Keşe Nūr-Sūltan qalasy mäslihatynyŋ Qūrylys, ekologiia, kölık, sauda jäne tūrǧyn üi-kommunaldyq şaruaşylyq mäselelerı jönındegı tūraqty komissiiasynyŋ otyrysy bolyp öttı. Onda astanany sumen jabdyqtau, su būru jäne sarqyndy sulardy tazartu jüielerınıŋ jūmysy jäne olardy damytudy qamtamasyz etu salasynda atqarylyp jatqan ıs-şaralar qaraldy.
Kün tärtıbındegı mäseleler boiynşa Nūr-Sūltan qalasynyŋ Otyn-energetikalyq keşenı jäne kommunaldyq şaruaşylyq basqarmasynyŋ basşysy T.Qūlūşev baiandama jasady.
«Qazırgı künı Nūr-Sūltan qalasyn auyzsumen jäne şaruaşylyq maqsattaǧy sumen negızınen Astana su qoimasy qamtamasyz etıp otyr. Qoima tek aǧyndy aǧyndy sularmen ǧana tolyǧady. Ekınşı su közı – Sätpaev arnasy, ol sudy Ertıs özenınen alady» dep mälımdedı ol.
Baiandamaşy keltırgen derekke süiensek, elorda halqynyŋ täulıktık suǧa degen qajettılıgı 280 myŋ tekşe metrdı qūraidy. Al onyŋ qalaǧa täulıktık sumen jabdyqtaumölşerı 300 myŋ t.m aspaidy. Būl jaǧdaidyŋ asa qürdelı ekenın körsetedı. Mamandardyŋ Nūr-Sūltan qalasynda 2030 jylǧa qarai suǧa degen qajettılık täulıgıne 400 myŋ tekşe metrge deiın artuy mümkın dep topşylap otyr.
Qalany sumen jabdyqtau jüiesın damytu josparyna säikes, osy jetıspei jatqan su kölemın NFS-3(sorǧy-süzgı stansiiasy) jaŋa su aidau blogy qamtamasyz etuı kerek bolatyn. Stansiianyŋ täulıktık önımdılıgı 100 myŋ t.m dep eseptelgen. Onyŋ jobalyq-smetalyq qūjattamasy 2011 jyly jasalǧanymen, qūrylys jūmystary älı qolǧa alynǧan joq.
Sondai-aq, qoldanystaǧy tazartu qūrylǧylarynyŋ önımdılık qabıletın arttyru mäselesı de kün tärtıbınen tüspei tūr.
«Bügınde Nūr-Sūltan qalasyn sumen jabdyqtau boiynşa ekı joba äzırlendı. Bırınşısı, elordaǧa jaqyn maŋaidaǧy suasty közderın paidalanu. Ol tötenşe jaǧdailarda(toǧan aǧytylyp ketkende, su sapasy ışuge jaramsyz bolyp qalǧanda, t.s.s- avt.). Ekınşısı, Astana qoimasyn sumen tolyqtyratyn qūrylys salu» dedı basqarma basşysy.
Nūr-Sūltan qalasyn sumen jabdyqtau kezeŋ-kezeŋge bölıp josparlanǧan. Alǧaşqy kezeŋde astana su qoimasynyŋ tübı tereŋdetılıp, arnasy tazartylady. Ol sorǧy agregattardyŋ kömegımen toǧanǧa jylyna qosymşa 62,3 mln tekşe metr su jinauǧa mümkındık beredı. Kelesı kezeŋderde Esıl özenıne bögen salyp, odan täulıgıne 170,0 myŋ t.ş su jıberuge qabılettı ekı aiyrǧy sutartqyş magistralı tartylatyn bolady. Eger atalǧan jobalar maqūldanyp, jetkılıktı kölemde qarjylandyrylatyn bolsa, olardyŋ qūrylysy 2023 goda jyldyŋ 30 jeltoqsanynda salynyp bıtuı tiıs.
Jalpy qalany sumen jabdyqtau mäselesı jylda köterılıp keledı. Būl joly da tūraqty komissiianyŋ otyrysynda mäslihat deputattary aitqan syn-eskertpelerı de az bolmady. Mäselen, biyl sanitarlyq-himiialyq, mikro-biologiialyq körsetkışter boiynşa auyzsudyŋ sapasy byltyrǧydan da tıptı tömendep ketken. Virusologiialyq küiı naşarlaǧan. Sumen jabdyqtauşy ūiym – «Astana su arnasy» JŞS-nyŋ sanitarlyq-tehnikalyq qyzmetterındegı kemşılık-keleŋsızdıkter köp. Atap aitqanda, rezervuarlardaǧy auyzsudy tazartu jäne zalalsyzdandyru şaralary tiısınşe jürgızılmeidı. Äsırese, jazǧy-küzgı mausymdarda auyssu sapasy syn kötermeidı.
Sondai-aq, bırtalai jekemenşık üiler ortalyqtandyrylǧan su jüiesıne qosylmaǧan. Sondai-aq su jüiesıne qosylmaǧan aumaqtarda kolonkalar tapşy. Deputattar auyzsuǧa qatysty būdan basqa da köptegen özektı mäselelerdı köterdı.
