«Bırlık» saiasi partiiasynyŋ ūiymdastyruymen «Qaiyrymdy kökten kütpe, bırlıgı mol köpten küt» atty qaiyrymdylyq auksiony öttı. «Körme» zalynda ötken şaraǧa astanalyq käsıpkerler men qaltaly azamattar qatysty.
Saiasi partiianyŋ bastamasymen byltyr «Täuelsızdık tanytqan talanttar» atty körkemöner jūmystarynyŋ respublikalyq baiqauy ötkenı esımızde. Osy şyǧarmaşylyq bäigenıŋ jalǧasyndai bolǧan qaiyrymdylyq auksionynda baiqau jeŋımpazdary men belgılı qylqalam şeberlerınıŋ jüzden asa kartinasy köpşılık nazaryna ūsynyldy. Al kartinalardy satudan tüsken qarajat aq qan dertıne şaldyqqan balalardy emdeu ortalyqtaryna berılmek.
«Elımızde jylyna orta eseppen qaterlı qan auruy bar 2500 balaǧa em jürgızıledı. Onyŋ ışınde onkologiialyq jäne gematologiialyq auruy anyqtalǧan 600-ge tarta bala bar» deidı därıgerler. Qazaqstanda jylyna 140 aq qan auruy anyqtalatyn körınedı. Älemdık statistika qaterlı ısık aurularynyŋ qatarynda osy syrqat bırınşı orynda ekenın aitady.
Qaiyrymdylyq şarasynyŋ aşylu saltanatynda «Bırlık» partiiasynyŋ töraǧasy Serık Sūltanǧali söz söiledı. «Jaqyndarymyzǧa degen kömek pen qaiyrymdylyqtyŋ bolaşaq üşın maŋyzy zor ekenın ūmytpaǧanymyz jön. Damyǧan elderde aq qanmen auyratyndardyŋ şamamen seksen paiyzy qaiyrymdylyq şaralarynan tüsken qarajatpen emdeledı. Sondyqtan barlyq otandastarymdy osy ısten qalys qalmauǧa şaqyramyn» dedı S.Sūltanǧali.
