Biyl Astanada qar köbesı erte sögıldı. Köktem lebın sezıngen jūrtşylyqtyŋ köŋıl-küiı de joǧary. Ädemı mezgılmen bırge, jaqsylyq ataulynyŋ jarşysyndai bolyp jetetın Nauryzda da kün ädettegıden jarqyrap, ainalasyn nūrlandyryp tūrdy. Mäz-mäiram bolǧan el qalalyq äkımdık aldyndaǧy alaŋǧa merekenı toilap, köŋıldı sergıtu üşın jinaldy.
Ortalyq alaŋnan äuelegen äsem änder ainalany kernep tūr. Qaz-qatar tızılgen aqşaŋqan kiız üiler alystan menmūndalaidy. Jūrtşylyq olardyŋ ärqaisysyna kezekpen-kezek kırıp, aralap jür. Būryn kiız üilerge lauazymdy tūlǧalar ǧana kırıp, qarapaiym halyqqa onyŋ esıgı jabyq bolatyny jiı synǧa alynuşy edı. Al Astana biyl jaqsy dästürdı qolǧa alyp, ärbır kiız üidı ūlttyq bıtım-bolmysymyzdan syr şertetın muzei sekıldı jasaqtapty. Olardyŋ ärqaisysynda tūskiızder ılınıp, dombyra, qylqobyz sekıldı ūlttyq aspaptar, aǧaştan, terıden jasalǧan qolöner būiymdary qoiylypty. Salt-dästürımızdı ūlyqtaǧan segız kiız üidıŋ qatarynda Bılım, Energetika basqarmalarynyŋ, «Astana-Tazalyq» JŞS-nyŋ, Jastar saiasaty mäselelerı jönındegı basqarmanyŋ tıkken üilerı bar. Sondai-aq, universitet pen kolledj ūjymdary da bır-bır üiden tıgıptı.
Aitpaqşy, alaŋdaǧy ıs-şaralarǧa negızınen, Saryarqa audanynyŋ äkımdıgı jauapty bolǧanyn atap ötken jön. Al alaŋnyŋ qaq ortasyndaǧy sän-saltanaty kelısken sahnadan änder äuelep, jyrdan şaşu şaşyldy. Myŋ būralǧan qyzdar bi bilep, merekenıŋ körıgın qyzdyrdy. Elorda jūrtşylyǧyn Ūlystyŋ ūly künımen qūttyqtap, äsem än-küiın tartu etkenderdıŋ qatarynda Dosymjan Taŋatarov, Almas Kışkenbaev, Bibıgül Ysqaqova, Albina Oganesian, Jadi, Äsel Nūrtazina, Berık Seksembaev syndy önerpazdarmen bırge, «Naz», «Artist» ansamblderı men «DiArt», «Hanzada», «Art-dombyra» toptary bar.
Merekelık dumandy qyzdyrǧan alaŋdy aralai jürıp, qaz-qatar tızılgen 10 palatkaǧa taban tıredık. Būlardyŋ toǧyzynda – taǧam türlerı, oiynşyqtar, kündelıktı qoldanylatyn tūrmystyq zattar satylsa, Işkı saiasat basqarmasynyŋ palatkasynda ūlttyq taǧamdar, atap aitqanda, bauyrsaq, nauryz köje, palau tegın ülestırılıp jatyr eken. Halyq dämnen auyz tiıp ketıp jatyr. Şette tūrǧan jastau äieldı sözge tarttyq. Özın Küläş dep tanystyrǧan ol: «Men jyl saiyn Nauryzdy taǧatsyzdana kütemın. Ūlystyŋ ūly künınde jegen taǧamnyŋ dämı de tättı körınedı maǧan. «Köppen körgen ūly toi» deidı ǧoi qazaq. Aq tüienıŋ qarny jarylǧan bügıngı merekede taratylyp jatqan bauyrsaqtardyŋ dämı tıl üiıredı. Üide de pısıresıŋ ǧoi bauyrsaqty. Bıraq däl osylai dämdı şyqpaidy» dep küledı Küläş. Al elge qazan-qazan palau ülestırıp, bauyrsaqtan auyz tigızıp, alǧysqa bölenıp jatqan qyzdardy äŋgımege tarttyq. Aty-jönderı Jaŋagül Mūhanmedinova, Gülden Baikenova jäne Läilı Mūhanmedinova eken. Olar täp-tättı bauyrsaqty özderınıŋ Fatima, Saltanat atty aspazdary pısırgenın aitty.
Jaǧalai jürıp, u-şu bolyp arqan tartysyp, qol kürestırıp jatqan adamdarǧa qarai jaqyndadyq. Qalalyq äkımdık pen Dene tärbiesı jäne sport basqarmasy salauatty ömır saltyn damytu üşın arqan tartysu, toǧyzqūmalaq, qol kürestıru sekıldı oiyndar ūiymdastyrypty. Mıne, bılektı jıgıtter arqan tartysuda. Bes adamnan top-topqa bölıngen jastar bır-bırıne des berer emes. Būl jarysta «Chempiondar» toby bırınşı oryndy, al Tötenşe jaǧdailar basqarmasynyŋ «Jas-tar» toby ekınşı oryndy, «Aryn» toby üşınşı oryndy ielendı. Al qor kürestıru saiysynda 70 kg salmaqtaǧy azamattardyŋ arasynda Ruslan Dautov atty qala tūrǧyny bırınşı oryndy enşıledı. Ekınşı oryn Aidos Qadyrǧa būiyrsa, üşınşı oryndy Älijan Mūratov aldy. Jeŋımpazdar qūr qol qaitqan joq. Ūiymdastyruşylar olarǧa syilyqtar men arnaiy diplomdar tabys ettı.
Sporttyq şaralardan balalar da qalysar emes. Olar toǧyzqūmalaqtyŋ qyzyǧyna tüsken. Şetkerı tūrǧan ekı qyzdy äŋgımege tarttyq. Onyŋ eresekteuı – Arujan Saǧyndyqova eken. №64 mektep-liseiınıŋ 5-synyp oquşysy. Ekınşısı – Gülsezım Saǧyndyqova. Ol №15 mektep-liseiınıŋ 3-synybynda oqidy. «Men üige qonaqqa kelgen balalardyŋ bärıne toǧyzqūmalaqty üiretemın. Äkem toǧyzqūmalaq midyŋ oilau qabıletın damytady degen. Üide men, aǧam, äkem oinaimyz. Būl – bızdıŋ qazaqtyŋ ūlttyq oiyny. Ol maǧan ūnaidy» deidı Arujan.
Astana qalasy Dene tärbiesı jäne sport basqarmasyna qarasty Sporttyq-būqaralyq ıs-şaralardy ötkızu direksiiasynyŋ menedjerı Erjıgıt Öserbaidyŋ aituynşa, sporttyq şaralar bügın keşke deiın jalǧasady. Joǧaryda aitylǧan saiystardan basqa, tūrǧyndar arasynda qazaqşa küres, asyq atu, gir köteru, nysana atudan da jarys bolady. Ūiymdastyruşylar tūrǧyndardy būqaralyq şaralarǧa belsene atsalysuǧa şaqyrdy.
Qalalyq alaŋdaǧy merekelık şaralar keşke deiın jalǧasyp, Astana aspanyn än men küige kömkerdı.
Qymbat TOQTAMŪRAT
