Astana qalasynyŋ äkımı Jeŋıs Qasymbek Baiqoŋyr audanynyŋ tūrǧyndarymen kezdesıp, halyqty tolǧandyrǧan köptegen saualǧa jauap berdı. 5 saǧattan asa uaqytqa sozylǧan kezdesu barysynda tūrǧyn üi keşenderın jaŋǧyrtu, qūrylysy ūzaqqa sozylǧan nysandardy aiaqtau, aulalar men qoǧamdyq keŋıstıkterdı (saiabaq, gülzar) abattandyru, joldar men trotuarlar salu, jaryqtandyru jürgızu, qosymşa avtobustardy ıske qosu jäne basqa da problemalar qozǧaldy.
Negızgı problemanyŋ bırı – apatty küidegı tūrǧyn üilerdı būzu.
«Qazırgı uaqytta qalada mūndai 200-den asa üi bar. Bız tızımdı jaŋartamyz, osylaişa apatty üilerdıŋ sany da artady. Olardy būzu kestesın jasaimyz. Aldaǧy 3 jylda apatty, tozyǧy jetken üilerdıŋ tūrǧyndaryna arnap 2,5-3 myŋ päter saludy josparlap otyrmyz» dedı J.Qasymbek.
Astana äkımdıgı Kırpıştı, Kültegın, Asan qaiǧy köşelerındegı eskı üilerdı sürıp tastauǧa 20 mlrd teŋgeden astam qarajat jūmsamaq. Kezdesude tūrǧyndar Iý.Malahov köşesınıŋ kölık ötkızu qabıletın köteru turaly mäsele köterdı. Halyqtyŋ aituynşa, būl köşe temırjol ötkelımen qiylysyp jatqandyqtan, ört söndıru qyzmetı men jedel järdem kölıkterınıŋ ötuın qiyndatqan.
«Būl audanda būzuǧa jatatyn üiler öte köp. Bügın taŋerteŋ saǧat 9.00-de Kırpıştı, Kültegın, Asan qaiǧy köşelerınde boldyq. Būl uchaskede biyl üilerdı süru jūmystary belsendı jürgızıledı. Biyl mümkındıgınşe bärın aiaqtauǧa tyrysamyz. Sondyqtan osy uchaskelerdegı jūmystardy bıtırmei, sızder aitqan şaǧyn ainalma köpırge kıre almaimyz. Ärı köp aqşa qajet ekenın tüsınu kerek. Joba būǧan deiın qolǧa alynǧan. Bız sony aiaqtaǧan soŋ baryp köpır mäselesıne kırısemız» dep tüsındırdı äkım.
Audan tūrǧynynyŋ qala avtobustarynyŋ jetıspeuşılıgıne bailanysty saualyna jauap bergen qala basşysy Astananyŋ avtobus parkı 25-30 paiyzǧa jaŋaratynyn jetkızdı.
«Jazǧa qarai alǧaşqy avtobustar keledı. Barlyǧy 300-500 aralyǧynda jaŋa avtobus satyp alamyz. Būl qazırgı avtobus parkınıŋ 25-30 paiyzyn qūraidy» dedı äkım.
Jaŋa avtobustar jetkızılgen soŋ, avtobus baǧdarlarynyŋ jetkılıksız tarmaqtary men jaŋa baǧyttaryna paidalanuǧa berıledı.
Kezdesude qalaǧa äkelınıp jatqan kömırdıŋ sapasy naşar ekenı aityldy.
«Köpqabatty üide tūratyn halyqtyŋ aua sapasy turaly şaǧymyna jauap bergım keledı. Auany lastap jatqan bız emes, sapasyz kömır. Qaşan bızge sapaly otyn äkeledı? Būryn Şūbarköldıŋ kömırın äkeletın. Ony jaqqanda, mūrjadan şyqqan tütın äreŋ körınetın. Al qazır qara tünek basyp ketedı. Keiıngı üş jylda osyndai mäsele paida boldy. Bızge äkeletın kömırdı mazutpen mailap qoiatyndai tıptı. Jaqsaŋ, jyluy joq. Onymen qoimai üidıŋ auasyn būzady. Jaqsy kömırdıŋ bärı eksportqa ketıp jatyr ma degen küdık tuyndaidy» dedı audannyŋ bır tūrǧyny.
Jeŋıs Qasymbek kömır sapasyn tekseruge uäde berdı.
«Şūbarköl kömırı eksportqa jıberılmeidı. Al sızder jaǧyp otyrǧan kömır sapasyna kelsek, tekseremız. Tūrǧyndar kömır satyp alyp jürgen uchaskenı baryp tekserıŋızder. Ondaǧy kömır talapqa sai ma, joq pa, anyqtau kerek» dedı qala äkımı.
«Esıl jaǧalauynyŋ Aqbūlaq özenınen Triatlon parkke deiıngı uchaskesı qorqynyşty jaǧdaida tūr. Qaşan körseŋ symdar qyltiyp şyǧyp jatady, jol jiegıne töselgen tas tösenışter qoparylyp jatady. Vandalizm örşıp tūr» dep şaǧymdandy audan tūrǧyny.
Äkım būl mäsele biyl şeşımın tabatynyn aitty.
«Abattandyru biudjetı turaly aitsaq, biyl kögaldandyruǧa, trotuarlar men park aimaqtaryna bölınetın biudjet aitarlyqtai artady. Onyŋ ışınde Baiqoŋyr audany da bar. Esıl jaǧalauy turaly Memleket basşysynyŋ da tapsyrmasy bar. Sız aityp otyrǧan uchaske ǧana emes, bükıl jaǧalau abattandyrylady» dedı Jeŋıs Qasymbek.
Taǧy bır maŋyzdy mäsele – injenerlık infraqūrylym salu.
«Qalada tırşılıktı qamtamasyz etu jüielerıne arnalǧan nysandar salyp jatyrmyz, olar qalaǧa jylumen jabdyqtau, sumen jabdyqtau, elektr quaty boiynşa qosymşa küş beredı. Sol siiaqty äleumettık nysandardy saludy jalǧastyramyz: aldaǧy oqu jylynda 13 mektep salamyz, onyŋ bır bölıgı Baiqoŋyr audanynda ornalasady. Sondai-aq jeŋıldıkpen berıletın qoljetımdı tūrǧyn üi, medisinalyq ortalyqtar, sport ortalyqtary jäne taǧy basqa nysandar salamyz. Köterılgen mäselelerdı oryndau boiynşa keste jasaimyz: olardyŋ bır bölıgı biyl şeşıledı, al özgelerın kelesı jylǧa josparlaimyz» dedı qala basşysy.
Ol mūndai kezdesuler tūraqty türde ötkızıletının, barlyq audandar men eldı mekenderdıŋ tūrǧynymen kezdesetının aitty.
