Sailau künı elordalyqtardyŋ erekşe belsendılık tanytqanyna kuä boldyq. Tüs äletınde Kongress-holl saraiynda ornalasqan №100 sailau uchaskesıne bas sūqqanbyz. Kelım-ketım kısılerdıŋ jüzınen osynau saiasi şarany ülken jauapkerşılıkpen qabyldaǧany aŋǧarylady.
Ǧimarat ışınde qosuly tūrǧan jıgerlı küi bügıngı uaqiǧanyŋ sän-saltanatyn arttyryp, merekelık atmosfera syilauda. Būl uchaskede 2415 adam tırkelıptı. Onyŋ 304-ı baqylauşylardyŋ qatysuymen öz üilerınde dauys beredı. Soǧys jäne eŋbek ardagerlerı, mümkındıgı şekteulı jandar, densaulyǧyna bailanysty sailau uchaskesıne kele almaityndar osylaişa taŋdaularyn jasaidy. Sailau komissiiasynyŋ töraǧasy Temırjan Balabekovtıŋ aituynşa, astanalyqtardyŋ taŋerteŋnen bergı qarqyny tym joǧary.
– Sailau uchaskesın tärtıp boiynşa taŋǧy saǧat 7-de aştyq. Eŋ bırınşı bolyp 77 jastaǧy tūrǧyn Valentina Iаchnikova dauys berdı. Äjeidıŋ būl äreketıne qatty süisındık. Egde jasyna qaramastan, azamattyq boryşyn atqaruǧa yntaly. Osyndai ülkenderımız keiıngı jastarǧa ülgı bolsa ǧoi, – deidı töraǧa.
Jastardyŋ da aryny jaman emes. Äsırese, 18-ge jaŋa tolǧan ūl-qyzdar saliqaly kezeŋge aiaq basqandaryn sezınıp, sailauǧa tas-tüiın daiyndyqpen kelıptı. Solardyŋ bırın äŋgımege tartqanbyz. Özın Elaman Äbujaqyl dep tanystyrǧan boişaŋdau bozbala Qazaq gumanitarlyq zaŋ universitetınde oqidy eken.
– Tuǧan künım däl osyndai aituly künmen tūspa-tūs tüskenıne rizamyn. Menıŋşe, ärbır patriot sailauǧa mındettı türde qatysuy tiıs. Jarqyn bolaşaqty armandaityndar öz taŋdaularyn bügın jasaidy, – dep jıgıtımız jymidy.
Keşkı 8-ge deiın el aiaǧy basylǧan joq. Şahar tūrǧyndarynyŋ osynşalyqty yqylasyna bız de quandyq.
Botagöz MARATQYZY
astana-akshamy.kz
