Astana büldırşınder üşın äzırşe qauıpsız qala bolmai tūr. Sebebı oiyn alaŋdary sapasyz salynyp jatqany belgılı. Olardy qadaǧalaityn jauapty adamdardyŋ selqostyǧy da joq emes. Būl, ärine, bölek äŋgımenıŋ özegı. Äzırşe jaraqattanǧan balalardy qabyldaityn jerler turaly aitaiyn.
Jaqynda Ainaş esımdı azamatşa belsendılık tanytyp, Astana qalasy analarynyŋ atynan arnaiy beineündeu jasady. Men halyq qalaulysy retınde osy problemanyŋ anyq-qanyǧyn bıluge kırıstım. Rasynda da, elordanyŋ damuymen bırge halyq sany kürt östı. Raqymjan Qoşqarbaev köşesınde tūrǧan bır ǧana jaraqattanǧan adamdardy qabyldaityn nükte jetkılıksız. Qazırgı uaqytta №2 köpsalaly qalalyq balalar auruhanasy (sol travmpunkt) – jaraqat alǧan balalarǧa şūǧyl kömek körsetetın jalǧyz mekeme. Būl auruhana täulıgıne 600-den astam balany qabyldaidy, olardyŋ teŋ jartysyna rentgenologiialyq zertteu jürgızıledı.
Jalpy alǧanda, qala äkımdıgı men Densaulyq saqtau ministrlıgı būl problemamen tanys. Resmi habarlamada aitylǧandai, №2 köpsalaly qalalyq balalar auruhanasyndaǧy travmpunkttıŋ jüktemesın azaitu üşın №4, 5, 6, 7, 9 jäne 10 qalalyq emhanalaryna saǧat 8:00-20:00-ge deiın 4 sanattaǧy balalarǧa alǧaşqy medisinalyq kömek körsetu tapsyrylǧan eken. Bır ättegen-aiy – balalarǧa tek jūmys künı men jūmys uaqytynda ǧana oina dep aita almaimyz. Keşke, tünde, mereke künderı, senbı men jeksenbıde būl emhanalar nauqastardy qabyldamaidy. Aqiqatyn aitsam, mūndaǧy kınä Äleumettık medisinalyq saqtandyru qorynda bolyp otyr. Olar travmpunktke tiıstı qarajatyn bölıp beru kerek ekenın elemeitın syŋaily. Būl da zertteu jasaityn jeke taqyryp.
Astana qalasy Qoǧamdyq densaulyq saqtau basqarmasynyŋ mälımetınşe, elorda halqy sanynyŋ ösuıne bailanysty №4 jaŋa balalar auruhanasynyŋ jobasy qaraluda. Sondai-aq eresekterge arnalǧan №2 qalalyq köpbeiındı auruhana bazasynda balalar men eresekterge arnalǧan travmatologiia punktınıŋ qūrylysy jürgızılude. Osy jospar ıske assa, qajettılık öteletın tärızdı. Alaida oiyn alaŋdarynda jaraqattanǧan balalarǧa jedel em-dom körsetu är balanyŋ densaulyǧyn, ömırın saqtaityn faktor ekenın esten şyǧarmaiyq.
Anas BAQQOJAEV, Mäjılıs deputaty
