ATA-ANALARDAN AQŞA JİNAU DŪRYS PA?
Bügınde mekteptegı oquşylardan aqşa jinau mäselesı jiı aitylady. Äsırese, oǧan ata-analar tarapynan qarsy pıkırler köbırek kezdesedı. Juyrda Astana qalasy äkımınıŋ tapsyrmasymen mektep qajettılıkterıne aqşa jinau jaǧdailarynyŋ jiılep ketuıne bailanysty elordalyq mektepterde tüsındıru jäne aldyn alu jūmystaryn jürgızu jönındegı qoǧamdyq komissiia qūryldy.
KOMİSSİIа JŪMYSYN BASTADY
Komissiianyŋ qūramyna «Nūr Otan» partiiasynyŋ, qoǧamdyq bırlestıkterdıŋ belsendılerı, qalalyq mäslihattyŋ deputattary jäne ükımettık emes ūiymdardyŋ ökılderı endı.
Beisenbı künı Astana qalalyq Bılım basqarmasynyŋ basşysy Qasymhan Senǧazyev elordalyq jurnalisterge arnap baspasöz mäslihatyn ötkızdı. Onda, äsırese, oquşylardan aqşa jinau mäselesı köbırek talqylandy. Oǧan Bılım basqarmasynyŋ basşysy egjei-tegjeilı jauap berdı. Osyǧan bailanysty qūrylǧan komissiia elordalyq mektepterde tüsındıru jäne aldyn alu jūmystaryn bastady. Top müşelerı aptasyna ekı ret, iaki särsenbı jäne senbı künderı jūmys ısteidı. Olar «Äkımge ötınış» qyzmetı arqyly qala äkımınıŋ atyna, Bılım basqarmasyna nemese äleumettık jelılerde ata-analardan şaǧym joldanǧan mektepterge barady. Bügınde atalǧan top bas qaladaǧy №1, №17, №50 mektepterdı aralaǧan. Sonymen bırge, jalpy bılım beretın oqu ordalaryna infografika ülestırıldı. Onda ata-analar men oquşylarǧa qajettı aqparattar jazylǧan.
«Jalpy astanalyq 85 jalpy bılım beretın mekteptı kütıp ūstauǧa memlekettık qazynadan bölınetın qarjynyŋ 76,6 paiyzy eŋbekaqyny töleu qoryna berılgen, 13 paiyzy jetım balalardy, az qamtylǧan otbasylardan şyqqan balalardy, bastauyş synyp oquşylaryn tamaqtandyruǧa, 4,7 paiyz kommunaldyq qyzmetterge, 5,7 paiyz ǧimaratty kütuge jäne qyzmet körsetuge, salyqqa jäne basqa şyǧyndarǧa qarastyrylǧan» deidı Qasymhan Senǧazyev.
QORǦA QARJY KEREK PE?
Bılım basşysynyŋ aituynşa, mekteptı qamtamasyz etu üşın qarjy jetkılıktı deŋgeide qaralǧan. Bıraq, soǧan qaramastan, keibır bılım ordalarynda mektep nemese synyp qory qūrylyp, jūmys ısteitın körınedı. Oǧan oquşylardan qorǧa dep aqşa jinalady. Osy jaiynda ata-analardyŋ da pıkırın bıldık. Üş balasy bırdei mektepte oqityn Quat Esenbai degen zamandasymyz oǧan aqtaryla jauap berdı.
«Menıŋ üş balam mektepte oqidy. Oqu jyly bastalǧan kezde är synyptyŋ ata-analar jinalysy bolady, sol jiynda eŋ bırınşı qorǧa aqşa jinau mäselesı köterıledı. Ony jäne ata-analardyŋ özderı bastaidy. Basynda 2500-3000 teŋgeden dep bastama kötergenımen, belsendı ata-analar aqyry 5000 teŋgeden jinaiyq degen şeşımge keledı. Eger būǧan qarsy uäj aita bastasaŋ, «bärı balalarymyz üşın emes pe?!» deidı. Amalsyz sözden tosylasyŋ. Odan soŋ ne bolady deisız ǧoi? Jaŋa jylǧa qarai nemese odan keiın qordaǧy aqşa bıtıp qalady. Taǧy aqşa jinaiyq degen bastama köterıledı. Söitıp, on oqu aiy ışınde tek qana synyptyŋ qoryna dep 5000 teŋgeden ekı-üş ret aqşa jinalady. Mektepte ortaşa eseppen üş myŋ oquşy oqityn bolsa, tek bır ret bes myŋ teŋgeden jinaǧanda qomaqty qarjynyŋ basy qūralady. Kelesı jyly balalarymyz basqa synypqa köşedı, taǧy solardyŋ bölmesın jabdyqtaudy bız, ata-analar, moinymyzǧa alamyz. Şyndyǧynda, mūndai şyǧyndarǧa arnaiy qarjy bölınedı emes pe? Ol qaida jūmsalyp jatqany tüsınıksız. Bıraq bır aita keter jai, aqşa jinau mäselesın ünemı ata-analardyŋ özderı köteredı. Är synyp ata-analary arasynda sondai belsendıler tabylady. Būl jerde mūǧalımdı kınälai almaimyz» deidı ol. Quat zamandasymyz aşy da bolsa, şyndyqty aşyq aityp otyrǧan sekıldı. Demek, onyŋ sözıne qaraǧanda, aqşa jinauǧa ata-analardyŋ da yqpaly zor ekendıgın baiqauǧa bolady. Ärine, ata-analardyŋ da äleumettık jaǧdaiy bırkelkı emes. Mäselen, bır üide bır bala mektepke barsa, kelesı otbasydan 4-5 jetkınşek oquy mümkın. Äsırese, bügıngıdei qymbatşylyq kezeŋde köp balaly otbasylarǧa mektepte oqityn balasyn kiındıru men oǧan qajettı sabaq qūraldaryn alu da oŋaiǧa tüspeidı.
