu» balabaqşasynyŋ tärbieşısı bolyp jūmys ısteidı.
– Qazaqtyŋ «Bır bala tuylsa, bır tal jusan artyq ösedı» degen sözı ras eken. Öitkenı Saida düniege kele sala otbasymyzǧa ülken quanyş syilady. Äitpese, däl qazırgı uaqytta Astanadan ekı bölmelı päter alu myŋdaǧan adamdar üşın arman bolyp otyr emes pe? Mıne, osy armanǧa bırınşı Allanyŋ, ekınşı kışkentai qyzymyzdyŋ arqasynda jetıp otyrmyz. Sondai-aq, baspanaly boluymyzǧa kömektesken atqamıner aǧalarymyzǧa alǧys aitqym keledı, – deidı Oljas.
Jalpy elımızdıŋ ösıp örkendeuı üşın million tūrǧyny bar bırneşe qala bolǧany maŋyzdy bolyp otyr. Būl turaly Memleket basşysy Nūrsūltan Nazarbaev ünemı aityp jür. Öitkenı million tūrǧyny bar şahardyŋ ekonomikalyq-äleumettık ösıp örkendeuı arta tüsedı. Qazırgı taŋda Almatydan keiın Astana qalasy osy mümkındıkke ie bolyp otyr. Sondai-aq, būl qatarǧa jaqynda Şymkent qalasy qosylatynyn Elbasynyŋ özı aitqan bolatyn. Toqsan auyz sözdıŋ tobyqtai tüiını qazaqtyŋ köbeiıp jatqany köŋıldı kökke köteredı.
Serık JOLDASBAI
