Elordalyq mäslihat deputattary Baiqoŋyr audanynda abattandyrylǧan aulalar men qoǧamdyq keŋıstıkterdı aralady.
Memleket basşysy Qasym-Jomart Toqaev Astana qalasyn damytu mäselelerı jönınde keŋeste elordalyqtar seruendeitın jäne demalatyn oryndardy köbeitudı tapsyrǧan-dy.
– Reseidıŋ Qazan qalasynyŋ täjıribesın zerttep köruge bolady. Būl qalanyŋ köşelerı, saiabaqtary jäne jaǧalau alaŋdary öte ädemı jäne tartymdy. Bızdıŋ maqsat – Astanany jyldyŋ kez kelgen mezgılınde tūrǧyndar men qonaqtarǧa barynşa qolaily etu, qalanyŋ kelbetın meilınşe jaqsartu, – degen edı Prezident.
Bügınde qalalyq keŋıstıktı jaŋǧyrtu jäne abattandyru jūmystary qarqyn aldy. Halyq qalaulylary osy baǧyttaǧy jūmystardy közben körıp, mäselelerdı talqylau üşın jolǧa şyqty.
Baiqoŋyr audany äkımınıŋ orynbasary Doshan Tūiaqpaev jol bastap, atqarylǧan jūmystarmen tanystyrdy. Olar aldymen Aqbūlaq özenınıŋ boiyndaǧy demalys ornyna toqtady. Jaŋa kelbetke ie bolǧan skverde demaluşy adamdardyŋ qarasy qalyŋ. Aqyn Jambyl Jabaevtyŋ eskertkışınen bastau alǧan keŋıstık «Alatau» sport keşenıne deiın sozylyp jatyr. Būl jer qala tūrǧyndary men qonaqtaryna barynşa qolaily etıp jabdyqtalǧan eken.
– Biyl Baiqoŋyr audanynda 25 aula, 7 qoǧamdyq keŋıstık aşylady. 11 aulany abattandyru jūmysy aiaqtaldy. Qazır 4 auladaǧy jūmys qarqyn alyp, tamyz aiyna paidalanuǧa berıledı. Al 10 aula aumaǧy 15 qyrküiekke deiın aiaqtalatyn bolady. Qoǧamdyq keŋıstıkterdıŋ 6-uy abattandyryldy. Būdan bölek, bırqatar aulada aǧymdaǧy jöndeu-qalpyna keltıru jūmysy jürude, – dedı D.Tūiaqpaev.
«Aqbūlaq» özenınıŋ jaǧalauyndaǧy abattandyru jūmysy mūnymen şektelmeidı. Abylai han daŋǧylynan Şäkärım Qūdaiberdıūly daŋǧylyna deiıngı aralyqty da qamtidy. Būl aumaqta L.Gumilev atyndaǧy Euraziialyq ūlttyq universitettıŋ oqu korpustary men studentter üiı ornalasqandyqtan adamdar jiı seruendep jüredı. Salauatty ömır saltyn ūstanǧan azamattar jügıredı, ärı sport alaŋdarynda jattyǧu jasaidy. Senbı, jeksenbı künderı student jastar jaǧalaudaǧy sahnada mädeni-köpşılık ıs-şaralardy ötkızıp, än oryndap jatady. Sondyqtan jaǧalau körıktı ärı taza bolǧany dūrys.
Ärı qarai, jaiau aralau – «Jurnalister» alleiasy.Deputattar Kenesary köşesı №73, №77 mekenjaiyndaǧy jaiau jürgınşıler keŋıstıgı men bırqatar aula alaŋdaryn kördı.
Şynynda, bas qalada saiabaqtar, skverler, jaiau adamǧa arnalǧan köşeler, oiyn alaŋdary jäne taǧy basqa qoǧamdyq keŋıstıkter örken jaiyp, tūrǧyndarǧa qolaily jaǧdai jasaluda. Deputattarmen aralau barysynda osyǧan köz jetkıze tüstık.