QAMQORLYQ KEŊES QAJET
Ūzaq jyldardan berı bılım salasynda eŋbek etıp jürgen, täjıribesı mol, abyroily azamat, elordadaǧy Älkei Marǧūlan atyndaǧy №40 orta mekteptıŋ direktory Erbol Irgebai aǧamyz özgeşe bır oi tastady. Ol kısı ata-analarmen bırlese otyryp, Qamqorlyq keŋes qūrǧan jön deidı.
– Bügınde mekteptegı oquşylardan aqşa jinau kürdelı mäselege ainalyp otyr. Ärine, bız özımızdıŋ mektepte osy jaǧdaiǧa bailanysty būiryq şyǧaryp, tyiym saldyq. Aqşa qai kezde jinalady? Mektep ışınde mädeni şaralar köp ūiymdastyrylady. Mäselen, oquşylar synyppen bırıgıp, kinoǧa, teatrǧa, konsertke baruy mümkın. Al mekteptegı kabinettı jabdyqtauǧa qarjy jinalmaidy. Bızde ondai jaǧdai kezdesıp körgen emes. Ärine, jaǧdaiy jetıp, mektepke kömektesemın degen ata-ananyŋ qolyn qaqpaimyz. Ol üşın, älgınde aitqandai, Qamqorlyq keŋes qūru qajet. Bıraq bärı de zaŋ aiasynda bolu kerek. Onyŋ jūmysy aşyq bolǧan dūrys. Jinalǧan qarjy qaida jūmsalyp otyrǧanyn bärı bılu kerek. Bır jyldan berı osy jobany jüzege asyra almai jürmın. Barlyq qūjattardy äzırlep, QR Ädılet ministrlıgıne tapsyrǧan edım. Olardan qūjat ekı ret qaityp keldı. Keŋes qūramyna elımızge belgılı azamattar tartyldy. Osy jobany zaŋdastyryp, küşeitu kerek, – dep mektep basşysy sözın odan ärı jalǧap kettı.
«Bız mektepke mūǧalımderge kömek körsetu, syilyq jasau degen dünielerdıŋ barlyǧyn toqtattyq. Osy taqyrypta ata-analarmen aşyq äŋgımelestık. Mekteptıŋ öz biudjetı bar. Mäselen, osy qazan aiyna bızdıŋ mektepke 24 mln qarjy qarastyrylǧan. Osy qarjyǧa mūǧalımderdıŋ jalaqysy men oquşylardy tamaqtandyru, avtobus tasymaly sekıldı türlı jūmystar kıredı. Jazǧy jöndeu jūmystaryna arnaiy qarjy bölınedı. Bızdıŋ mektebımız äigılı ǧūlama, ǧalym atamyz Älkei Marǧūlan atynda bolǧandyqtan, türlı ǧylymi ekspedisiiaǧa şyǧamyz. Soǧan ata-analar tarapynan qoldau körsetkender boldy. Keibır bılım ordalarynda «mektep qory», «synyp qoryna» aqşa jinaidy eken degen sözderdı estıp qalamyn. Bızde ol joq. Osynyŋ qajettılıgı bar ma? Artyq söz sodan şyǧady» deidı Erbol Irgebai aǧamyz.
Tüiındep aitqanda, bügıngı taŋda oquşylardan aqşa jinau mäselesı özektı düniege ainalyp otyrǧan sekıldı. Endı oǧan qalalyq bilık nazar audardy. Komissiia qūryldy. Elordalyq ata-analar da atalǧan toptyŋ jūmysyn jıtı baqylap otyrǧan sekıldı. Olardan ülken ümıt kütedı. Bız de ümıt kütemız.
Azamat ESENJOL